شارع دمشق: تجارة قطع غيار وكماليات العربيات فى مصر الجديدة، القاهرة - الحياة في كايرو Feature - كايرو 360
 







شارع دمشق: تجارة قطع غيار وكماليات العربيات فى مصر الجديدة، القاهرة
شارع دمشق: تجارة قطع غيار وكماليات العربيات فى مصر الجديدة، القاهرة
اصدرت في: 27/03/2014

كل الناس اللى عندهم عربيات في مصر الجديدة والمناطق المجاورة لها يعرفوا طبعًا شارع دمشق، كل حاجة ممكن تحتاجها عربيتك تقريبًا هـ تلاقيها هناك، الشارع مشهور بتجارة قطع الغيار والكماليات لمعظم أنواع العربيات وكمان فيه ورش للصيانة السريعة وفيه محطتين بنزين بـ يقدموا خدمات زى غيار الزيت والغسيل بأنواعه العادي والجاف والكيميائى.

 

إزاى تروح شارع دمشق؟

شارع دمشق في روكسى مصر الجديدة، خلف الحرية مول وسينما هليوبوليس، وموازى لشارع الأهرام اللي بـ يعتبر الشارع الرئيسي في روكسى.

 

قطع الغيار

فيه هناك تجار قطع غيار لجميع أنواع العربيات الملاكي تقريبًا وفيه لبعض الأنواع قطع غيار مستعملة (استعمال الخارج) زى ما بـ يسموها، كمان فيه محلات قطع غيار تابعة لبعض توكيلات العربيات، وفيه محلات قطع غيار معتمدة من بعض التوكيلات، وطبعًا فيه محلات قطع غيار مضروبة، ومحلات لبيع وتركيب زجاج العربيات بأنواعه، وأخرى لبيع الإطارات والبطاريات بس دي مش كثير هناك، وكمان محلات لعمل مفاتيح العربيات العادية والمكودة.

على فكره سهل جدًا أنك تعرف محلات قطع الغيار المضروبة: أول حاجة هـ تلاقى التاجر مُصر أن دي نفس قطعة الغيار اللى في التوكيل وبعض التجار بـ يأكدوا أن التوكيل بـ يشترى منهم، ثاني حاجة هـ تلاقى قطعة الغيار غالية جدًا أو رخيصة جدًا حسب دماغه، ثالث حاجة هـ تلاقى التاجر بـ يقول لك أن قطعة الغيار ألمانى حتى لو أنت عربيتك صينى أو يابانى.. خدوا بالكم.

 

الكماليات

في شارع دمشق هـ تلاقى كل الكماليات اللى ممكن تفكر فيها لعربيتك، مثلاً لو عاوز تغير كاسيت العربية أو السماعات هـ تلاقى هناك أكبر تشكيلة وبكل الأسعار عند السجان وأحمد السني مثلاً.

ولو عاوز تغير فرش العربية هـ تلاقى هناك اختيارات كثيرة بأسعار مناسبة جدًا والأسعار دي بـ تكون كمان شاملة مصنعية التركيب اللي غالبًا مش بـ يأخذ وقت كثير.

فيه كمان محلات بـ تعمل فيميه للزجاج والستيكرات اللى بـ تتلصق على العربيات وبـ تبيع كل الحاجات الصغيرة اللى ممكن تحطها في العربية وأشهرهم "الحاج إبراهيم" بتاع الفيميه.

وفيه محلات كثير بـ تركب سنتر لوك وماكينات رفع الزجاج أوتوماتيك وأجهزة الإنذار بأنواعها، حتى غطاء العربية والدواسات هـ تلاقيهم هناك.

 

الورش

من أشهر الورش في شارع دمشق ورشة "أولاد عاشم نوار" ودول من أحسن الناس اللى بـ يشتغلوا في تكييف العربيات وعندهم كمان معظم قطع الغيار اللى ممكن تكييف العربية يحتاجها، وعلى فكرة بـ يعطوا ضمان على الشغل، بـ يشتغلوا كمان في كهربة العربيات والكماليات بس في الشتاء لما ما بـ يكونش فيه شغل تكييف كثير وأسعارهم كويسة.

هـ تلاقى هناك مجموعة من الورش الخاصة بميكانيكا وكهربة وتكييف العربيات وممكن كمان تلاقى عفشة لكن مافيش خالص في شارع دمشق ورش سمكرة أو دهان، غير الورش الموجودة في دمشق هـ تلاقى فنيين ميكانيكا وكهرباء سيارات في كل حتة في الشارع، ورشتهم جزء من الرصيف وبـ يشتغلوا في الشارع وساعات بـ يكون معاهم عربية صغيرة بـ يستخدموها كشنطة عدة ومخزن قطع غيار.

الناس دي بـ يكونوا حل مثالي جدًا لك لو أنت رايح تعمل حاجة بسيطة في العربية وما عندكش وقت يعنى تغير لمبة محروقة أو فانوس مكسور أو بوجيهات أو تيل فرامل.. الحاجات السريعة.

مزيد من الصور
  • شارع دمشق: تجارة قطع غيار وكماليات العربيات فى مصر الجديدة، القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد  عبد الرحمن
حرر بواسطة:
محمد عبد الرحمن
تاريخ النشر:
27/03/2014
صحيح قعد في كلية هندسة سنين كثيرة، بس ده لأنه قرر يبقى "معيد" بطريقته الخاصة. مهووس بالمحركات والميكانيكا، ناصري حتى النخاع، وبجانب كونه مهندس محترف وكاتب هاوي في كايرو 360 له نشاط مؤثر في روتر أكت هليوبوليس.