أحسن 8 أماكن في القاهرة للمذاكرة أو الشغل - الحياة في كايرو Feature - كايرو 360
 







أحسن 8 أماكن في القاهرة للمذاكرة أو الشغل
أحسن 8 أماكن في القاهرة للمذاكرة أو الشغل
اصدرت في: 14/03/2016

من أصعب الحاجات اليومين دول أنك تلاقي مكان هادئ ولطيف كده في القاهرة، خصوصًا لو كنت عاوز تذاكر، طبعًا كلنا عارفين أنك سهل جدًا تفقد تركيزك من أي سبب سواء كنت في البيت أو في مكان بره، وعلشان تلاقي مكان هادي في وسط الدوشة والزحمة كأنك بتدور على أبرة في كوم قش، لو عندك امتحان أو مشروع عاوز تخلصه أو حتى عاوز تتناقش مع زملائك، إحنا في كايرو 360 عندنا الحل، وجمعنا أحسن أماكن تقدر تذاكر أو تشتغل أو حتى تستمع بوقت لطيف فيها.

 

أبروتش – Approach

أول مكان معانا هو "أبروتش – Approach" الموجود في مساكن شيراتون هليوبوليس، والحقيقة أن تصميم أبروتش اتعمل مخصوص على شكل مكان للدراسة بيحل معاناة المهندسين المعماريين اللي عاوزين مكان يشتغلوا فيه بعيدًا عن بيوتهم ومكاتبهم، أبروتش مجهز بأماكن للمذاكرة ده غير أنه بيوفر آلات صناعية مهمة منها قطّاعات ليزر، أبروتش فعلاً بيحقق كل أحلام المعماريين.

 

بيكيا – Bikya

يعتبر بيكيا الموجود في مدينة نصر واحد من أهم المحاور الثقافية في المحروسة، وكمان من أجمد الأماكن لو عاوز تخلّص شغلانة أو تذاكر في أجواء لطيفة هادئة، ممكن كمان لو عاوز تستريح شوية من الشغل أو المذاكرة تشوف بيقدموا إيه هناك، لأن بيكيا مكتبة وعندهم كتب مستعملة وكمان يعتبر صالون ثقافي بيستضيف حفلات وورش عمل فنية.

 

بوكليت - Booklet

لو كنت محتاج أجواء تحفز فيك الإبداع، مكتبة وكافيه بوكليت أكيد هتساعدك، بوكليت في الحقيقة بتقدم كل التجهيزات المطلوبة علشان تقضي وقت هادي مع اللاب توب أو كتبك وسط ديكورات مستوحاة من فترة السبعينيات ومنيو الكافيه وشبكة Wi-Fi.

 

كايرو ديلي (ذا ديستريكت) - Cairo Deli

ذا ديستريكت أكيد من أوائل الأماكن اللي وفرت للناس مساحات عمل مشتركة في القاهرة، وده حصل عن طريق توفير مساحة للناس اللي عاوزة تشتغل في جو من الإنتاجية والنشاط مع ناس حماسية، بس إحنا كلامنا هنا تحديدًا هـ يكون عن كايرو ديلي.

يتميز كايرو ديلي أنه كافيه هادئ ومريح ويعتبر مكان ممتاز للمذاكرة، ولو كنت هربان منها أصلاً وعاوز تأكل حاجة حلوة، برضه مش هـ يخيبوا ظنك بتشكيلتهم الرائعة من الساندويتشات والسلاطات والمشروبات وغيرها.

 

كرياتيفو – Creativo

كرياتيفو هو مساحة عمل مشتركة موجودة في الدقي بتوفر مكان للطلبة وأصحاب الأعمال الحرة وأصحاب المشروعات علشان يشتغلوا من غير دوشة أو تشتيت، كرياتيفو يعتبر بديل هايل كمان لو عاوز مكان خاص بك بعيد عن دوشة الكافيهات، مع العلم أنك محتاج حوالي 20 جنيه بس علشان تقضي يومك هناك.

 

ديوان - Diwan

عمر قائمتنا ما هتكمل من غير أشهر مكتبة في القاهرة وهي ديوان، تقدر تذاكر براحتك في أي فرع من فروع ديوان وسط موسيقى هادئة ومحطة مشروبات وسناكس صغيرة، وطبعًا آلاف من الكتب المميزة المعروضة للبيع، نفتكر مافيش أحسن من كده.

 

فلك – Falak

في واحدة من أهدأ مناطق جاردن سيتي الهادية أصلًا، هتلاقي فلك اللي بتقدم عدد من الأنشطة منها عروض فنية وحرف مختلفة، وكمان مكتبة وكافيه واسع تقدر تشتغل فيها على لابتوبك أو تذاكر في أجواء مريحة.

 

صوفي - Sufi

صحيح مكتبة صوفي في الزمالك مش واسعة للدرجة، لكنها تعتبر الحل المثالي لو عاوز تشتغل أو تذاكر أو حتى تشرب فنجان قهوة مع أصحابك في أجواء لطيفة مش مصطنعة، أهم حاجة لازم تشوف أجندة فعاليات صوفي قبل ما تروح هناك، إلا لو ما عندكش مانع تقضي وقتك هناك وسط حفلة أو يوم لبيع المنتجات المستعملة.

 

خلاص مافيش سبب للكسل، يلّا نخلص شغلنا ومذاكرتنا!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
رامى سليمان
حرر بواسطة:
رامى سليمان
تاريخ النشر:
14/03/2016
كاتب - عامل دكتوراه فى البرجر - الأكل وتايلور سويفت ومورتال كومبات هما أولوياته فى الحياة.