دليل أحداث نهاية الأسبوع: مسرح عرائس الساقية وحفل لفرق أولاد بهية والطنبورة وعروض الأراجوز وخيال الظل - الحياة في كايرو Feature - كايرو 360
 







دليل أحداث نهاية الأسبوع: مسرح عرائس الساقية وحفل لفرق أولاد بهية والطنبورة وعروض الأراجوز وخيال الظل
دليل أحداث نهاية الأسبوع: مسرح عرائس الساقية وحفل لفرق أولاد بهية والطنبورة وعروض الأراجوز وخيال الظل
اصدرت في: 03/07/2014

أول أسبوع من رمضان بدأ، والأسبوع ده بـ يُترجم عندنا المصريين بالتجمعات العائلية والعزومات واللمة، وبالتالى الأحداث الثقافية والفنية مش كثيرة، ده غير أن الخيم الرمضانية بـ تسرق الأضواء طوال الشهر من المراكز الثقافية، وعلشان كده بـ يتنافسوا أنهم يقدموا حاجات جديدة ومختلفة، هـ نستعرض معاكم إيه الأحداث أو الأماكن اللى فيها حفلات أو مسرحيات علشان تقرروا هـ تروحوا فين..

نبدأ بالنهارده الخميس فيه عرض مسرحي "ماك... بث مباشر" بمركز الإبداع الفني، وده مستمر لحد يوم الاثنين القادم، العرض في إطار برنامج ليالي رمضان اللي بـ ينظمه قطاع صندوق التنمية الثقافية خلال شهر رمضان المعظم، العرض أحدى الرؤى الجديدة لرواية "ماكبث" للكاتب وليم شكسبير، والتي يقدمها طلبة أقسام الإخراج والديكور والملابس بستوديو مركز الإبداع تحت إشراف المخرج خالد جلال، الدعوة عامة.

وكعادة أول خميس من كل شهر عودتنا ساقية الصاوي بعرض "أم كلثوم تعود من جديد" اللى بـ يقدمه مسرح الساقية للعرائس بقاعة الحكمة بأغانى جديدة للست أم كلثوم كل شهر، سعر التذكرة 5 جنيه لأعضاء الساقية، ولغير الأعضاء 15 جنيه.

نيجي بقى لمؤسسة دوم اللى هـ تقيم حفل لفرقة "أولاد بهية" اللى بـ يقدموا لون مميز من الغناء الدرامي التفاعلي، فى حين أن فى مسرح الضمة فيه حفل برضه بس لفرقة الطنبورة اللى تأسست في مدينة بورسعيد عام 1989 وبدأت بنواة من فناني "الصحبجية" القدماء اللى أرادوا جمع وحفظ تراث بورسعيد الشعبي المهدد بالضياع. أسعار التذاكر: 30 جنيه للفرد و20 جنيه للفرد في الأسر والعائلات.

ننتقل إلى يوم الجمعة مع مركز إبداع بيت السحيمي وعرض الأراجوز وخيال الظل، من تقديم أعضاء فرقة ومضة: عم صابر المصرى شيخ لاعبي الأراجوز في مصر، ومصطفى الصباغ، وعلي أبو زيد، وتأليف وإخراج د. نبيل بهجت، الدعوة عامة.

ومنها إلى مركز ثاني تابع لصندوق التنمية الثقافية هو قصر الأمير طاز هـ يقيم عرض بعنوان "عن العشاق"، وهو مأخوذ عن كتاب "طوق الحمامة" لابن حزم، كما يتضمن العرض مختارات من أغنيات لكوكب الشرق أم كلثوم، الدعوة عامة.

نختم بيوم السبت اللى مش فيه فعاليات كثيرة أوى، بس فيه معارض كثيرة جدًا ممكن تعرفها من أجندة كايرو 360، فيه حفل لفرقة "تراث سيد درويش" بقصر الأمير طاز، والدعوة عامة.

كل سنة وأنتم بخير، لو أنت مش مخطط أنك تخرج الويك إند ده ممكن تدخل على دليل كايرو 360 للتليفزيون فى رمضان اللى نشرنا فيه كل القنوات والمواعيد بتاعة عرض الملسلسلات والبرامج كلها.. مشاهدة طيبة!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
03/07/2014
-