دليل كايرو 360 للقضاء على اكتئاب أهل القاهرة - الحياة في كايرو Feature - كايرو 360
 







دليل كايرو 360 للقضاء على اكتئاب أهل القاهرة
دليل كايرو 360 للقضاء على اكتئاب أهل القاهرة
اصدرت في: 27/08/2014

كتير مننا بـ يمر بظروف صعبة تخليه يكتئب وأعصابه تبقى تعبانة ويبدأ يقفل على نفسه قوقعته وينعزل عن الناس أو حتى يبقى وسطهم بس كأنه مش معاهم هو منشغل بهمومه، ويبدأ يدخل في مراحل متقدمة من الاكتئاب.. ليه كده طيب!

طبعًا نسب الانتحار عندنا في بلادنا العربية مش كبيرة علشان الدين بالأساس اللي بـ ينظم أدق تفاصيل حياتنا ومشاعرنا لو فهمناه وطبقناه صح.

المهم إحنا جايبين لك النهارده مجموعة نصائح من الشرق والغرب تساعدك أنك تطلق الاكتئاب مبدأيًا كده "لا حياة مع الروتين ولا روتين مع الحياة".. الروتين فيه سمُ قاتل.

 

اتجنن...والضحكة هـ تبقى ضحكتين

مثلًا تشتري بلالين وتطيرها من على الكوبري أنت وأخواتك أو أطفال عيلتك،أو تجيب أكل بـ تحبه وتتبرع به لحد جعان ومعاهوش فلوس (مش صاحبك.. ها؟..صحيح هو غلبان برضه بس فيه ناس غلبانة أكثر)، تجيب فيلم كارتون وتروح تتفرج عليه في أقرب دار أيتام جنبك، تتعلم باراشوتينج أو سكاي دايفنج، تكتب أجمل 10 حاجات حصلت لك في اليوم خليتك راضي، تعزم حد من أصحابك أو أهلك على الأكل النهارده، وممكن تشوف أماكن جديدة عندنا هنا. تأخد عربيتك وتغني بصوت عالي جدًا وأنت سايق (في مكان غير معمور علشان الناس ماتدعيش علينا بس).

 

ثبت ربع ساعة في اليوم للتأمل

ربع ساعة مش هـ تأخد من وقتك كتير خالص أول ما تصحى الصبح، تربع رجليك وتأخد نفس عميق وتخرجه، بس تأخده بقوة وتملأ بطنك به وتخرجه بالراحة خالص كأنك بـ تنفخ شمعة بالراحة، وتكرر النفس ده من 10 مرات لـ 25 مرة لحد ما تحس أن دماغك فضيت خالص وبدأت تنمل (ده في الأول بس).

بعد كده ممكن تبدأ تتأمل في المكان اللي حولك (لو أنت في مكان مفتوح)، أو ممكن حتى تفكر في نفسك، عمرك مرة بصيت لأيدك وتخيلت لو أن ربنا خلقك من غير صوابع، كنت هـ تعمل إيه؟ أبسط حاجة ما كنُاش هـ نعرف نكتب.

 

لازم تعمل رياضة

الرياضة حاجة مهمة جدًا في حياتنا وبـ تحسسنا بالسعادة والإنجاز، فيا ريت لو تثبت يوم أو يومين في الأسبوع تعمل أي نوع رياضة بـ تحبه أو حتى تشترك في الجيم مع مدرب طبعًا.

 

اشرب شاي إكليل الجبل (روزماري)أو كاموميل بالليمون

 15 جرام من شاي إكليل الجبل (روزماري) مع لتر مياه بـ يساعد في التغلب على الكثير من الأمراض منها الاكتئاب والقلق. كمان الكاموميل بالليمون بـ يعالج أمراض كتير منها السرطان والبرد، وبـ يفتح البشرة، وبـ يهدي الأعصاب جدًا، ويمنع الاكتئاب.

 

لازم تنام كويس

لما الإنسان مننا ما بـ ينامش كويس بـ يبقى عامل زي الزومبي.. كائن يتحرك على الأرض بمفعول المنبهات، وده طبعًا بـ يؤثر على جهازك العصبي وعلى نفسيتك.

يبقى نحاول ننام كويس حتى لو في فترة الدنيا بـ تبقى ملخبطة مع حبة إصرار هـ تضبط بعد فترة، وخلي بالك اوعى تنام وأنت زعلان من حد أو حد زعلان منك، ما حدش ضامن عمره أو عمر اللي بـ يحبه.

 

نظف دماغك أول بأول، وفكر في الجمال والحب

الواقع بطبيعته بـ يقتحم أفكارنا وآمالنا وطموحاتنا ولو ما تحكمناش في الأفكار اللي بـ نفكر فيها هـ نبص نلاقي فجأة فيه حياة مختلفة 180 درجة عن أي حاجة كنا بـ نتمناها.

قبل ما تنام وأنت حاطط دماغك على المخدة كده، فكر إزاي ربنا كان بـ يحبك النهارده وبـ يعمل لك الحاجات اللي بـ تفرحك أو بـ يعلمك إزاي أنت محتاج له بأنه بـ يستطرد نعمه عليك اللي هو سبحانه مش مجبر يعطيها لك أصلاً.. ده كرم منه.

يا إما بمُصيبة أنقذك من أنك تقع فيها، أو رزقك بطفل صغير يضحك لك، أو ممكن حتى أنك تكون شوفت سرب عصافير مروح على عشة فافتكرت أن زي ما ربنا رزق العصافير دي وروحت فرحانة، هـ ييجي لك يوم وتبقى مندهش من عطاء ربنا لك وتفرح أنت كمان.

 

فكر في كل نفس أنت بـ تتنفسه على أنه فرصة جديدة

افتكر دايمًا أن كل نفس أنت بـ تتنفسه مش هـ يرجع تاني، ومن جمال ربنا علينا أنه خلى في كل نفَس حب وبركة ونور، كل نفَس بـ يبقى معجزة إلهية لوحدها، حتى لو هـ نأخدها من منظور علمي، التنفس هو عملية شهيق وزفير، ودخول الأكسجين الرئتين وخروج ثاني أكسيد الكربون. بس مين اللي فهَم الرئة أنها المفروض تتنفس أكسجين مش أي حاجة تانية وتطلع ثاني أكسيد الكربون مش أول أكسيد الكربون مثلًا؟ كل نفس بـ نتنفسه ربنا بـ يعلمنا فيه إزاي نصبر ونحلم، فـ نتأكد من حبه لنا أكتر من نفسنا، لحد ما نبقى بـ نحب اللي هو بـ يختاره لنا أكتر من اللي إحنا بـ نختاره ونرجع نندم بعد كده.

كل نفَس جنتك الخاص فاختار كويس قوي اللي هـ يدخل جنتك دي وفكر في الحب والجمال، وكل لما تيجي أفكار مؤلمة أو حزينة في دماغك افتكر دايمًا أن لولا وجود الحب ما كناش عرفنا يعني إيه كره، ولولا وجود البشاعة ما كناش قدرنا قيمة الجمال، ولولا وجود القهر ما كناش فهمنا يعني إيه حرية. كمان لو جربت تصلي من قلبك كل يوم بحب وتخلي كل حاجة بـ تعملها في حياتك بحب حياتك هـ تنور، وهـ تطرد أي شبح لاكتئاب.

 

صندوق السعادة

اعمل صندوق تحط فيه كل حاجة أنت بـ تحبها: شوكولاتة، ومصاصات، وبونبوني، وصور لذكريات حلوة، وورد، وكلام عجبك خلاك غيرت في حياتك، وأحلام بعيدة نفسك تحققها في يوم من الأيام، وناس فارقوك وعرفت بعد كده أنه كان الأحسن أنهم يفارقوك، وناس جديدة علموك معاني غالية قوي بصحبتهم، وناس بـ نحبهم سابوا الدنيا بس حفروا جوانا قيم ومبادئ بـ نكمل بها حياتنا، اللي بـ ترسم على وجوهنا ضحكة الحنين لهم.

الصندوق ده اللي بـ تملأ منه بطاريتك قبل ما تفضى بشوية، كل ما تبقى متضايق تفتحه وتفتكر أن زي ما ربنا رزقك بكل الحاجات دي اللي تمنيتها ولقيتها، أكيد ربنا هـ يرزقك باللي تمنيته وأحسن منه كمان، عطاء ربنا مالوش حدود، واستجابة ربنا لدعائنا وأمانينا مش دايمًا بـ نفهمها صح، لكن دائمًا وأبدًا هو بـ يدبر الأفضل والأجمل والأحلى.

 

اضحك للدنيا تضحك لك!

مزيد من الصور
  • دليل كايرو 360 للقضاء على اكتئاب أهل القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
27/08/2014
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.