بالفيديو: دليلك لأفلام عيد الفطر 2016 - أفلام Feature - كايرو 360
 







بالفيديو: دليلك لأفلام عيد الفطر 2016
بالفيديو: دليلك لأفلام عيد الفطر 2016
اصدرت في: 05/07/2016

يعني إيه عيد الفطر؟ يعني كحك، بسكويت، بيتي فور، وزيارات عائلية... يعني إيه زيارات عائلية؟ يعني العيدية، والفلوس يعني فسح.. والفسحة ماتبقاش فسحة من غير سينما.. والسينما ماتبقاش سينما من غير ما كايرو360 تقول لك الخريطة الكاملة لأفلام عيد الفطر 2016.. الموضوع ده تقراه قبل السينما وبعدها... قبلها علشان تعرف هاتدخل فيلم إيه.. وبعدها علشان نتناقش سوا هل اختياراتنا وترشيحاتنا كانت صح ولا...؟

 

أبو شنب.. فيلم رومانسى كوميدي!

نبدأ جولتنا مع فيلم أبو شنب من بطولة الفنانة خفيفة الظل اللي أصبحت مقررة علينا في كل عيد (ياسمين عبد العزيز). الحقيقة أن ياسمين بتحاول تصنع لنفسها مساحة خاصة، حاولت قبل كده مع أفلام (الداده دودي) و (الآنسة مامي) تفتح قناة أتصال مع الأطفال، وحاولت بعد كده أنها تقدم سلسلة أفلام بتجمع كل حاجه مع بعضها ما بين الأكشن والرومانسية أو حتي الأغاني والأستعراضات، وده حصل فى أفلام زي الثلاثة يشتغلونها و جوازه ميري وأخيرًا... أبو شنب.

الفيلم بيحكي عن ظابطة فى الشرطة النسائية المصرية، بتتعرض لمواقف كوميدية كتير بالأشتراك مع ظافر العابدين، مع مشاهد كتير شوفناها فى تريلر الفيلم بتحكي عن التحرش ومحاولة مواجهة الظاهرة دي بأسلوب كوميدي.

الفيلم بيشارك في بطولته لطفي لبيب، وبيومي فؤاد الجوكر اللي ظهر في معظم مسلسلات رمضان وأفلام العيد بالأضافة لبدرية طلبة و ليلي عز العرب ومن أخراج سامح عبد العزيز. و ممكن تشوفوا إعلانه من هنا.

 

جحيم فى الهند... جحيم فى السينما

بعد النجاح اللي حققه فيلم كابتن مصر، محمد إمام ابن الفنان الكبير عادل إمام بيقدم فيلم جديد بعنوان (جحيم في الهند) من إخراج معتز التوني اللي عرف عنه إخراج النوعية الخفيفة دي من الأفلام اللي بتتعرض في سباق الأعياد دايمًا.

الفيلم بيحكي عن فرقة قوات خاصة بتحاول تحرر السفير المصري المخطوف في الهند، لكن الأحداث بتاخد منعطف كوميدي أكتر منه منعطف أكشن، مع وجود فرقة كوماندوز غريبة بتضم باقى أبطال الفيلم زي بيومي فؤاد –تاني- وأحمد فتحي وحمدي الميرغني مع بطولة نسائية من ياسمين صبري اللي عملت دور تمارا في مسلسل الأسطورة فى رمضان. وممكن تشوفوا إعلان الفيلم من هنا.

 

عسل أبيض.. الأطفال أحباب الله.. والسينما

ولأن الأطفال بيحبوا السينما والسينما بتحب الأطفال، وعلشان الأهل عاوزين فيلم يضحك أولادهم بعد القعاد لمدة 30 يوم في انتظار المسلسلات على القنوات والدوخة من الإعلانات والفواصل، سامح حسين مع المخرج حسام الجوهري بيقدموا لنا فيلم خفيف موجه بالمقام الأول للأطفال.

الفيلم بتدور أحداثه عن طفل صغير بيتعرض للأختطاف وبتحصل مفارقات كوميدية كتير علشان الطفل ده يرجع لعيلته تاني، وبيشارك في بطولة الفيلم ميرهان حسين وبيومي فؤاد –تالت!- ونهي صالح و كريم عفيفي. وممكن تشوفوا إعلان الفيلم من هنا.

 

بارتي في حارتي.. 30 يوم في العز

وهنا نوصل لمحطه مش بنحب نقف عندها كتير في الكلام عن أفلام العيد.. ألا وهي الأفلام التجارية واللي كل هدفها تقديم الرقص والعري في اطار درامي مبتذل من النكت السخيفة والإيفيهات الواقعة.. دي أفلام بتقاس بقدرتها على جذب المشاهدين وبتعتمد فى المقام الأول والأخير على الجمهور المراهق اللي مش عاوز يشوف غير الرقاصة والمطرب والكباريه والحارة الشعبية والسلام.

 

الفيلم الأول هو (بارتي فى حارتي) وممكن تشوفوا إعلانه من هنا من تأليف أحمد عيسي وبطولة إيمان السيد والمطرب دياب والمطربة أمينه والراقصة دينا ومحمد لطفي اللي زعلانين جدًا على إصراره على تضييع موهبته التمثيلية الممتازة في أفلام بالشكل ده.

الفيلم بيحكي عن محمد لطفى واللي بيظهر كشخص عنده قدرات خارقه ورثها عن والده (أيرون مان) وهي قصة بتفكرنا بدرجة كبيرة بقصة (بنات سوبر مان) المسلسل الرمضاني.

أما الفيلم التاني فهو فيلم 30 يوم في العز وتقدروا تشوفوا إعلانه من هنا وهو قصة وسيناريو وحوار سيد السبكي وإخراج هاني حمدي، ومن بطولة سليمان عيد وأحمد فلوكس وسعد الصغير والراقصة صوفينار.

 

من30 سنه... الأحلي في الآخر

ولأن الأحلي دايمًا بنحب نتكلم عنه آخر حاجة.. بنتوقع لفيلم من 30 سنه أنه يكون قنبلة مدوية في عيد الفطر 2016 .. الفيلم من بطولة أحمد السقا وشريف منير و مني زكي وميرفت أمين و نور وصلاح عبد الله ومن تأليف أيمن بهجت قمر وإخراج عمرو عرفة.

الفيلم بيحكي عن رجل بيحلم انه بيقتل ناس معينة، ولما بيصحى بيقتلهم فعلًا، وبيكتشف أنه تعرض لما يشبه اللعنة، واللي بترفض أنها تسيبه.. علشان كده بيطلب مساعدة من صديقه (أحمد السقا) واللي بيحاول يساعده. وإعلان الفيلم تقدروا تشوفوه من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد حمدي
حرر بواسطة:
محمد حمدي
تاريخ النشر:
05/07/2016
كائن سكندرى الهوى والاتجاه، يتغذى عقليًا على الكتب والأفلام، يتكاثر فى مواطن التظاهرات، يتغلب على الروتين بالسفر والكتابة، يبحث عن بنت الحلال، يقدس الحياة الزوجية، يشارك فى الأثاث، يحفظ بعيدًا عن متناول الأطفال.