على الرغم من وجود اسم (أحمد السبكي) فى الإنتاج، إلا أن الخالدين (صالح والصاوي) قدروا يرفعوا الفيلم لآفاق أعلى من اللي بـ توصل لها عائلة السبكى فى الغالب. من خلال آداء تمثيلي رائع خدم القصة اللى ممكن ما تكونش بنفس القوة.

الفيلم بـ يحكى عن البلطجي صلاح روسي اللى بـ يقوم بدوره خالد الصاوى، اللى بـ يفقد عينه فى أحد المشاجرات، وبـ يلجأ لـفتحى العبيط (خالد صالح) علشان يأخذ عينه السليمة بمساعدة الممرضة ناهد (روبى) والدكتور طلعت (مجدى بدر).

الفيلم اللى أخرجه محمد مصطفى يعتبر من أول الأفلام اللي بـ تناقش قضية التجارة فى الأعضاء من فترة طويلة. شوفنا من فترة طويلة جداً فيلم جاد لنور الشريف بعنوان (الحقونا) إنتاج سنة 1989 لكن الحرامي والعبيط يعتبر من أحدث الأفلام اللى بـ تناقش مافيا تجارة الأعضاء.

 خالد الصاوي قدر يخرج برة جلده للمرة المليون على التوالى، قدم شخصية البلطجي بشكل مختلف عن اللى قدمه بيه فنانين كثير زي محمد رمضان مثلاً صاحب سلسلة أفلام الألمانى وعبده موته وقريبًا (قلب الأسد). ساعد الصاوي على نجاحه فى تقديم شخصيته بشكل مختلف. المشاهد الافتتاحية للفيلم اللى بـ يظهر فيها بمشهد الراوى للأحداث واللى بـ يعرفنا على باقى شخصيات الفيلم . لكن استعمال نفس التقنية فى المشهد النهائي للفيلم أضعفه جدًا وأخرج المشاهد من دائرة الأحداث.

خالد صالح..مش شايفين أنه قدر يقدم شخصية الشخص المتخلف عقليا بشكل كويس. خصوصا حركات إيده اللى كانت over فى كثير من المشاهد وكانت مشاهده وهو عاقل أقوى وأوقع، وإن كانت قليلة. إلا أن الإغراق فى التعرض لحياته قبل اصابته بالخلل العقلبى بدون استعمالها بشكل درامي فى مستقبل الأحداث حسس المشاهدين أن هناك خيط مقطوع من الفيلم أو لم يتم استغلاله بشكل كويس.

روبي..قولنا قبل كده..إحنا بـ نحب روبي، وبـ نحب ظهورها على الشاشة. لكن حبنا لها مايخليناش ننكر أن آدائها التمثيلي لسه قدامه كثير علشان يوصل للنضج. آدائها لشخصية ناهد كان محتاج شغل أكثر. خصوصًا تعبيرات وجهها اللى حسينا إنها over فى كثير من الأحيان برضه. لكن اختيارها للأزياء كان متوافق كويس مع الشخصية.

ديكور حمدى عبد الرحمن وموسيقى عمرو إسماعيل كانوا متوافقين جدًا مع جو الحارة الشعبية وساعد على إخراج الفيلم بصورة نهائية ممتازة.

الحرامي والعبيط فيلم محترم، بـ يقدم جرعات متوازنة من الكوميديا والتراجيديا والأكشن. ننصح بمشاهدته فى طوفان الأفلام العربية الهابطة اللى هو أكيد بـ يتميز عنها.