دليل أحداث نهاية الأسبوع: فرقة الجركن وعشرة غربي وعيد ميلاد بكيا وعروض مسرحية - الحياة في كايرو Feature - كايرو 360
 







دليل أحداث نهاية الأسبوع: فرقة الجركن وعشرة غربي وعيد ميلاد بكيا وعروض مسرحية
دليل أحداث نهاية الأسبوع: فرقة الجركن وعشرة غربي وعيد ميلاد بكيا وعروض مسرحية
اصدرت في: 06/03/2014

المرة دي آخر كلام، آخر ويك إند في أجازة نصف السنة اللي اتمدت بدل المرة ثلاث مرات، طلاب المدارس والجامعات كان عندهم فرصة يعوضوا شوية أسابيع من اللي ضاعت في أجازة الصيف مع حظر التجول والتوترات الأمنية، لكن لكل شيء نهاية، ونتمنى أن الويك إند ده يبقى مسك الختام، وتعجبكم مقترحاتنا لأيام الخميس والجمعة والسبت.

النهارده يوم حافل بالعروض والحفلات، نبدأ بساقية الصاوي اللي بـ تقدم حفل راب وهيب هوب في قاعة النهر لكل من علي الشاعر وسوسكا، وبما أننا قليل لما بـ نشوف بنت بـ تغني راب، فمتوقعين الحفلة تبقى ظريفة ومختلفة، وسعر التذكرة 20 جنيه للأعضاء وغير الأعضاء. 

يقدم مركز المصطبة فرقة "الجركن البدوية" وحفل غنائي موسيقي راقص على مسرح الضمة في وسط البلد، سعر التذكرة 30 جنيه و20 جنيه عند الحجز المسبق. فرقة الجركن كانت ظهرت في أغنية "علشان لازم نكون مع بعض" السنة اللي قبل اللي فاتت وغنت الجزء البدوي اللي في الآخر.

بيت الرصيف بـ يستضيف معرض فوتوغرافيا بعنوان "لاوعي لافكر" اللى بـ يناقش خروج الإنسان من حالة اللاوعي واللافكر والدخول إلى حالة الوعي والفكر! الدعوة عامة، والنهاردة آخر أيام المعرض.

بقى لنا كثير ما تكلمناش عن حفلات كايرو جاز كلوب، الليلة دي بـ يقدم مزيكا حلوة زي ما عودنا، روك وفانك وريجي وأفرو مع فرقة سلالم وفرقة عشرة غربي، الحجز ضروري قبل ما تروح.

بكيا مدينة نصر بـ تحتفل بعيد ميلادها الثالث وكانت عاملة برنامج موسيقي لمدة 3 أيام، النهاردة آخر يوم وأجمد يوم، سعر التذكرة 40 جنيه لمزيد من المعلومات اضغط هنا أو اتصل بــ 0224046688.

مركز درب 17 18 للثقافة والفنون المعاصرة أطلق مؤخرًا معرض "ماسبيرو الجزء الثاني" وهو معرض فني النسخة الأولى منه كانت في عام 2011 حيث عرض مجموعة من الفنانين وجهات نظرهم في الإعلام والتليفزيون المصري، الدعوة عامة.

ربع السلام مكان مميز موجود في شارع المعز في الأزهر، هـ يقدم بكرة الجمعة مسرحية إيمائية بعنوان "بابا وماما والبزازة" لفريق "اسمك إيه؟" ضمن فعاليات مهرجان بانتو للبانتو مايم والدعوة عامة.

ساقية الصاوي هـ يبقى فيها حفل موسيقي لفرقة شوارعنا في قاعة النهر، سعر التذكرة 20 جنيه. الفرقة حققت شهرة لا بأس بها مؤخرًا بعد ظهورها في عدد من البرامج التليفزيونية والمسابقات.

بكرة وبعده وبالتعاون مع جمعية حاوية سيوة في بيت الرصيف حفل بعنوان "مزيكا مع الزجالة" ومن خلاله مجموعة موسيقيين هــ ينوروا القاهرة من سيوة، وهــ يعملوا حفلتين مزيكا بالاشتراك مع موسيقيين من القاهرة في يومين وراء بعض، سعر التذكرة 25 جنيه.

أخيرًا يوم السبت تقدم فرقة أراجيد مع الفنان النوبي فرح المصري مجموعة من أغاني التراث وأصالة التقاليد الموسيقية النوبية في كايرو جاز، ويشاركه الحفل الفنان مصطفى هيركى اللى بـ يقدم مجموعة من الأغاني التراثية برضه، للحجز والاستعلام اتصل بـ 33459939 - 01068804764. 

تابعوا أجندة كايرو 360 اللي بـ نضيف لها الأحداث أول بأول، وما تنسوش لو عندكم أي فعاليات خاصة أو عامة إحنا مش كاتبين عنها هنا ترسلوا لنا تفاصيلها علشان ننشرها وغيرنا وغيركم يعرف عنها، وأجازة سعيدة عليكم.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
06/03/2014
-