دليل أحداث نهاية الأسبوع: مهرجان الهند على ضفاف النيل وعرض بوليوود وحفل أنت الكبير والطنبورة - الحياة في كايرو Feature - كايرو 360
 







دليل أحداث نهاية الأسبوع: مهرجان الهند على ضفاف النيل وعرض بوليوود وحفل أنت الكبير والطنبورة
دليل أحداث نهاية الأسبوع: مهرجان الهند على ضفاف النيل وعرض بوليوود وحفل أنت الكبير والطنبورة
اصدرت في: 02/04/2015

كل أسبوع بـ يبقى عندنا مفاجأة مختلفة عن الأسبوع اللي قبله، والأسبوع ده هـ نسافر الهند، أيوة بس من غير لا تذاكر ولا فيزا ولا حتى شنطة سفر، بمجرد بس أنك تحضر الاحتفلات اللي الهند جات بنفسها علشان تنقل لك ثقافتها. إيه رأيك بقى؟

نبدأ بيوم الخميس ومهرجان الهند على ضفاف النيل، اللي هـ يقدم فيه مركز الإبداع الفني عرض لمجموعة من أفلام الفنان أميتاب باتشان، وهـ يعرضوا فيلم "أناند". كمان فيه عرض بوليوود على المسرح الكبير بدار الأوبرا المصرية، واللي بـ يضم العديد من الرقصات الهندية اللي بـ تتحدث عن الحب والانتقام. وأسعار التذاكر: 200 -150 - 100 جنيه لحفلات الثامنة مساءً.

أما بقى المزاج كله في مهرجان للمأكولات الشعبية الهندية اللي في مركز الهناجر للفنون، وهـ يضم العديد من الأسماء المشهورة في المجال ده واللي هـ تعرض منتجاتها بأسعار مناسبة، الدعوة عامة. لكن لو مالكش في الهندي، الفنون المصرية حلوة برضه، هـ تلاقي على مسرح الضمة حفل لفرقة الطنبورة، وأسعار التذاكر: 30 جنيه عند الدخول و20 جنيه عند الحجز مسبقًا.

كمان فيه معرض حلو جدًا للآلات الفلكية في الحضارة الإسلامية في ساقية الصاوي، واللي هـ يضم العديد من اللوحات والمجسمات اللي بـ تشرح الآلات الفلكية في الحضارة الإسلامية، والدعوة عامة. واللي هـ يستمر ليوم الخميس 9 أبريل.

أما لو عاوز تتجنن تمامًا وتنبسط، لازم تجرب مهرجان Rush للرياضات الصديقة للبيئة في ماجيك ليك الفيوم، الرياضات المتعلقة بالتفاعل المباشر مع الطبيعة زى التزحلق على الرمال، التجديف وركوب الدراجات. ده غير الأنشطة الثانية زي ورش عمل لليوجا. والمهرجان مستمر ليوم السبت 4 أبريل.

ننتقل ليوم الجمعة، وبـ نكمل مهرجان الهند على ضفاف النيل، وعرض الفيلم "بلاك" للفنان أميتاب باتشان في مركز الإبداع الفني، واحتفالًا بيوم اليتيم هـ يبقى فيه في الحرم اليوناني حفل بعنوان "أنت الكبير"، وهـ يكون كل فرد من الحضور مسؤول عن طفل يتيم طوال اليوم. واللي هـ يحيي الحفل الفنان حمزة نمرة. وسعر التذكرة 80 و100 جنيه (للصفوف الأمامية)، وهـ يتم التبرع بجزء منها لصالح الأيتام.

وفي ساقية الصاوي في قاعة النهر برضه احتفالية بيوم اليتيم هـ يعملها مسرح الساقية للعرائس، بعرض مسرحية بعنوان "يوسف وسره الكبير" وهي من تأليف وإخراج محمد الصاوي، والدعوة عامة. وكعادة كل جمعة ما نقدرش ننسى عرض الأراجوز وخيال الظل في مركز إبداع بيت السحيمي، والدعوة عامة.

ونختم بيوم السبت، ومهرجان المأكولات الشعبية الهندية هـ يبقى في حديقة الأزهر، غير اللي هـ يتعمل كمان في مركز الهناجر في الأوبرا المصرية، والدخول مجانًا، إلا سعر تذكرة حديقة الأزهر.

وعلى المسرح الصغير بدار الأوبرا المصرية فيه حفل موسيقي لفرقة Advaita الهندية، وده ضمن فعاليات مهرجان "الهند على ضفاف النيل". والتذاكر متاحة بشباك الحجز. ونختم كعادة كل يوم سبت بحفل التنورة في مركز إبداع وكالة الغوري والتذكرة بـ 5 جنيه.

ولو عاوز تعرف تفاصيل أكثر عن الأحداث اللي بـ ننشرها كل يوم على مدار الشهر تابع أجندتنا.

ويك إند سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
02/04/2015
-