دليل كايرو 360 لمساحات العمل المشتركة Co-Working Spaces في القاهرة - الحياة في كايرو Feature - كايرو 360
 







دليل كايرو 360 لمساحات العمل المشتركة Co-Working Spaces في القاهرة
دليل كايرو 360 لمساحات العمل المشتركة Co-Working Spaces في القاهرة
اصدرت في: 14/06/2015

"إيه هي الحاجة الأصعب من التدوير على الأبرة في كومة القش؟".. في أحد برامج الكوميديا الرياضية طُرِح السؤال ده على الضيف خفيف الدم والروح.. وكانت إجابته مصحوبة بضحكة هادئة مباشرة: "أنك تدور على مركز ما ينفعش يلعب فيه الكابتن أحمد فتحي"!

والظاهر كده أن نموذج "الجوكر" شعشع في عقول كثير من رواد الأعمال في مصر.. وقال لك: ما تيجي كده نعمل المشروع بتاع كله!.. اللي هو تبقى مطمئن أنك هـ تعرف توظفه في مساحات كثير جدًا باختيارك، أو حتى غصب عنك في أوقات الزنقة.. يعني حاجة "أحمد فتحي" كده!

 

الـ "جوكر"!

لو جينا نبص كده على طبيعة المشروعات المرتبطة بمكان تتعامل فيه.. هـ تلاقيها دائمًا مختصة بمنتج معين بـ تقدمه من خلال المكان ده.. سواء المنتج ده كان سلعة بـ تُباع.. أو خدمة بـ تُقدم.. لكن الجديد بقى أن يبقى المنتج والخدمة هما المكان نفسه!.. يعني إيه الكلام ده؟

يعني إحنا دلوقت عاوزين مكان نمارس من خلاله نشاط معين.. أيًا كانت طبيعة النشاط ده،
ومش قادرين نوفر المكان بنفسنا.. يقوم ييجي بقى دور ما يسمى بالـ "Co-Working Spaces" أو مساحات العمل المشتركة وتقول لك: يا سيدي طلبك عندنا..

فلو –مثلًا- أنت طالب وعاوز تذاكر ومحتاج مكان مناسب للمذاكرة، أو صاحب مشروع وعاوز مكان تقدر من خلاله أنك تتواصل مع العملاء بتوعك ويبقى بمثابة مقر صغير لك، أو مُحاضر في مجال معين وبـ تعمل دورات تدريبية باستمرار ومحتاج مكان تعمل فيه المحاضرات دي،
أو صاحب منتج وعاوز تسوق له وتبيعه من خلال مكان، أو حتى -مثلًا يعني- رجل صاحب أنشطة متعددة وحبيت تعدي على مكان تأخذ لك استراحة قصيرة بين تنقلات اليوم الكثيرة المرهقة.. في كل الأحوال دي.. هـ تلاقي غرضك هناك!


"هنا القاهرة"!

لأنها الـ "قاهرة".. فالكل هنا مقهور، والاختيار مش له.. هي -وبس- اللي تقرر مين يعمل إيه، وامتى، وفين.. وكان من ضمن قراراتها (الرشيدة بالطبع) أنها تجمع بداخلها عدد كبير جدًا من الـ Co-Working Spaces.. وتقسمهم على مناطقها المختلفة، بخدمات وأغراض متنوعة جدًا جدًا..

فكان نصيب المعادي من القسمة:

"ذا ديستريكت - The District".. ودي أحد أكبر مساحات العمل المشتركة في القاهرة، وأقدمها تقريبًا.. واهتمامهم الأكبر بـ يكون برواد الأعمال الحرة (مصريين وأجانب) والمشروعات الهادفة للربح.. سواء كاستضافة لاجتماعاتهم وأنشطتهم أو حتى دعمهم الخبراتي والشبكي.


وكان نصيب مصر الجديدة من القسمة:

"المقر-AlMaqarr".. ودول أكثر حاجة ممكن تستفيدها منهم (بالإضافة لخدمات الأماكن والمنتجات المختلفة).. هي أنهم بـ يهتموا جدًا بشبكات العلاقات والمساعدات المتبادلة بينهم وبين رواد المكان، وبين رواد المكان وبعضهم.. في مجالات متنوعة.

وفيه كمان "ECO Space" فى 8 شارع الشهيد محمد عبد الهادي، من شارع الثورة، هيليوبوليس.. ودول الحاجة اللي بـ تميزهم جدًا هو الطابع الإسلامي القديم (والمميز) لتصميم المكان.. واللي هـ يحسسك بروح حلوة جدًا هـ تكون مناسبة أوي لقعدات المذاكرة الفردية.. أو قعدات المناقشات الجماعية اللي بـ تتناول أجزاء من التاريخ أو الحضارة الإسلامية.


ولسكان أكتوبر:

"Qafeer labs".. في الحي الـ 11 - شارع المحور المركزي - بلوك 66 - شقة 2، ودول هـ يكونوا كنز بالنسبة لكل واحد مهتم بالدورات التدريبية المتعلقة بالتكنولوجيا عمومًا.. وبالكومبيوتر وعالم الإلكترونيات خصوصًا.. هـ تلاقيهم بـ يعملوا دورات مكثفة وقوية المحتوى في المجالات دي باستمرار.


سكان العباسية:

"ZONE".. موجودة في ٢ هـ شارع السرايات بالعباسية، ودول ممكن تستفيد منهم جدًا بالقعدات الجماعية عمومًا (الاجتماعات مثلًا) لضمان الهدوء والجو النظيف (نظرًا لأنهم مانعين التدخين، ومتمسكين بالموضوع ده).. بالإضافة لركن مميز خاص بالقراءة والمذاكرة.

وفى مدينة نصر:

"مكانك - Makanak".. موجود في 3 شارع إبراهيم الرفاعي، أمام السراج مول، مكرم عبيد، مدينة نصر.. ودول هـ تستفيد منهم جدًا لو أنت محاضر وعاوز تعمل دورة تدريبية، أو لو أنت عضو في نشاط طلابي وبـ تعملواSessions أو Meetings بأعداد كبيرة نسبيًا.. لأن عندهم قاعات بـ تستوعب لحد 60 فرد تقريبًا فهـ تكون مناسبة جدًا للأغراض دي.


أما وسط البلد والدقي وما حولهما فكان لهم نصيب الأسد كالعادة.. وهـ تلاقي فيهم:
"Mariam Gallery".. في 8 شارع عبد المجيد الدرملي متفرع من شارع محمد محمود في التحرير، ودول هـ تستفيد منهم أكثر حاجة في قعدات الشغل الفردية أو المذاكرة،
كونهم موفرين جو تركيز من خلال مساحة هادئة مخصصة لكده.

"ملاذ – Malaaz" في شارع طلعت حرب، ودول أنسب لقعدات الشغل الفردية الطويلة..
يعني لو أنت ديزاينر مثلًا وهـ تقعد تشتغل عدد ساعات كبيرة في المكان هناك هـ يكون مناسب لك جدًا.. وده لأن القعدة عندهم بـ تكون مجانًا، الحساب بس بـ يبقى على المشروبات أو الطلبات اللي بـ تطلبها.. وكمان بـ يبقى عندهم ورش عمل وفعاليات ثقافية متنوعة بـ تتعمل من وقت للثاني في المكان تقدر تستمتع بها في فواصل العمل.

شفشاون - ChefChaoun.. في شارع هارون قريب من ميدان المساحة في الدقي.. ودول هدفهم الأساسي أنهم يساعدوا الأنشطة الطلابية والمبادرات المجتمعية.. وبـ يقدموا لهم تسهيلات ومساعدات سواء بالمكان نفسه أو بالاستشارات أو من خلال توصيلهم بحد متخصص يقدر يساعدهم في مجالهم.. والمكان متميز بروحه الشبابية الحلوة ولونه الأزرق وطابعه التصميمي الجميل الشبيه بالمدينة المغربية اللي هو متسمي على اسمها.

"مشكاة - Mishkah".. فى 11 شارع خلوصي، في المنيل، وهناك بـ يكون اهتمامهم وتركيزهم الأكبر على عملية التبادل الثقافي والمعرفي بين رواد المكان.. فالمكان هـ يكون مناسب جدًا لإقامة نوادي الكتاب وجلسات القراءة الجماعية وفعاليات التبادل الثقافي.. وفي كل الأحوال المكان لطيف جدًا برضه للمذاكرة والاجتماعات.


ولو حبيت تعرف أي تفاصيل جديدة عن أي مكان من الأماكن دي ممكن تشوف صفحاتهم على الفيسبوك بنفس الأسماء المذكورة في الدليل.
بس يا سيدي.. وكل سنة والكابتن "أحمد فتحي" بألف خير!

مزيد من الصور
  • دليل كايرو 360 لمساحات العمل المشتركة Co-Working Spaces في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر  مسعد
حرر بواسطة:
عمر مسعد
تاريخ النشر:
14/06/2015
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟