الحقيقة أننا مش بـ نحب نوعية الأفلام اللى عاوزه تلم كل التيمات السينمائية فى حوالى ساعتين هى مدة عرض الفيلم.. أسلوب: شوية رومانسية على شوية أكشن على حتة تراجيدي ينفع لو بـ نشترى طبق حلويات مشكل، لكننا مش بـ نفضله فيما يتعلق بالأفلام السينمائية.

من إخراج تيم ستورى بـ نشوف آيس كيوب وكيفن هارت فى الفيلم الأكشن الكوميدي اللى بـ يحكى عن محاولة ضابط شرطة حديث التقرب لأخو حبيبته بكل الطرق.. والدخول فى تفاصيل شخصيات الأبطال اللى بـ يخرج منها عدد كبير من المواقف الكوميدية ومواقف الأكشن فى نفس الوقت.

فكرة فيلم الأكشن الكوميدي حاولنا فى مصر تقديمه فى أكثر من عمل، لكن طبعًا النتيجة بـ تكون خليط غير واضح المعالم، لا حصل فيلم أكشن محترم ولا جاب فيلم كوميدي لطيف، أما هوليوود فبـ تقدر تقدم المزيج ده يمكن بشكل أفضل بعض الشىء، لكن يعيب القائمين على فيلمنا أنهم حبوا يزودوا الجرعة شوية فـ خرج الفيلم فى النهاية مترنح مش قادر يوصل لأى هدف من أهدافه.

طبعًا مش متوقعين كثير من الموسيقى التصويرية أو الديكور فى النوعية دى من الأفلام، لأن الهدف منها بـ يكون التسلية وتضييع وقت المشاهدين وخلاص، بالتالى نقدر نقول أن عوامل الديكور والموسيقى وباقى الأمور المساعدة لإنجاح العمل السينمائى كانت موجودة بالحد الأدنى لها، وده من عوامل ضعف الفيلم من وجهة نظرنا.

مافيش أكثر من كده نقوله عن Ride along أكثر من أنه فيلم خفيف ممكن تشوفه فى الأجازة وما تتوقعش منه أكثر من بعض الضحكات ومشاهد الأكشن بـ يربطها خيط درامى واهى.