دليل كايرو 360 للتطوع في رمضان في القاهرة - الحياة في كايرو Feature - كايرو 360
 







دليل كايرو 360 للتطوع في رمضان في القاهرة
دليل كايرو 360 للتطوع في رمضان في القاهرة
اصدرت في: 12/07/2015

كلنا تقريبًا تعودنا على الصورة الشائعة للمشاركة في أعمال الخير، وهي المشاركات المادية بالتبرع، لكن مش كثير مننا مجرب أنه يكون جزء من عمل الخير بنفسه، ويشوف بعينه الصورة الأكثر جمالًا بين كل صور المشاركة، بالوقت.. والمجهود.

ولأننا تعودنا دايمًا أن كل دليل بـ نقدمه بـ يكون عبارة عن إجابة لمجموعة أسئلة متعلقة بموضوع ما، فخلونا كده نحاول نجاوب على الأسئلة المهمة المتعلقة بقصة التطوع.
وعلشان علمونا أيام الثانوية وقالوا: "ابدأ بإجابة السؤال السهل"، وإحنا طبعًا ماشيين مع كل مكتسبات المرحلة دي بالعند، فإحنا هـ نبدأ بإجابة السؤال الأطول، والأصعب يمكن، آهو كده!


1- أتطوع فين؟

في الفترة الأخيرة بدأت الثقافة التطوعية تنتشر أكثر بين شرائح مختلفة في مصر، وبالتالي هـ نلاقي أن أعداد المؤسسات الخيرية بدأ يكبر جدًا، وفي تزايد مستمر والحمد لله، علشان كده خلينا نقتصر هنا على ذكر المؤسسات الأكثر انتشارًا وتنظيمًا، واللي بـ تخدم شريحة أوسع:

صناع الحياة:

أحد أكبر المؤسسات التنموية في مصر والوطن العربي من حيث الانتشار والتأثير، موجودين في كل محافظات مصر وده بـ يسهل على أي حد المشاركة لأنك مش محتاج تبذل مجهود علشان توصل لهم، وأعمالهم منوعة في مجالات مختلفة، وده بـ يتيح لأي حد أن مشاركته تكون في مجال اهتماماته (أو قريب منه على الأقل)، تواصل معاهم على رقم 16563 أو ممكن تتابع صفحتهم على الفيسبوك.


جمعية رسالة للأعمال الخيرية:

المؤسسة الخيرية الأشهر تقريبًا في مصر، ومغطيين مساحة كبيرة جدًا بأعمالهم في كل المحافظات، تقدر تشاركهم في رمضان في القوافل الخارجية اللي بـ تنزل للقرى الفقيرة في المحافظات وبـ تنقل لهم المساعدات، وتقدر كمان تشارك في معارض الملابس اللي بـ تتعمل باستمرار في رمضان، بالإضافة ليوم الكساء الكبير اللي بـ يحاولوا من خلاله أنهم يغطوا احتياجات الفقراء من لبس العيد وغيره، تقدر تتواصل معاهم وتعرف الفرع الأقرب لك علشان تشارك من خلال رقمهم 19450 أو من خلال الموقع الإلكتروني.


بنبني حياة:

مشروع شبابي بـ يهدف إلى توفير كل الاحتياجات الأساسية والمرافق الضرورية لقرى مصر الفقيرة، والعمل على التنمية الشاملة للقرى دي، تقدر تتواصل معاهم على رقم 01005552266 أو على صفحتهم على الفيسبوك.


بنك الطعام المصري:

ودي المؤسسة اللي رمضان بالنسبة لها بـ يعتبر هو الموسم الأهم لأنه متصل بشكل مباشر بأهدافها للقضاء على الجوع، وهما شغالين حاليًا على مشروعين: "إفطار الصائم"، و"صك الأضحية"، تقدر تتواصل معاهم على رقم 16060 وتستفهم عن تفاصيل كيفية المشاركة، أو تشوف صفحتهم على الفيسبوك.


مشروع نهر الخير:

وده أحد مشروعات مؤسسة "عُمّار الأرض" التنموية، وبـ يشتغل على حل مشكلة المياه اللي موجودة في كثير جدًا من القرى المصرية، تقدر تتواصل معاهم وتسأل عن التفاصيل على رقم 19054 أو تشوف صفحتهم على الفيسبوك.


2- اتطوع إمتى؟.. وإيه المجالات اللي ممكن أشارك فيها؟

من أجمل الحاجات الموجودة في العمل التطوعي بشكل عام هي الحرية اللي بـ تتيحها لك طبيعة العمل، وقت ما تكون فاضي وحابب تشارك هـ تلاقي المكان مستنيك، وكمان طبيعة الشغل التطوعي متنوعة جدًا، وبالتالي أكيد هـ تلاقي حاجة تناسب ظروفك وقدراتك،
يعني مصمم الجرافيك مثلًا ممكن يبقى بـ يتطوع من خلال أنه يشتغل على تصميمات دعائية للحملات، وواحد ثاني ممكن يتطوع من خلال إدارة مكونات في السوشيال ميديا.. وهكذا، يعني باختصار: السؤال ده أنت -وبس- اللي تقدر تجاوب عليه!


أفكار أخرى للتطوع:

بما أننا في رمضان فالموضوع حر بزيادة شويتين، فلو ظروف وقتك مش سامحة بالمشاركة في مؤسسات أو جهات خيرية، ممكن تعمل أفكار بسيطة جدًا زي معظم الناس في رمضان،
زي مثلًا: زيارة دور أيتام ومسنين في محيط منطقتك، توزيع تمر وعصير على الناس في الشارع وقت الفطار، عمل شنط تموينية صغيرة وتوزيعها على عمال النظافة اللي بـ تقابلهم في الشارع مثلاً أو أي حد ثاني غلبان، التبرع بالأكل الفائض من عندك كل يوم على الإفطار بأنك تحطه في علب بلاستيك أو فويل وتوزعه على الغلابة في الشارع وقت الفطار في اليوم اللي بعده، تجميع الملابس القديمة الصالحة للاستعمال اللي موجودة عندك ومش هـ تستخدمها ثاني، وتوزيعها على الغلابة اللي بـ تقابلهم.


وهكذا بقى.. والأفكار ما بـ تخلصش.. ولا الثواب بـ يقف.. و"رمضان كريم".

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر  مسعد
حرر بواسطة:
عمر مسعد
تاريخ النشر:
12/07/2015
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟