ByBike: حوار مع أصحاب أشهر عربية أكل في القاهرة - الحياة في كايرو Feature - كايرو 360
 







ByBike: حوار مع أصحاب أشهر عربية أكل في القاهرة
ByBike: حوار مع أصحاب أشهر عربية أكل في القاهرة
اصدرت في: 10/02/2016

أكيد شوفتهم على الفيسبوك، أو جايز تكون اتكعبلت فى صورهم على إنستجرام، ولو حظك حلو فعلاً، ممكن تكون عديت عليهم في الشارع؛ طبعًا فهمتم أن كلامنا على نهى مجدي وأحمد "موجو" الشربيني، اثنين شباب مخطوبين كان عندهم الشجاعة أنهم يقدموا عربية بطاطا مبتكرة اسمها "ByBike - ByBike" والناس كلها بـ تتكلم عنهم.

بس طبعًا المشكلة عندنا في مصر أن مع أي نجاح بـ تبدأ أصابع الاتهام والشك، وبدأت الناس تسأل إيه هي دوافع نهى وموجو، رامي لبيب من فريق كايرو 360 اتكلم مع الثنائي البسيط والمبتكر وعرف السبب، وإزاي عندهم خطط وأحلام كبيرة لمستقبلهم نفسهم يحققوها!

 

احكوا لنا عن بداية ByBike!

في الأول أنا وموجو كنا شغالين في وظيفة، بس حسينا أننا محتاجين دخل إضافي، موجو كان بـ يشتغل في السياحة وأنا كنت مديرة لماركة نظارات شهيرة، سافرنا كثير، ولفينا أماكن أكثر، وانبهرنا بأفكار الشباب المبتكرة في كل أنحاء العالم.

هنا قررنا نبدأ مشروع ByBike، وبدأ معاه استغراب الناس من فكرة البنت اللي بـ تبيع بطاطا على عربية ومعاها خطيبها أو كانوا بـ يعارضوا حتى فكرة الشراء من عربية أكل في الشارع عمومًا، فكان الموضوع مش مجرد مشروع بـ يدخل فلوس زيادة، الموضوع هو مواجهة الأفكار الرجعية والمعتقدات القديمة الرافضة أن بنت تشتغل على عربية أكل.

 

كان إيه رد فعل أسرتكم لما عرفوا موضوع ByBike؟

أهل موجو كانوا مرحبين جدًا بالفكرة، أما أهلي فكانوا معارضين شوية، خصوصًا أني حكيت لهم بعد ما اشترينا العجلة فعلاً، والدي كمان اعترض جدًا على مواعيد الشغل خصوصًا أننا بـ نبدأ الساعة 9 بالليل ونخلص 1 الصبح لأن ده مخالف لعاداتنا وتقاليدنا، بس لحسن الحظ "أحمد" أخويا وقف معايا وساندني بعد ما شرحت له مدى تعلقي بـ ByBike، بغض النظر أنه بـ ياكل البطاطا ويخسرني فلوس كثيرة! عائلتي دلوقت فخورة بنا جدًا بعد نجاحنا، وأصبحوا من زبائننا الدائمين.

 

منيو ByBike عبارة عن إيه؟

المكون الرئيسي لأكلنا هو البطاطا، وعليها عشرات من الإضافات زي الفواكة الموسمية ومنها الفراولة والكيوي مع صوص الكراميل والشوكولاتة والتوت وغيرهم، عندنا كمان منيو موسمية لسه في مراحل التحضير مش شاملة للبطاطا.

 

إيه هي التحديات اللي بـ تواجهكم حاليًا مع ByBike؟

غير أننا بـ ننام قليل ومافيش وقت نجهز فرحنا، مشكلتنا أن فيه ناس بـ تحرّف كلامنا وتنشر كلام غلط عن شغلنا، أنا وموجو في الأصل مستريحين ماديًا، وعمر ما كان هدفنا من ByBike أننا نجمع فلوس لفرحنا زي ما قالوا في الإعلام، الكذبة دي كانت سبب أن ناس تتكلم عن حياتنا الشخصية وتجمع صور خطوبتنا علشان يثبتوا أننا نصابين، بس مهما حصل عمر ثقتنا ولا عزيمتنا ما هـ تتأثر.

 

إيه هي الخطوة الجاية لـ ByBike؟

هدفنا الرئيسي هو ترخيص أكل الشارع في مصر، نفسنا كمان نكون أكبر مورد لعربيات الأكل للناس اللي نفسها تبدأ مشروعها الخاص، ووصلتنا فعلًا طلبات كثيرة من ناس عاوزة تشتري عربية أكل، عاوزين نساعدهم يسوقوا منتجاتهم ويحسنوا من جودتها ويعملوا علامة تجارية مشهورة، كل ده جزء من خطتنا طويلة الأمد.

كلمونا عن خطوات ترخيص مشروع عربيات الأكل!

المشكلة أن مافيش أي قانون أو مبادرة أو حتى مشروع مشابه لنا واقف في صفنا وده شئ غريب، لأن المفروض فيه قوانين بـ تنظم مشروعات عربيات الأكل، فإحنا بـ نحاول نوصل للإعلام وننشر الوعي بالقضية، هنا بـ يظهر دور الإعلام المهم لنشر قضيتنا، بس في الوقت الحالي كل خوفنا أن الشرطة تقبض علينا في أي وقت!

 

علشان تعرفوا أكثر عن ByBike، تابعوا صفحاتهم على الفيسبوك وإنستجرام.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
رامى سليمان
حرر بواسطة:
رامى سليمان
تاريخ النشر:
10/02/2016
كاتب - عامل دكتوراه فى البرجر - الأكل وتايلور سويفت ومورتال كومبات هما أولوياته فى الحياة.