دليل أحداث نهاية الأسبوع: أوبرا توسكا وفرقة بساطة وعرض صح النوم ومعارض فنية - الحياة في كايرو Feature - كايرو 360
 







دليل أحداث نهاية الأسبوع: أوبرا توسكا وفرقة بساطة وعرض صح النوم ومعارض فنية
دليل أحداث نهاية الأسبوع: أوبرا توسكا وفرقة بساطة وعرض صح النوم ومعارض فنية
اصدرت في: 08/05/2014

دورنا على طرق مبتكرة نطول بها أجازة نهاية الأسبوع دي شوية بس باءت كل محاولاتنا بالفشل وقضينا أسبوع عمل كامل لأول مرة من أكثر من شهر، ورجع الويك إند يومين مش أكثر، وده معناه أننا نكثف خروجاتنا في اليومين دول، ونحضر معارض الصبح وندوات بعد الظهر وحفلات وسهرات بالليل، اتفضلوا معانا نشوف إيه ممكن يتعمل النهارده وبكرة وبعده.

عدد كبير من المعارض تم افتتاحها مؤخرًا، في الجمعية الألمانية للتعاون الدولي (GIZ) يقام معرض للفنان التشكيلي عمرو هيبة والدعوة عامة، والمعرض مستمر لحد نهاية شهر أغسطس.

وفي مركز الجزيرة للفنون فيه معرض لثلاثة فنانين تشكيليين من مصر، وهم: طه حسين وشيرين البارودي وأدهم فرج. الدعوة عامة والمعرض مستمر ليوم 28 مايو الجاري. 

درب 17 18 عامل ورشة لتعليم النحت، وكيفية رسم البورتريه. سعر الورشة شامل الخامات: 1430 جنيه، لملء استمارة الحجز اضغط هنا. ولمزيد من المعلومات عن الورشة اضغط هنا

نروح للعروض المسرحية، عندنا النهارده عرضين مهمين، الأول بعنوان "أفشتك" في الحرم اليوناني بالجامعة الأمريكية وهو عرض ثلاثي الأبعاد 3D يشارك فيه الجمهور، العرض من إخراج أحمد الألفي وسعر التذكرة: 30 جنيه مصري، وممكن شراء التذكرة من هنا. كما يقام يوم 9 عرض آخر الساعة 5 مساءً. 

مسرح روابط فيه عرض مسرحي بعنوان "صح النوم" وهو عرض مونودرامي مأخوذ عن عن النص الإيطالي "نوبة صحيان". العرض تمثيل وإخراج: دعاء حمزة. سعر التذكرة 10 جنيه. 

برنامج متميز لدار الأوبرا المصرية في الموسم الصيفي، النهارده حفل ريسيتال فلوت بمعهد الموسيقى العربية للفنانة إيناس عبد الدايم. التذاكر متاحة بشباك الحجز، للاستعلام اتصل بـ 27390132 – 27390188. 

على المسرح الكبير ممكن تتفرج على أوبرا "توسكا" وهي من تأليف الموسيقار الإيطالي بوتشيني. التذاكر متاحة بشباك الحجز، ممكن تجضر العرض النهارده أو بكرة اللي هـ يبقى آخر يوم للعرض. 

نروح لساقية الصاوي وحفل فرقة بساطة في قاعة الحكمة، الفريق بـ يقدم أغاني مصرية معاصرة، ومش محتاجين نقول لكم روحوا بدري واحجزوا أماكنكم لأن فرقة بساطة جمهورها كبير وحفلاتهم بجد رائعة. سعر التذكرة 20 جنيه. 

يوم الجمعة يقام حفل بقاعة الحكمة في ساقية الصاوي لفرقة "ستورم باند" والذي تأسس علي يد اثنين من الموسيقيين وانضم إليهم مجموعة من الشباب السكندريين، وده سنة 2009. ويعمل ستورم باند علي إنتاج أصوات جديدة من الموسيقى الشرقية المعاصرة للتعبير عن أزمات الإنسان المصري المعاصر. سعر التذكرة 20 جنيه. 

يوم السبت في مؤسسة دوم هـ يبقى فيه حفل للمداح ربي زين محمود، واللي هـ يغنّي أبيات صوفية في الحب الإلهي للشاعر الصوفي الكبير ابن الفارض (سلطان العاشقين)، اللي بـ يتسم شعره بفلسفة تتعلق بما يسمى "وحدة الوجود". الدعوة عامة. 

في نفس الميعاد في كايرو جاز كلوب هـ يبقى فيه حفل لموسيقى المواويل والغناء الشعبي. يرجى الحجز مسبقًا، الدخول للـ Couples فقط ولا يسمح بالدخول لأقل من 25 سنة، ويغلق باب الدخول باكتمال العدد. 

تابع أجندة كايرو 360 المتخمة بالفعاليات ونشاطات طوال الأسبوع، وما تنساش أنك ممكن ترسل الأحداث الخاصة بك وننشرها على صفحات الموقع ونخلي الناس تيجي لحد عندك. أجازة ظريفة للكل إن شاء الله.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
08/05/2014
-