جيرلز جو ويلز: مكان بيعلم البنات استخدام الإسكوتر في القاهرة - الحياة في كايرو Feature - كايرو 360
 







جيرلز جو ويلز: مكان بيعلم البنات استخدام الإسكوتر في القاهرة
جيرلز جو ويلز: مكان بيعلم البنات استخدام الإسكوتر في القاهرة
اصدرت في: 18/10/2016

من النهارده ما حدش يقول للبنات ما تركبش سكوتر، "نعم للسكوتر.. ويسقط الخوف".

"ريشة ويا ريشة يكمل الجناح.. والله أحلى عيشة.. عيشة البراح".. الإنسان فضل يحلم بالطيران من قديم الأزل، لكن دلوقت هـ نقدم لكم طريقة الطيران على الأرض، للهروب من الزحمة والانتظار وتعب الأعصاب، مافيش أحلى من إحساسك أنك طاير من سرعتك على طريق سريع، "السكوتر" هو حلال المشاكل مؤخرًا ومنقذ المتأخرين دائمًا في مواعيدهم.

المشكلة الأزلية أنه على الرغم من أن الاختراع ده عظيم جدًا، إلا أننا علشان في مجتمع شرقي عظيم يمتاز بنظرته العنصرية للمرأة، ناس كثيرة مش متقبلة فكرة أن البنت تركب سكوتر، البعض بـ يخافوا على بناتهم يرجعوا لهم متكسرين، والبعض بـ يخافوا عليهم من الكلام الحمضان والتعليقات البايخة، بس الحقيقة أن Girls Go Wheels انتصرت على كل ده وعلى المعتقدات السلبية اللي في مجتمعنا، اللي ما زلنا بـ نحاول نفك شفرتها ونصلحها، Girls Go Wheels مجموعة شباب مكونة من بنتين وستة أولاد بـ يساعدوا أي بنت عاوزة تتعلم سكوتر من أول التدريب عليه لحد الرخصة والشراء وكل الأسئلة المبهمة عن عالم السكوتر وسواقته بشكل عام.

 

الموضوع بدأ إزاي؟

بسمة الجابري طالبة في سنة ثالثة كلية التجارة، ومؤسسة جروب Girls Go wheels واللي بـ تعلم البنات بنفسها إزاي تركب سكوتر بعد ما خاضت تجربة متعبة جدًا علشان تقنع أهلها أنهم يوافقوا في الأول، وبعد كده مرحلة الجري وراء أي معلومة تساعدها في الوصول لحلمها أنها تتعلم وتعمل رخصة للسكوتر.

كان أصعب عقبة أمامها أن الأهل يوافقوا، خاصة أنهم فرضوا عليها شرط بأنها لو لقيت ناس زيها ممكن يوافقوا أنها تركب سكوتر. وده اللي حصل فعلًا لما شافت جروب Cairo Scooters Club على الفيسبوك. واللي بـ يساعد ناس كثير جدًا في كل ما يتعلق بالسكوتر من أول يشتروه منين لحد أحسن الأنواع والأسعار، والمشاكل التقنية اللي بـ تواجهم، كمان بـ يتجمعوا ويلفوا بالسكوتر على الطرق السريعة.

والجروب ده عامل زي مجتمع صغير لكل اللي بـ يركبوا سكوتر، بـ يعملوا Rides سوا، بـ يختاروا طريق سريع وطويل زي مثلًا طريق مصر إسكندرية الصحراوي أو العين السخنة ويمشوا وراء بعض، والحقيقة أنها بـ تبقى ممتعة قوي، وأي حد بـ يحتاج يسأل عن أي حاجة تخص السكوتر بـ يجاوبوه.

 

أكبر التحديات

ولما سألنا بسمة عن التحديات اللي واجهتهم معتقدين من الطبيعي أن الشارع يرفض وجود أو شكل البنت وهي على السكوتر، بس الحقيقة إحنا تفاجئنا أن المشكلة الأساسية في الأهل، هم اللي بـ يرفضوا خوفًا على البنت، بس الناس في الشارع متقبلة وجود البنات على السكوتر على حسب كلام بسنت، فالبنت شريكة الرجل في الشارع مش من حقه أنه يقصره عليه، وإن كان على المعاكسات فدي بـ تفضل موجودة في أي وسيلة مواصلات إشمعنى لما تسوق السكوتر مش هـ يعاكسوها!

ساعات المجتمع يخلينا نعتبر أبسط حقوق البنت جنان وتهور وعدم مسئولية، وأنها بمطالبتها بأبسط حقوقها أنها تمشي في الشارع من غير ما حد يضايقها وكأنها بـ تطلب طلب كبير من كبائر المجتمع المعيوب، وعلشان كده البنت قررت تكسر كل الحواجز دي وتستقل بذاتها وده شيء ملحوظ بقى له سنين، والسكوتر شكل من أشكاله.

الإحساس بالحرية والانطلاق والواحد راكب السكوتر مالوش مثيل، إحساس ممتع.. وقوي والإشارة واقفة وأنت بـ تكمل في الشارع وتوصل من آخر الشارع لأوله، وداعًا للتأخير على الشغل أو المحاضرات، ده حتى لو رحت مع عيلتك مكان وقررت تروح بالسكوتر وتسيبهم يأخدوا العربية، ممكن توصل وتأكل وتحلي وهم لسه بـ يركنوا بره، ده غير أن مشكلة الركنة انتهيت للأبد.

فريق Girls Go Wheels قرر يصنع الفرق ويساعد كل البنات اللي عاوزة تتعلم سكوتر، ويساعدها من الأول: تشتري نوع إيه، وإجراءات الترخيص، غير أنهم بـ يوفروا تدريب خاص للبنات وبـ يعلموهم يتفادوا أخطاء السائقين الثانيين إزاي.

هم بدأوا الموضوع من حوالي عشرة شهور وبدأوا يكثفوا التدريب من 3 شهور بس، وفيه معاهم بنات اتعلموا وبقوا يشاركوهم في الـ Rounds، وده كان حلم من أحلام بسمة، وفرحتها الحقيقية اللي بـ تشوفها في عيون كل واحدة بـ تسوق سكوتر، وبـ تكسر حواجز كثير جواها وجوه مجتمعها.

لو عاوزة تحققي حلم أنك تركبي سكوتر، ما تتردديش أنك تتواصلي مع أكونت Girls Go Wheels وعلى جروبهم على الفيسبوك.

دافعي عن قراراتك بحكمة وعقل وتحايل، مش كل حاجة بـ تيجي مرة واحدة، بس لو أهلك مش موافقين، بالوقت والإقناع ومهارات أخرى كل البنات عارفاها هـ يوافقوا طبعًا، ده لو ربنا كاتب لك فيه الخير، وربنا يحفظكم جميعًا من شر الطريق.

مزيد من الصور
  • جيرلز جو ويلز: مكان بيعلم البنات استخدام الإسكوتر في القاهرة
  • جيرلز جو ويلز: مكان بيعلم البنات استخدام الإسكوتر في القاهرة
  • جيرلز جو ويلز: مكان بيعلم البنات استخدام الإسكوتر في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
18/10/2016
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.