زي الشرطة فى معظم دول العالم له هيبة واحترام كبيرين، تصميمات الأزياء بـ تحرص على جعل أزياء الشرطة حازمة وتوحي بالقوة والسيطرة، يمكن ده اللي دفع ريان وصديقه جاستن لارتداء زي الشرطة في أحد الحفلات التنكرية، لكن في أحداث الفيلم، بـ يختار المخرج والمؤلف لوك جرينفيلد أن زي الشرطة يحول حياة أبطال الفيلم جاك جونسون ودامون واينز لجحيم من الكوميديا والسخرية اللي بـ تمتد على طول أحداث الفيلم.

كلما كانت الأحداث والمهن اللي بـ يتناولها الفيلم الكوميدي جدية، كلما كانت جرعة الكوميديا الخارجة منها أكثر حماسة وانطلاقًا، وده بـ ينطبق على Let's Be Cops، وعلى نفس الوتيرة اللي تم تقديم فيلم زي Wild Hogs في 2007 بها، وكان الفيلم بـ يتكلم عن مجموعة من قائدي الدراجات البخارية اللي بـ يوقعهم حظهم العاثر فى كثير من المطبات الكوميدية.

الفيلم يعتبر دويتو فى الأداء الكوميدي بين جاك جونسون و دامون واينز وبصراحة ما قدرناش نقول مين أضحكنا أكثر من الثاني، وبشكل أو بأخر حسينا أن الأداء الكوميدي فى السيناريو كان موزع بالتساوي على البطلين، وده درس كبير نتمني ممثلي الكوميديا فى مصر يتعلموه، أن أنتاج فيلم كوميدي مش لازم يقوم به بطل واحد منفرد زي محمد سعد أو حتى عادل إمام، وأن البطولات الكوميدية المعتمدة على الثنائيات ممكن تكون أكثر نجاحًا وإضحاكًا.

Let's be cops من نوعية الأفلام اللى رأي الناس فيها بـ يكون أما أنها أفلام فى غاية الروعة أو أفلام فى قمة السوء، مافيش حلول وسط بالنسبة للنوعية دي من الأفلام، ودي كانت نوعية الأراء اللي صادفتنا لما شوفنا أراء الناس، أما أنهم متفقين وعاجبهم الفيلم جدًا وأما الموضوع منتهي بالنسبة لهم وبـ يكرهوا اللحظة اللي دخلوا فيها الفيلم.

بالنسبة لنا الفيلم كان جيد وملىء بالكوميديا المعتمدة على المواقف الكوميدية والإيفيهات أيضًا .. ياريت تشاركونا رأيكم بعد مشاهدة الفيلم.