دليل أحداث نهاية الأسبوع: حفل لنوبانور والطنبورة والأخوة أبو شعر وأوبرا إل تروفاتوري - الحياة في كايرو Feature - كايرو 360
 







دليل أحداث نهاية الأسبوع: حفل لنوبانور والطنبورة والأخوة أبو شعر وأوبرا إل تروفاتوري
دليل أحداث نهاية الأسبوع: حفل لنوبانور والطنبورة والأخوة أبو شعر وأوبرا إل تروفاتوري
اصدرت في: 14/05/2015

دائمًا فريق عمل كايرو 360 بـ يحاول يوفر لكم كل نهاية أسبوع أفضل الأحداث المهمة والممتعة، اللي تساعدكم تنبسطوا بالويك إند بتاعكم بعد أسبوع شغل طويل، ونتمنى أنكم تجدوا ده فعلًا في دليلنا.

نبدأ بيوم الخميس وحفل لفرقة "نوبانور" في مسرح الضمة واللي بـ تقدم مجموعة من الأغاني الشعبية النوبية. وسعر التذكرة عند الباب 30 جنيه، و20 جنيه عند الحجز المسبق.

وللناس اللي بـ تعشق أغاني زمان، هـ تلاقوا على مسرح الجمهورية حفل لفرقة الموسيقى العربية للتراث. والتذاكر متاحة بشباك الحجز. أما لو بـ تحب الموسيقى الكلاسيكية، فيه على المسرح الصغير بدار الأوبرا المصرية حفل ريسيتال لأمينة عز الدين وأماني منير. والتذاكر متاحة بشباك الحجز.

كمان لعشاق الفنون التشكيلية، اختارنا لكم من أجندتنا اللي مليانة معارض متنوعة، معرض "شوكولاتة المستقبل" في مدرار اللى بـ يعرض مجموعة من الأعمال الفنية المستخدم فيها فن الكولاج للفنانة هند سمير، والدعوة عامة.

وننتقل ليوم الجمعة، ونبدأ بالفولكلور البورسعيدي وحفل لفرقة "الطنبورة" على المسرح المكشوف في دار الأوبرا المصرية، والتذاكر متاحة بشباك الحجز.

وما تفوتكمش حفل الستاند أب كوميدي في تياترو المعادي، اللي بـ تقدمه فرقة "الحزب الكوميدي"، سعر التذكرة 35 جنيه. والجديد الأسبوع ده، هـ تلاقوا على مسرح الجنينة بحديقة الأزهر وحفل موسيقي للفنان الألماني رومان بونكا اللي بدأ حياته الموسيقية في فريق موسيقي يعزف الـ Jazz والـ Rock، ثم اتجه بعد كده لإنتاج مجموعة من الألحان المميزة على آلة العود. وسعر التذكرة 40 جنيه غير شاملة سعر تذكرة الدخول لحديقة الأزهر.

أما لو عاوز تستمتع بأجمل إنشاد ديني ما تفوتش حفل الفرقة السورية "الأخوة أبو شعر" اللي في ساقية الصاوي بقاعة النهر. وسعر التذكرة 25 جنيه لأعضاء الساقية و30 جنيه لغير الأعضاء. وكعادة كل يوم جمعة، ما نقدرش ما نذكرش عرض الأراجوز وخيال الظل في مركز إبداع بيت السحيمي والدعوة عامة.

ونختم بيوم السبت وعرض مسرح عرائس بعنوان "إبريق الشاي" للأطفال من سن 5 - 8 سنوات في مكتبة البلد. وهـ يبقى فيه نشاط يدوي للأطفال. وسعر التذكرة 30 جنيه.

ولمحبي الأوبرا فيه عرض تحفة على المسرح الكبير بدار الأوبرا المصرية أوبرا "إل تروفاتوري" للموسيقار الإيطالي فيردي. والعرض من تقديم فرقة أوبرا القاهرة وأوركسترا أوبرا القاهرة تحت قيادة المايسترو ديفيد كريشنزي وإخراج هشام التلي. وأسعار التذاكر 100 - 75 - 50 جنيه و75 - 50 - 35 جنيه للطلبة.

ولعشاق السينما خاصة الأفلام التسجيلية، فيه عرض في سينما زاوية للأفلام التسجيلية، وبعدها ندوة مع الكاتب والمخرج سمير عوف. والأفلام المعروضة هي "آفاق" لشادي عبد السلام، "فن العرائس" لتوفيق صالح. أما لسمير عوف هـ يعرض له "القاهرة 1830" و"وجهان في الفضاء". وسعر التذكرة 20 جنيه. وكالعادة نختم بحفل التنورة في مركز إبداع وكالة الغوري، والتذكرة بـ 5 جنيه.

لو عاوزين تعرفوا عن الأحداث اللي بـ ننشرها كل يوم على مدار الشهر، تابعوا أجندتنا.

ويك إند سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
14/05/2015
-