دليل أحداث نهاية الأسبوع: حفل فرقة كايروكي ووسط البلد وإطلاق مجلة توك توك وعرض التنورة - الحياة في كايرو Feature - كايرو 360
 







دليل أحداث نهاية الأسبوع: حفل فرقة كايروكي ووسط البلد وإطلاق مجلة توك توك وعرض التنورة
دليل أحداث نهاية الأسبوع: حفل فرقة كايروكي ووسط البلد وإطلاق مجلة توك توك وعرض التنورة
اصدرت في: 18/09/2014

كل آخر أسبوع، الواحد بـ يحتاج أنه يفصل ويغير جو، يشوف ناس جديدة، أماكن جديدة، يستغل وقته على قد ما يقدر قبل ما يرجع للشغل، أو يرجع للمدرسة، دخول المدارس والجامعات خلاص على الأبواب، فيه ناس دخلت أساسًا، وناس بـ تحاول تستغل كل ثانية قبل ما تدخل دوامة الدراسة اللانهائية. للناس للي لسه ما دخلتش واللي بـ يحبوا يُحولوا كل ثانية في حياتهم لتجربة جديدة ركزوا في أجندتنا النهارده هـ تستمتعوا.

نبدأ بيوم الخميس، فاكرين في فيلم X-large لما أحمد حلمي عمل حفلة إصدار أول عدد من المجلة بتاعته بعد ما خس؟ عندك الفرصة أنك تحضر نفس حفلة الإصدار بس الـ 12 "لمجلة توك توك"، ده غير أنه فيه حفل إطلاق لعرض مرسوم مع الفنان أنديل، والدعوة عامة. لكن لو حابين تعيشوا في جو الفن المميز وتتعلموا حاجة جديدة، تحرير لاونج عاملين ندوة عن فن خيال الظل، إزاي نشأ ومراحل تطوره عبر التاريخ، واللي بـ يتكلم في الندوة دي أ. أميرة سليمان مصممة ومتخصصة في الفن الشعبي، وأ. أيمن حمدون الفنان التشكيلي والمتخصص في الفن الشعبي، وطبعًا الدعوة عامة. لكن لو عاوز تحضر حاجة فعلًا مختلفة، روح معرض مملكة الشخصيات بمركز الجزيرة للفنون، واللي بـ يعرض نوع من أنواع الثقافة اليابانية الثانوية في فنون الأنيمي (الرسوم المتحركة) والمانجا (القصص المصورة)، وخلي بالكم أن مواعيد المعرض كل يوم من 10 صباحًا: 2 مساءً، ومن 5 مساءً: 10 مساءً، ماعدا الجمعة.

ولمحبي موسيقى الجاز الكلاسيكي، كايرو جاز كلوب عاملة حفلة لفرقة Band The Riff، التذكرة بـ 10 جنيه، ويا ريت تحجز من قبلها، وطبعًا أنتم عارفين أن الدخول للأزواج فقط من بعد سن 25 سنة. أما لو عاوز تحضر أمسية شعرية لشعر ساخر باللغة الإنجليزية، وتغير مودك وتضحك، ما تفوتش الأمسية الشعرية دي بديوان مصر الجديدة، كمان أنت لو بـ تعرف تكتب شعر ساخر ممكن تقرأه لهم هناك. والدعوة عامة.

وبما أن الفن بـ يخليك تعشق كل جميل، جرب تحضر حفلات مهرجان القاهرة الدولي لموسيقى الفلكلور "ونس" في ساقية الصاوي، واللي بـ تستضيف "فرقة مزامير النيل" "وفرقة الجركن البدوية" "والفرقة الفرنسية" "Lo cor de la Plana"، هـ تعشق فعلًا كل جميل عينك مش متعودة تشوف جماله، وسعر التذكرة 30 جنيه فقط. لكن لو عاوز تستمتع بالفن التراثي مع بعض التجديد، فيه حفلة "فرقة سداسي شرارة" بقصر الأمير بشتاك، والدعوة عامة.

أما يوم الجمعة بقى، عندك حفلة فرقة Looperia بروم آرت سبيس، واللي معروفة بأنها بـ تقدم موسيقى أفريقية مع كلمات عميقة صوفية. والدعوة عامة، وفرقة وسط البلد بـ ترجع لنا مع حفلتها على مسرح الجنينة بحديقة الأزهر، وسعر التذكرة 20 جنيه غير شاملة سعر تذكرة دخول الحديقة. كمان المهرجان القاهرة الدولي لموسيقى الفلكلور "ونس" عامل حفلة لفرقة "نوبانور" النوبية، وفرقة "دراويش أبو الغيط" الصوفية وبعد كده الفريق الإسكتلندي "Jarlath & Scotland Ross"، وسعر التذكرة 30 جنيه.

 لكن لو عاوز تستمتع بالفنون اللي بـ تفكرك بطفولتك، روح "عرض الأراجوز وخيال الظل" في بيت السحيمي. والدعوة عامة. ولمحبي الفنون الشكيلية فيه "معرض أنغام لونية" بقصر الأمير طاز للفنان مصطفى سمير جلال، والدعوة عامة.

ونختم بيوم السبت المفاجأة الكبرى وبعد غياب طويل "حفلة فرقة كايروكي"، هما قرروا يسعدونا ويسعدوا ملايين من مرضى سرطان الدم بحفلتهم في الحرم اليوناني، اللي هـ يحضره الكثير من المرضى والأصحاء للتخفيف من حمل المرض عليهم، وسعر التذكرة 50 جنيه. كمان فرقة وسط البلد عاملة حفلة في كايرو جاز كلوب، وأكيد حفظنا أننا لازم نحجز قبلها، والدخول للأزواج فقط لما فوق 25 سنة. لكن لو عاوز تستمتع بموسيقى العود الجميلة، "حفل ثنائي العود للفنان غسان اليوسف ودينا عبد الحميد" في قصر الأمير طاز، والدعوة عامة. أو ممكن تستمتع برضه بحفلة أوركسترا القاهرة السمفوني، واللي هـ تعزف فيها السيمفونية الثالثة والرابعة للموسيقار العالمي بيتهوفن. والتذاكر متاحة بشباك الحجز. ونختم اليوم "بحفلة التنورة" في وكالة الغوري، والتذكرة بـ 5 جنيه.

خلي كل يوم تجربة جديدة تضيف لحياتك بسمة وأمل في بكرة، وما تنسوش أننا بـ ننشر كل يوم أحداث جديدة طوال الشهر ممكن تشوفوها من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
18/09/2014
-