باليه في شوارع القاهرة.. تخيل؟! - الحياة في كايرو Feature - كايرو 360
 







باليه في شوارع القاهرة.. تخيل؟!
باليه في شوارع القاهرة.. تخيل؟!
اصدرت في: 05/04/2016

تخيل معانا أنك ماشي في أحد شوارع القاهرة وسط الزحمة والتلوث ومقالب الزبالة وفجأة تلاقي بنت جميلة بترقص باليه.. سامعينك بتقول الآن "مستحيل ده يحصل في مصر طبعًا!" لكن نحب نقول لك أن الحلم ده اتحول لحقيقة بالفعل، ظهرت في مصر تجربة جديدة اسمها Ballerinas of Cairo وهو أقرب لمشروع تصوير بدأه المصور الشاب محمد طاهر، والهدف هو نشر الفن.

رغم أنها جديدة في مصر لكن الفكرة نفسها قديمة، وانتشرت في العديد من دول العالم، مؤسس الفكرة الأصلي مصور أمريكي اسمه (داني شيتاجي)، وفي مارس 2016 قرر المصور المصري محمد طاهر تنفيذ الفكرة في شوارع مصر، وهدفه يبين للناس أن مصر فيها أماكن جميلة وأن ممكن المزج بين الباليه والأماكن الأثرية.

محمد طاهر بيقول أنه لاحظ أن القاهرة شكلها أصبح حزين وكئيب، والناس نفسها مش مبسوطة، فقرر يخلي الناس في الشارع تشوف منظر مبهج، وهو بالرينا بترقص وسط الأماكن المصرية الأصيلة زي شارع المعز والحسين والقلعة، وأول بالرينا قدر محمد يقنعها بفكرته هي مريم الجبالي وبعدها صور أكثر من بالرينا تانية زي نور الجزار وبسنت أبو باشا.

أول مكان محمد صور فيه بالرينا كان منطقة الكوربة في مصر الجديدة، وبعدها صور في الحسين وشارع المعز والمعادي، لكن محمد بيحلم يروح أماكن أكتر، ويخلي المصريين يحبوا الفن أكتر وأكتر، أو زي ما بيقول:"مهم الناس تشوف مناظر مبهجة، ده هيفرق معاهم نفسيًا".

تقدروا تتابعوا صور محمد طاهر على حساب "Ballerinas of Cairo" على انستجرام.

معلومة عن المصور محمد طاهر:

محمد طاهر مصور فوتوغرافي وعاشق للسينما، واشتغل مساعد مخرج لأفلام مهمة منها نوارة.

مزيد من الصور
  • باليه في شوارع القاهرة.. تخيل؟!
  • باليه في شوارع القاهرة.. تخيل؟!
  • باليه في شوارع القاهرة.. تخيل؟!
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى فتحى
حرر بواسطة:
مصطفى فتحى
تاريخ النشر:
05/04/2016
صحفي مهووس بالسينما والكتب، بيحب التصوير الفوتوغرافي وبيعشق وشوش المصريين وشايفها أجمل وشوش في الكون، بيحب شوارع، حواري، قهاوي، وناس البلد دي.