جوائز اختيارات المحررين لعام 2014 لأفضل الفنادق فى القاهرة - الحياة في كايرو Feature - كايرو 360
 







جوائز اختيارات المحررين لعام 2014 لأفضل الفنادق فى القاهرة
جوائز اختيارات المحررين لعام 2014 لأفضل الفنادق فى القاهرة
اصدرت في: 18/06/2014

ما نقدرش ننكر أن السياحة فى مصر تأثرت جدًا الكام سنة الأخيرة، وعانت الكثير من الفنادق فى القاهرة زينا بالضبط بسبب الأحداث، لكن على الرغم من كل ده قدر البعض منهم الصمود بتقديم تسهيلات، ومطاعم تجنن، وأماكن للسهر والهروب من زحمة الحياة والاستمتاع بيوم فى الشمس جنب حمام السباحة.
الفنادق دي وسط كل الظروف قدرت تقف صلبة وتثبت أنها مكان للرفاهية والضيافة على أعلى مستوى وأنها وصلت للتوقعات المرجوة منها.

 

فندق ماريوت القاهرة وكازينو عمر الخيام - Cairo Marriott Hotel & Omar Khayyam Casino

ناس كثير ما تعرفش أن المكان تم بناؤه في الأصل علشان يكون قصر الخديو إسماعيل سنة 1869 في موقع فريد في جزيرة الزمالك. المبنى الأثري الرائع بـ يحوي بين جدرانه كثير من الأصالة والطابع التاريخي غالب على كل تفاصيله، هو باختصار واحد من أهم الفنادق العالمية في القاهرة اللي بـ يجمع بين العراقة والحداثة والمستوى الراقي للخدمات.

 

دوسيت ثاني ليك فيو - Dusit Thani LakeView

طبيعي أننا نشوف مكان جديد بـ يفتح كل يوم في القاهرة الجديدة، بس أي مكان يفتح يبقى بنفس مستوى فندق دوسيت ثاني المبهر. فندق دوسيت ببحيرته الشهيرة والطابع الآسيوي اللي مش بـ ينافسه فيه حد في مصر قدر يحفظ مكانته الخاصة كواحد من أجمل بقاع القاهرة، وبـ يضم مجموعة من أفضل المطاعم وأماكن السهر. 

 

فيرمونت هليوبوليس – Fairmont Heliopolis

مش مجرد فندق، ده بـ يضم أكثر من 18 مطعم وكافيه وبار، يعني مكان مثالي لقضاء الوقت والخروجات والعزومات الراقية وعشاء العمل وغيرها من المناسبات، فيرمونت قريب من مطار القاهرة الدولي، وبـ يضمن مستوى متميز من الخدمات والتسهيلات، والأهم من كده أن إدارة الفندق بـ تبذل مجهود ملحوظ في تطويره كل يوم، للحفاظ على المكانة المتقدمة اللي وصل لها وسط الأفضل في القاهرة.

 

فيرمونت نايل سيتي – Fairmont Nile City

بمنظر خرافي على النيل وحمام سباحة خيالي على الروف من فوق ومجموعة من أجمل المطابخ العالمية وأماكن السهر المتنوعة، فيرمونت نايل سيتي من أكثر الفنادق اللي عليها إقبال ومحبوبة في العاصمة، مش بس علشان الخدمة الفندقية الراقية، لكن كمان لأنه من أحسن الأماكن المغرية لمنظمي الحفلات والفنانين، ودائمًا هـ تلاقى جدول العروض مزدحم هنا طوال السنة.

 

فندق فورسيزونز نايل بلازا – Four Seasons Nile Plaza

هنا فيه أكبر سبا موجود في القاهرة، وعدد محدود من المطاعم واللاونج، سهل أنك تلاحظ البساطة المحببة للنفس في كل تفاصيل المكان، فورسيزونز نايل بلازا في جاردن سيتي مختلف عن باقي الفنادق بأنه بـ يضعك في تجربة استثنائية مش هـ تلاقي زيها في أي فندق ثاني في العاصمة، معتمدًا على نقطة البساطة والأناقة في نفس الوقت.

 

فورسيزونز فيرست ريزيدنت - Four Seasons First Residence

المبنى العريق الموجود في في فيرست مول بنهاية شارع مراد بالقرب من ميدان الجيزة، مش شبه أي فرع ثاني لباقي فنادق الفورسيزونز، فخامة وأصالة من طراز خاص، بسلاسة بـ يجمع بين سحر الشرق والخصائص المصرية، والمستوى العالمي للخدمة الفندقية للفورسيزونز.

 

سميراميس أنتركونتنينتال - InterContinental Semiramis

واحد من 3 فنادق موجودين في منطقة جاردن سيتي في القائمة دي، فندق سميراميس موجود في موقع خيالي على مدخل الحي الراقي من ناحية الكورنيش، موقع مثالي للسائحين والأجانب يشوفوا منه كل جماليات القاهرة وسحرها. فيه حمام سباحة رائع على الروف ومجموعة من أرقى المطاعم وأماكن السهر الحاصلة على جوائز محرري كايرو 360 السنة دي، أكيد سميراميس مكان مش عادي.

 

جي دبليو ماريوت – JW Marriot Hotel

أحدث الفنادق الموجودة بالقائمة، موجود على الطريق الدائري عند مدخل القاهرة الجديدة، قريب من مناطق مصر الجديدة ومدينة نصر والقطامية، وزادت شعبيته بشكل كبير في سنين عمره القصيرة. هنا ممكن تلعب جولف وتشوف مساحات شاسعة من الأراضي الخضراء، وعلشان كده أصبح واحد من أهم الأماكن اللي عليها العين في إقامة الحفلات والأفراح والفعاليات الضخمة. هنا فيه 3 حمامات سباحة ومطاعم عالمية كثير وخدمة ممتازة تليق بأحدث فنادق العاصمة.

 

فندق كبمنسكي – Kempinski Nile Hotel 

متأثر بشدة بالطابع الأوربي، وبـ يجمع بين شياكة الأماكن الصغيرة حجمًا وجودة وعظمة السلسلة العالمية. كمبنسكي نموذج حي على فكرة أن الأشياء البسيطة هي أكثر الأشياء جمالًا، فيه سبا رائع ومطعم "عثمانلي" التركي غير العادي، اثنين من أهم أيقونات الفندق الحديث نسبيًا.

 

ألف مبروك للفائزين!

مزيد من الصور
  • جوائز اختيارات المحررين لعام 2014 لأفضل الفنادق فى القاهرة
  • جوائز اختيارات المحررين لعام 2014 لأفضل الفنادق فى القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
18/06/2014
-