كايرو خان: فندق 3 نجوم عتيق في وسط البلد - الحياة في كايرو Feature - كايرو 360
 







كايرو خان: فندق 3 نجوم عتيق في وسط البلد
كايرو خان: فندق 3 نجوم عتيق في وسط البلد
اصدرت في: 11/02/2014

 أغلب فنادق وسط البلد مش جديدة، يعنى بـ تتميز بالعراقة مش بس فى أساسياتها، لأ كمان فرشها وشكلها وقطع الأثاث اللى فيها، إحنا بـ نعتقد أن ده مش إهمال من أصحاب الفنادق دى لكنه نوع من أنوع القدسية لها ولعراقتها.

فندق "كايرو خان" واحد من ضمن الفنادق الموجودة فى قلب القاهرة بـ توصل له بسهولة جدًا، موجود فى 12 شارع 26 يوليو، تقاطع شارع عماد الدين، ممكن تروح مشى لو أنت فى منطقة وسط البلد، ولو تُهت اسأل عن صيدليات دلمار وعطالله أو الأمريكين، على الرغم أنه فى مكان حيوى إلا أن ده بـ يترتب عليه أنه بـ يفتقد الهدوء بعض الشيء حتى لوقت متأخر من الليل بسبب حركة المرور المستمرة فى شوارع القاهرة، الفندق بـ يستقبل المصريين والأجانب على مدار 24 ساعة لكن أغلب النزلاء من المصريين، والأسعار كمان بـ تختلف بين المصريين والأجانب.

الفندق قديم بعض الشيء لكن مُجمله مش سيء بالإضافة أنه مريح نفسيًا، فريق العمل بالفندق متعاون بشكل كويس مع النزلاء لكنهم مش بـ يجيدوا الإنجليزية بشكل كافي للتحاور معهم.

الفندق عبارة عن مبنى حوالى 11 دور، الغرف واسعة جدًا ممكن نوصفها بأنها جناح حتى لو كانت فردية، وتختلف من غرف زوجية إلى فردية من حيث الشكل وحتى السعر، الفردية مكونة من حمام وسرير واستراحة وتكييف وثلاجة وتليفزيون، أما الزوجية بالفعل يطلق عليها جناح لأنها فعلاً واسعة جدًا فيها 2 سرير و2 ثلاجة واحدة منهم للمشروبات الروحية وكمان بار داخل الغرفة و2 حمام وتكييف وتليفزيون واستراحة.

بالنسة للحجز أسعاره مختلفة لليوم الواحد، للمصريين الغرف الفردية 300 جنيه، والغرف الزوجية 400 جنيه، بالنسبة للأجانب الغرف الفردية 80 دولار، والغرف الزوجية 100 دولار ونفس البرنامج تقريبًا، الحجز شامل الإفطار فقط، بالنسبة للغداء خارج الحجز لكن متوفر فى الفندق ويبدأ من 60 جنيه.. الإفطار والغداء فى الدور الأخير وفيه كافيتريا فى الدور الأول للمشروبات.

إدارة الفندق ممكن كمان يساعدوك فى حالة طلبك للمساعدة للتحرك لأى مكان، ويحضروا لك تاكسى يكون معاك الوقت اللى تحبه، لكن الأفضل أنك تساعد نفسك لأن تكلفته بـ تكون أغلى من التكلفة العادية، زمان كانوا بـ ينظموا رحلات نيلية شاملة الغداء لكن حاليًا مش متوفرة لأن أسعارها كانت غالية إلى حد ما.

الإفطار كميته قليلة ومش بـ يتغير، يعنى كل يوم تقريبًا بـ يقدموا نفس الصنف، بس ممكن نقول أن مستوى الأكل متوسط الجودة.

من الحاجات الصعبة اللى ممكن تقابلك لو معاك عربية مش هـ تلاقى مكان بسهولة علشان تركن عربيتك، وكمان ممنوع التدخين فى الفندق.

ومن المميزات المتوفرة أن فيه Wi-Fi بس سرعته بطيئة، وفيه صالة للساونا والجيم لكن متوقفة حاليًا لوجود بعض الصيانة، ده بالإضافة أن فيه قاعة اجتماعات بـ تساعى حوالى 100 فرد لو أنت عندك اجتماع مهم ومش لاقى مكان، وكمان ممكن يقدموا لك وجبة أو مشاريب لطيفة حسب الاتفاق، وفيه كمان صالة أفراح بـ يتوفر فيها دى جى وكوشة وفيديو وبوستر للعروسين وبوفية طعام وشاى، واستضافة للعروسين يوم كامل بالنسبة للأسعار بـ يكون حسب الاتفاق.. ممكن تحجز عن طريق الموقع أو عن طريق التليفون: 02-23922015, 02-23927962, 0122-7809001, 0122-7809002.

مزيد من الصور
  • كايرو خان: فندق 3 نجوم عتيق في وسط البلد
  • كايرو خان: فندق 3 نجوم عتيق في وسط البلد
  • كايرو خان: فندق 3 نجوم عتيق في وسط البلد
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
منى أبو عامر
حرر بواسطة:
منى أبو عامر
تاريخ النشر:
11/02/2014
كاتبة، حماسية جدًا. حبت القراءة على كِبر، واكتشفت كمان أنها بـ تعرف ترسم وهي عندها 20 سنة، بـ تحب التصوير أوي لكن مش موهوبة، بـ تحس بمتعة رهيبة وهي بـ تشتغل إكسسوار Handemade بحب، بـ تحب الحياة وكوكي بنتها جدًا.