دليل كايرو 360 للتعامل مع مترو الأنفاق في القاهرة - الحياة في كايرو Feature - كايرو 360
 







دليل كايرو 360 للتعامل مع مترو الأنفاق في القاهرة
دليل كايرو 360 للتعامل مع مترو الأنفاق في القاهرة
اصدرت في: 30/03/2016

فيه حاجات بتميز مترو الأنفاق في القاهرة، منها أنه أرخص وأسرع وسيلة تقريبًا، كمان محطاته منتشرة في أماكن حيوية كتير، لكن هل ده معناه أن الحياة حلوة تحت الأرض؟ لأ طبعًا، لأن المترو تجربة صعبة لناس كتير خصوصًا في أوقات الحر والزحمة، هتحس وقتها أنك في فيلم رعب، مش هتصدق كمية البشر والحر الشديد، لكن ما تقلقش.. الدليل ده هيخليك تعرف تتعامل مع المترو، والهدف أنك تخرج بأقل خسائر ممكنة.

 

اشتري تذاكر زيادة

أول حاجة هترعبك لما تنزل مترو الأنفاق وقت الذروة، خصوصًا لو أول مرة تخوض تجربة المترو، هي شباك التذاكر، إحنا عارفين طبعًا أن أغلب المصريين عندهم مشكلة نفسية مع ثقافة الطوابير والنظام، بنحب الفوضى أكتر، بتحسسنا بذاتنا وكده! علشان كده كله بيخبط في بعضه علشان يعرف يشتري تذكرة، وما تستغربش لو لقيت واحد طاير فوق دماغك وبيمد أيده لموظف التذاكر رغم أنه لسه جاي بينما أنت بقى لك ساعة، المشكلة دي حلها بسيط.. اشتري تذاكر بزيادة وخليها في جيبك.. لما تدخل المترو وقت الزحمة هتكتشف أنك مش مضطر تحارب في زحمة شباك التذاكر.. خرج التذكرة من جيبك وعدي من ماكينة التذاكر، هتحس أنك برنس!

 

ابعد عن المنتصف

الناس لما بتعدي من بوابات التذاكر بتكسل تمشي شوية على الرصيف، هتلاقي زحمة شديدة أمام العربيات المقابلة لبوابات التذاكر مباشرة، تقريبًا بتكون هي العربيات اللي في منتصف المترو، مع أنك لو مشيت للعربيات الأمامية أو الخلفية هتلاقي الزحمة أقل، وبالتالي هتلاقي لنفسك مكان آدمي وعلى الأقل هتقدر تتنفس بعكس العربيات اللي في المنتصف.

 

شنطة واحدة كفاية

لو هتركب المترو وقت الذروة وفيه شنطة على كتفك فبلاش يبقى في أيدك أي حاجة تانية: الموبايل، ميدالية المفاتيح، كيس مناديل، كل دي حاجات هتتعبك، حطها في الشنطة أفضل لحد ما تنزل، لأنك في الغالب هتكون محتاج تبقى حر أكتر، علشان تعرف تمسك في أي حاجة تسندك خصوصًا لما المترو يتهز جامد وده بيحصل كتير، وخد بالك وسط الزحمة لو حاجة وقعت منك على الأرض هيكون صعب توطي وتجيبها، هتتعب جدًا.

 

المزيكا هي سلاحك

في وقت الذروة الخناقات بتبقى بدون توقف داخل المترو، مين داس على رجل مين، مين اتحرش بمين، مين كان هيسرق مين، ده غير ثقافة الصوت العالي المسيطرة على كتير من المصريين، رغي.. رغي.. رغي.. وكأن كل الناس اللي في المترو خبراء في السياسة والرياضة والدين والاقتصاد والشئون العسكرية، صدقنا الحل الوحيد هو أنك تحط السماعات في ودنك وتسمع مزيكا (ملحوظة: اوعى تبقى سلبي لو شوفت واحد بيتحرش بواحدة، ساعدها واديله على دماغه).

 

ابعد عن عربيات السيدات

فيه عربيتين في المترو للسيدات، اوعى تغلط وتركب واحدهم منهم، الستات في المترو مستحيل تفرط في حقها في الخصوصية، اللي هتديك بالشنطة على دماغك، اللي هتصوت وكأنها شافت حرامي، والأمر هينتهي بأنك هتدفع غرامة بعد ما هتاخد علقة سخنة من ستات المترو، طب إيه الحل؟ ببساطة وأنت على الرصيف بص لفوق هتلاقي لوحتين متعلقين في سلاسل بيحددوا بالضبط مكان عربيات السيدات يعني مالكش حجة!

 

أخطاء اوعى تعملها في المترو

خطأ كبير أنك تركب المترو في الصيف وفي وقت الذروة وأنت لابس تي شيرت أبيض.. مافيش تهوية، عرق بدون توقف.. النتيجة مش هتكون في صالحك خصوصًا لو عندك مشوار مهم، كمان أكبر خطأ أنك تلمع جزمتك قبل ما تركب المترو.. ناس كتير هتدوس عليها وهتخرج من المترو والجزمة مش نظيفة، الأفضل تؤجل تلميع الجزمة لبعد النزول من المترو، كمان سيبك من أنك تفتح الإنترنت من موبايلك.. ألف عين وعين هتبقى مهتمة تعرف أنت بتعمل

مزيد من الصور
  • دليل كايرو 360 للتعامل مع مترو الأنفاق في القاهرة
  • دليل كايرو 360 للتعامل مع مترو الأنفاق في القاهرة
  • دليل كايرو 360 للتعامل مع مترو الأنفاق في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى فتحى
حرر بواسطة:
مصطفى فتحى
تاريخ النشر:
30/03/2016
صحفي مهووس بالسينما والكتب، بيحب التصوير الفوتوغرافي وبيعشق وشوش المصريين وشايفها أجمل وشوش في الكون، بيحب شوارع، حواري، قهاوي، وناس البلد دي.