دليل كايرو 360 لكل أفلام عيد الأضحى - أفلام Feature - كايرو 360
 







دليل كايرو 360 لكل أفلام عيد الأضحى
دليل كايرو 360 لكل أفلام عيد الأضحى
اصدرت في: 10/09/2016

بنشوفهم كتير.. شلة شباب واقفين محتارين مش عارفين يتفرجوا على إيه.. السينما زحمة والناس كتير وفاضل 3 دقايق على ميعاد الفيلم.. ولازم ياخدوا قرار قبل بداية الدخول علشان أحلى حاجة فى الفرجة على فيلم فى السينما... الإعلانات.

الناس اللى بنتكلم عنهم دول أكيد لسه لم يقرأوا دليلنا لأفلام عيد الأضحى 2016 علشان الدليل ده بيعرفكم وبالتفصيل قصة كل فيلم وفريق عمله وهو مناسب لأي شريحة بالظبط من الجمهور... شاركوا التقرير ده مع صحابكم اللى بتشوفوهم واقفين يتخانقوا في السينما قبل بداية الفيلم بدقائق!

لف ودوران.. جديد أحمد حلمي

فى اللحظات الأخيرة قبل تشكيل الخريطة النهائية لأفلام عيد الأضحي فاجأنا أحمد حلمي بفيلمه الجديد "لف ودوران" مع الجميلة دنيا سمير غانم.

حلمي نشر بوستر الفيلم على السوشيال ميديا ومن ساعتها ومحبي حلمي ماعندهمش سيرة غير الفيلم الجديد والتكهنات بخصوص قصته، واللى شابها غموض كبير زي معظم قصص أفلام أحمد حلمي اللى مش بنعرفها بشكل كامل غير فى قاعة العرض نفسها.

الفيلم كان المفروض يكون اسمه "ألماظ حر" لكن تم تعديله إلى (لف ودوران) ومن إخراج خالد مرعي وتأليف منة فوزي ومن إنتاج وليد صبري.

محمد سعد... عنده شعرة

طبعًا كلنا فاكرين أغنية "أنا عندي شعرة" من فيلم إسماعيل يس الشهير.. المرة دي محمد سعد قرر يخلى عنوان الأغنية الهزلي هو عنوان فيلمه واللي من تأليف وليد يوسف، وإخراج سميح النقاش، من إنتاج وائل عبد الله، ويشارك في البطولة إلهام شاهين ومنة فضالي وحسن حسني ولطفي لبيب، ومحمد حسني وعدد آخر من الفنانين.

محمد سعد قرر يبتعد عن شخصية اللمبي اللي قدمها في كل أعماله الماضية تقريبًا، لكنه ماقدرش يمنع نفسه من تقديم أكتر من شخصية، لكن المرة دي سعد هيظهر في شخصيتين فقط، أما منة فضالي وهي البطلة الأنثى أمام محمد سعد، قالت إن دورها دور أم لطفلة عندها 9 سنوات وإن دورها فيه لمحة إنسانية لا يمكن نكرانها.

الفيلم بيحكي عن محامي بيدافع عن رجال الأعمال الفاسدين، لكنه بيتعرض لحادثة بيتحول على أثرها لطفل صغير عنده 5 سنوات في جسد رجل كبير! ثم بتتوالى الأحداث الكوميدية. الفيلم اسمه اتغير لـ "تحت الترابيزة" لما اتعرض في السينما.

حملة فريزر

هشام ماجد وشيكو وأحمد فهمي.. الثلاثي اللى تعودنا على أفلامهم المتميزة والكوميدية ودمهم الخفيف.. أتنين منهم بس هم هشام ماجد وشيكو هنشوفهم فى حملة فريزر مع بدرية طلبة وبيومي فؤاد واللى بيقدموا من خلال أحداثه تريقة لا علاقة لها بحملة فريزر على مصر واللى انتهت سنة 1809

الفيلم تم تصوير جزء كبير منه في كرواتيا، ومن إخراج سامح عبد العزيز وبرضه بنشهد حالة من التكتم الشديد حوالين أحداث الفيلم علشان الموضوع يبقى مفجأة في دار العرض مباشرة.. ياترى الدويتو الكوميدي بيحضر لنا إيه اليومين دول؟!

البس علشان خارجين

على الرغم من إن اسم الفيلم كان (ويك إند) إلا أنه تم تغييره إلى (البس عشان خارجين) على الرغم من المعركة مع الرقابة بسبب الاسم ومحاولة منتج الفيلم السبكي التمسك بالاسم ومحاولة كتابته على الأفيش بعد اضافة علامة X عليه لزوم محاولة خداع الرقابة!

الفيلم من بطولة حسن الرداد، إيمي سمير غانم، بيومي فؤاد، طاهر أبو ليلة، حنان سليمان، محمد علي رزق، مصطفى محمود، وعدد من ضيوف الشرف منهم نسرين أمين، مراد مكرم، ضياء الميرغني، وأيمن منصور، سيناريو وحوار هشام ماجد وشيكو، وإنتاج أحمد السبكي وإخراج خالد الحلفاوي.

صابر جوجل: محمد رجب فى فيلم جديد

من تأليفه وبطولته بنشوف محمد رجب في دور راجل متخصص ومحترف في التعامل مع البرمجيات والكمبيوتر وتقنيات الإنترنت وغيرها، والناس كلهم بيسموه صابر جوجل، لكنه بيتورط بسبب موهبته في عمليات غير مشروعة مع عدد من رجال الأعمال المشبوهين وبيضطر للهرب والسفر خارج مصر.. ثم بتستمر الأحداث فى قالب أكشن كوميدي.

بيشارك رجب فى البطولة نور الكاديكي وأحمد صيام وهادي الجيار وحسن عبد الفتاح وإيهاب فهمي وراندا البحيري وعدد من الفنانين.

محمد رجب قدم مؤخرًا أفلام ماحققتش نجاح كبير في السينما وإن حققت نجاح إلي حد ما في العرض التليفزيوني وعلى الفضائيات زي فيلم سالم أبو أخته، واللى كان بيحكي عن مغامرات شاب مصري فقير فى محاولة جمع المال لزواج أخته الوحيدة.

دي كانت الأفلام المتوقع نزولها في عيد الأضحي.. الخريطة بتتغير كل شوية وفي أفلام بتلحق السباق وفيه أفلام تانية مش بتقدر توفي بوعودها وتلحق بقطار العرض. لكن في كل الأحوال إحنا بنراهن على عيد الأضحي 2016 أنه يقدم جرعة مختلفة ومتميزة من الأفلام العربية الجميلة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد حمدي
حرر بواسطة:
محمد حمدي
تاريخ النشر:
10/09/2016
كائن سكندرى الهوى والاتجاه، يتغذى عقليًا على الكتب والأفلام، يتكاثر فى مواطن التظاهرات، يتغلب على الروتين بالسفر والكتابة، يبحث عن بنت الحلال، يقدس الحياة الزوجية، يشارك فى الأثاث، يحفظ بعيدًا عن متناول الأطفال.