دليل أحداث نهاية الأسبوع: حفلة إسكندريلا والتنورة وعرض الأراجوز وخيال الظل - الحياة في كايرو Feature - كايرو 360
 







دليل أحداث نهاية الأسبوع: حفلة إسكندريلا والتنورة وعرض الأراجوز وخيال الظل
دليل أحداث نهاية الأسبوع: حفلة إسكندريلا والتنورة وعرض الأراجوز وخيال الظل
اصدرت في: 11/09/2014

كل إنسان بـ يسعى أن حياته تكون مفيدة، يستفيد من كل لحظة فيها ويتعلم، فيه مننا ناس بـ تتعلم من الكتب، وناس بـ تتعلم من الحياة بالتجربة، وناس كل غذائها الفن بـ تتعلم منه وتعلمه.

النهارده الخميس مركزين على الأعمال الفنية الخالصة، نبدأ "بمعرض وجوه" للفنانة الروسية ناتاليا بايكالوفا في دار الأوبرا المصرية، والدعوة عامة، وبعد كده لعشاق أفلام يوسف شاهين يعرض "فيلم الأرض" في سينما زاوية، ضمن فعاليات أسبوع إعادة اكتشاف التراث السينمائي اللي مستمر لحد 16 سبتمبر، واللي بـ يناقشوا فيه الفيلم بعد ما يشوفوه مع الجمهور.

ولو عاوز تتفرج على فن قديم قوي من زمان الزمان يبقى عليك بحفلة "المولوية المصرية" في ساقية الصاوى، وسعر التذكرة 30 جنيه. كمان الساقية عاملة "حفلة لفرقة ضحكة" اللي بـ تتميز بأغانيها المعاصرة وسعر التذكرة 20 جنيه.

لكن لو عاوز تتعلم حاجة جديدة روح "مهرجان من فات قديمه تاه" في بيت السناري، اللي بـ يعرض الكثير من الحرف الشعبية وعامل ورش اليوم ده لتعليمها، زي الخيامية والنحاس وفن الخزف والحلي.

ننتقل ليوم الجمعة الناس اللي بـ تحب خيال الظل وبـ يلعبوا به، هـ يستمتعوا جدًا لأن بيت السحيمي مستضيف فرقة ومضة في "عرض الأراجوز وخيال الظل".

وبعد غياب طويل رجعت "فرقة إسكندريلا"، تقدم لنا حفلة على مسرح الجنينة في حديقة الأزهر، وسعر التذكرة 20 جنيه غير شاملة تذكرة دخول الحديقة. ومن ضمن فعاليات أسبوع إعادة اكتشاف التراث السينمائي، بـ يعاد عرض فيلم "العصفور" ليوسف شاهين بسينما زاوية.

ونختم بيوم السبت في مركز إبداع وكالة الغوري اللى بـ يقدم لنا "حفلة التنورة" الصوفية والتذكرة بـ 5 جنيه. أما لمحبي الفنون المسرحية، قصر الأمير طاز مستضيف "مسرحية الحارة" وهي نتاج ورشة الموسيقى اللي تابعة للمركز والدعوة عامة.

كمان كايرو جاز كلوب عامل "حفلة لفرقة مشروع" يا ريت تحجز من قبلها، ولو سنك أقل من 25 سنة، فكر تروح مكان ثاني علشان مش هـ تعرف تدخل. لكن لو عاوز تعيش تجربة مختلفة روح "حفلة فرقة مشروع دروشة" بمركز الربع الثقافي، اللي بـ تمزج ما بين الموسيقى الشرقية والـ Progressive Rock/Metal، والتذكرة بـ 20 جنيه.

وكعادة مكتبة ديوان الزمالك باستضافة حفلات توقيع الكتب المتميزة، تستضيف الكاتب محمد عبد الكريم لـ "توقيع كتابه سبعة أرواح" واللي مرشح لجائزة البوكر.

ونختم بعرض استثنائي فني جدًا، العرض الفني المتكامل "لن تستطيع السباحة في مياه النهر مرتين" في بلكون لاونج، واللي بـ يجمع كل أنواع الفن من رسوم ونصوص وتسجيلات سمعية وصور فوتوغرافية وفيديو، واللي بـ يسجل بطريقة لحظية أنشطة الحياة اليومية ما بين العلاقات الشخصية والنظام الاقتصادي وتأثيره عليها، وسعر التذكرة بـ 30 جنيه.

دي مش كل أحداثنا الأسبوعية، لو حابب تعرف أكثر إحنا بـ ننشر أحداث كل يوم طوال الشهر، تقدر تعرفها من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
11/09/2014
-