دليل أحداث نهاية الأسبوع: حفل عبد الله المنياوي، وورش رقص هيب هوب وهندي ورسم علاجي، وعروض مسرح - الحياة في كايرو Feature - كايرو 360
 







دليل أحداث نهاية الأسبوع: حفل عبد الله المنياوي، وورش رقص هيب هوب وهندي ورسم علاجي، وعروض مسرح
دليل أحداث نهاية الأسبوع: حفل عبد الله المنياوي، وورش رقص هيب هوب وهندي ورسم علاجي، وعروض مسرح
اصدرت في: 26/06/2014

كل رمضان وأنتم طيبين.. خلاص العد التنازلى لشهر كريم علينا وعليكم يا رب، الأحداث الثقافية أنتم عارفين بـ يكون لها طابع خاص وفيه أماكن كثيرة بـ تحاول تشد الناس من أمام التليفزيون وتقدم عروض وحفلات قوية، هـ نقول لكم ممكن تروحوا فين الويك إند ده، وتابعوا معانا يوميًا علشان تعرفوا الجديد:

نبدأ بالنهارده طبعًا الخميس فيه معرض ممتد لحد يوم 1 يوليو بعنوان "آمين.. دعاء من أجل العالم" بدار الأوبرا المصرية في جاليري الباب تنظمه منظمة "كارافان" بالتعاون مع سوديك مصر، ويتناول المعرض الذي يضم عدة فنانين من مصر وواشنطن موضوع التعايش السلمي بين الأديان، والدعوة عامة.

فيه كمان ورشة من نوع خاص للرسم العلاجي بمؤسسة دوم، وده فن اسمه "الزنتانجل"، بـ يساعد على الاسترخاء من خلال تكرار أنماط من الخطوط المتداخلة والمتناغمة. الفئة العمرية للورشة: 18+ سنة، ولا يشترط إجادة الرسم. الورشة مكونة من 5 محاضرات على مدار شهر. وسعر الورشة 300 جنيه.

كمان على مسرح الجنينة فيه حفل لعبد الله المنياوي، وهو شاعر ومنشد صوفي من مدينة الفيوم، أقام العديد من العروض في القاهرة والإسكندرية. سعر التذكرة 10 جنيه غير شاملة سعر تذكرة الدخول لحديقة الأزهر.

لو رحنا للمسرحيات اللى مش بـ تكون موجودة بكثافة زي الحفلات والمعارض، أول عرض فى مسرح الهناجر اسمه "عيش أنت...أو ضحك السنين" وهو نتاج ورشة الارتجال لأعضاء الفريق، العرض من إخراج شادي الدالي، وسعر التذكرة 10 جنيه، والعرض كمان مستمر لبكرة الجمعة.

المسرحية الثانية راقصة على مسرح الجزويت بعنوان "أبواب نورا: باب المكاشفة" ضمن احتفال فرقة "لاموزيكا" المسرحية المستقلة بمرور 15 عام على تأسيسها، العرض مستوحى من المشهد الأخير من "بيت الدمية" لهنريك إبسن، الدعوة عامة، وبرضه العرض ده مستمر لبكره الجمعة.

نيجي بقى ليوم الجمعة شخصيًا، تحس أنه يوم المعارض والورش العالمي من كثرها، أول معرض فى جيبسم جاليري بعنوان Vacuum Formed للفنان طه بلال، ويضم العديد من الأعمال الفنية المستخدم فيها الكتب والمجلات القديمة، ومستمر لحد 10 يوليو.

المعرض الثاني لجماعة "ممر" بجاليري المشربية، يضم ثلاثة فنانين هم أحمد قرعلي، وحسن كامل وهشام كامل، وهم مؤسسي جماعة "ممر" الفنية، مجموعة من النحاتين المصريين تسعى إلى الاعتماد الكلي على المصادر المحلية وتأصل المفاهيم الوطنية في تاريخ العمارة المصرية من وجهة نظر فنية. الدعوة عامة وبرضه مستمر لحد 10 يوليو.

بالنسبة للورش فيه أربعة جامدين جدًا، أول واحدة كانت للرسم بالخط العربي فى مكتبة ديوان مصر الجديدة يقدمها الفنان حاتم عرفة، سعر الورشة 330 جنيه، ثاني ورشة لتعليم رسم الأنيمي بمكتبة "أ" مصر الجديدة تحت إشراف الأستاذة نسمة الحسيني، ومتاحة للأطفال من سن 14 سنة، وقيمتها 250 جنيه شاملة الأدوات والمادة العلمية.

نيجي بقى لورش إحنا شخصيًا بـ نحبها هى الرقص، فى ميزان هـ يقام ورشة رقص هندي، سعر الورشة 300 جنيه، والثانية لتعليم رقص الهيب هوب والبريك دانس للأطفال بمركز شبابيك، سعر الورشة 400 جنيه.

نروح على يوم السبت، ومن الثوابت اللى بـ تيجي على دماغنا على طول لما نذكر السبت هو حفل التنورة بوكالة الغوري اللى بـ يقيمه صندوق التنمية الثقافية، العروض لها طابع خاص فريد في نوعه بمصاحبة الآلات الموسيقية الشعبية والمنشد الشعبي، حفلة ما تتفوتش والدعوة عامة.

وفى دار الأوبرا حفل أوركسترا القاهرة السيمفوني على المسرح الكبير، التذاكر متاحة بشباك الحجز، لو عاوزين تستفسروا عنها اتصلوا بـ 27390132 - 27390188.

أما فى مكتبة البلد هـ يكون فيه حفل توقيع لكتاب "خرابيش" للكاتب يسري المصري، وكمان فى الحرم الجامعى بالجامعة الأمريكية فى القاهرة الجديدة معرض "شارع المتنبي يبدأ هنا"، ويضم المعرض 54 كتابًا فنيًا يخلّد ذكرى شارع المتنبي ببغداد. الدعوة عامة.

فيه أحداث ثقافية وفنية ثانية لو حابين تعرفوها ممكن تدخلوا على صفحة أجندة كايرو 360 بشكل يومي، الأجندة بـ يتم تحديثها يوميًا، خاصة أننا داخلين على رمضان وهـ يكون فيه أحداث خاصة بالشهر الكريم.. وكل رمضان وأنتم طيبين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
26/06/2014
-