دليل كايرو 360 لمجموعة الأفلام المعروضة حاليًا بتقنية الـ ‏‎3D‎‏ في سينمات القاهرة - أفلام Feature - كايرو 360
 







دليل كايرو 360 لمجموعة الأفلام المعروضة حاليًا بتقنية الـ ‏‎3D‎‏ في سينمات القاهرة
دليل كايرو 360 لمجموعة الأفلام المعروضة حاليًا بتقنية الـ ‏‎3D‎‏ في سينمات القاهرة
اصدرت في: 25/08/2016

بما أن جت لنا استفسارات كثيرة عن إيه الأفلام اللي موجودة حاليًا في سينمات القاهرة معروضة بتقنية الـ 3D، قررنا أننا نكتب لكم مقال فيه قائمة بالأفلام دي، ونبذة عنها وكمان السينمات اللي بتعرضها. وهي كالآتي:

1 – Suicide Squad:

أفلام الأبطال الخارقين من الحاجات اللي بتشد فئات عمرية كثيرة، وليها كثير من المريدين مش بس في مصر، ده في جميع أنحاء العالم. الفيلم ده من الأفلام اللي طال انتظارها وخصوصًا أن الدعاية بتاعته ظهرت من حوالي سنة.

الفيلم بيحكي عن مجموعة من الأشرار اللي بيتم الاستعانة بهم في مهمة سرية بالتعاون مع الحكومة. ولك أن تتخيل الأشرار دي لما يتجمعوا مع بعض ممكن يعملوا إيه. الفيلم من بطولة جاريد ليتو، مارجوت روبي وويل سميث.

الفيلم موجود في 12 دور عرض منهم IMAX، أمريكانا بلازا، جالاكسي ودي – بوكس... شوف الباقي هنا.

2 – The BFG:

أحدث أفلام المخرج الكبير ستيفن سبيلبيرج، واللي ناس كثير كانت في انتظاره من ساعة عرضه الأول في دورة مهرجان كان السينمائي اللي فاتت على طول.

الفيلم الأنيميشن بيحكي عن عالم خيالي فيه عمالقة آكلي الأطفال، وحظ طفلة بيخليها تقابل واحد من العمالقة دول. ولكن بنكتشف أن العملاق ده مش زي الباقي لأنه ما "بياكلش عيال"، بالتالي يبقوا صحاب.

الفيلم موجود في 6 دور عرض منها سينما صن سيتي، نايل سيتي ودول كمان.

3 – The Secret Life of Pets:

بالرغم من أنه فيلم أنيميشن، إلا أنه من الأفلام اللطيفة جدًا واللي مؤكد هتستمتع بالفرجة فيه على العالم الخفي للحيوانات الأليفة "الكيوت" اللي مربيينها في بيوتنا.

الفيلم من بطولة الممثل الكوميدي كيفين هارت، واللي شارك في أعمال كوميدية كثيرة قدرت تحقق نجاح في الفترة الأخيرة؛ زي فيلم Central Intelligence مع أو دواين جونسون.

الفيلم موجود في 7 دور عرض –معظمهم فترات صباحية- زي نايل سيتي، سيتي ستارز، والباقي هنا.

4 – Ice Age: Collision Course:

من الأفلام اللي لازم تكون شفت على الأقل جزء واحد منهم، والحقيقة أن الفيلم ده مش بس بيعتمد على الابهار الشكلي بس على قد ما فكرته الأساسية مختلفة وجديدة؛ فمجموعة الحيوانات المنقرضة: "سيد"، "ماني" و"دييجو" بتجمعهم صداقة وبيمروا بمغامرات كثيرة بيخوضوها مع بعض خصوصًا في عالم مناخه في تغير دائم.

في الجزء ده، المجموعة بتواجه خطر جي من خارج كوكب الأرض، وهو نيزك لازم يوقفوه... يا ترى هينجحوا؟

الفيلم موجود في 5 دور عرض منهم بوينت 90، أمريكانا بلازا وجالاكسي مول العرب... شوف كده.

5 – The Legend of Tarzan:

من الحكاوي القديمة اللي ممكن تكون اتهرت أفلام وكارتون وكل حاجة ممكن نتخيلها هي قصة شاب الغابة "طرازان"؛ واللي ما عندوش فكرة عن الجدع ده قصته ببساطة متناهية هي الآتي: واحد متربي في غابة، مجموعة من البني آدميين اللي زيه لاقوه بالصدفة.

بس المرة دي الفكرة جديدة؛ "طرازان" راجع للغابة بعد سنين من الغربة في المدينة لما يكتشف أن فيه عملية تنقيب مريبة بتحصل في "موطنه الأصلي". الفيلم ناجح جدًا ومستمر عرضه لمدة أسابيع كثيرة من أول عرض له.

الفيلم معروض في 4 دور عرض منهم سيتي ستارز وصن سيتي... الباقي أهو.

6- Finding Dory:

الجزء التاني من فيلم Finding Nemo ، وهو كان فيلم ناجح جدًا بيحكي عن سمكة بتتوه عن والدها وبيساعده في البحث عنه سمكة ثانية دايمًا بتنسى كل حاجة وهي "دوري".

تقريبًا دوري كانت أنجح شخصية في الفيلم الأولاني لدرجة أن صناع الفيلم قرروا استثمار النجاح ده بعمل فيلم ثاني ليها هي شخصيًا، واللي بتقوم بدورها في الجزئين الإعلامية الناجحة جدًا –واللي دمها خفيف فعلًا- إلين ديجينيريس.

الفيلم معروض في 3 دور عرض –لأن كان بقاله كثير معروض- وهم: صن سيتي ، وجولف سيتي وسيتي ستارز... المواعيد بالضبط من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
25/08/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.