إيه اللي ممكن يحصل لما تشتري شركة زي "ديزني Disney" المتخصصة في الرسوم المتحركة الحديثة، شركة ضخمة زي "مارفل Marvel" متخصصة في شخصيات الكوميكس والشخصيات الأسطورية؟ النتيجة باختصار هي ظهور فيلم متميز، كامل ومتكامل ومش ناقصه أي شىء، فيلم مبهر على مستوى الإنتاج وموحي على مستوى الخيال والشخصيات والسيناريو، وهو ده اللى حصل مع Big Hero 6.

الفيلم اللى ألفه وأخرجه دون هال وشاركه فى الإخراج كريس ويليامز بـ يحكي عن فريق من الأبطال اللى عندهم عدد من التقنيات المذهلة بعد التطور التكنولوجي الكبير اللى بـ يشهده الكوكب، بـ يحاول الفريق يتصدوا لمجموعة من الأشرار.

القصة من الخارج تبدو بسيطة وسطحية، وإلى حد ما التيمة حسينا أنها مكررة وقد يكون جزء كبير منها مأخوذ من الأفلام اليابانية اللى فيها وحوش عملاقة وكائنات ضخمة، لكن مع التعمق فى المشاهدة ومتابعة أحداث الفيلم بـ نكتشف أن حتى التيمة البسيطة ممكن يخرج منها فيلم متميز وقوي زى Big Hero 6.

الأداء الصوتي للأبطال وخصوصًا سكوت أدسيت فى دور باي ماكس كان متناسب جدًا مع الشخصيات الكرتونية، وقدر الأبطال ريان بوتر ودانيل هيني وغيرهم من تجسيد الشخصيات اللى ظهرت أمامنا على الشاشة بشكل محترف ومتميز.

الفيلم اللى كان بـ ينتظره كثير من عشاق الشركتين العملاقتين فى مجالاتهم ديزني ومارفل كأول تعاون بعد اندماج الشركتين، نقدر نقول أنه حقق المطلوب منه وقدم لمحبيهم فيلم يستحق المشاهدة من الكبار قبل الصغيرين، على الرغم من الاعتماد على قصة قديمة وتقديمها بشكل كبير وجديد.

الخيط الكوميدي اللى تم إضافته للأحداث من خلال الآلى العملاق (باي ماكس) كان من الإضافات الجديدة والمتميزة، واللى أدى لجرعة من الكوميديا كانت ناقصة الأحداث، وتم استغلال الشخصية بشكل كبير من خلال أحداث التريلر الأول للفيلم وجذب الجمهور بناء على المشاهد اللى تم عرضها من الفيلم على يوتيوب ومواقع التواصل الاجتماعي.

الموسيقى التصويرية زي ما عودتنا ديزني دائمًا بـ تكون جميلة وملهمة، وتم الاهتمام بتفاصيلها بشكل كبير، كمان التحريك وأسلوب حركة الشخصيات كانت متميزة وقوية زي ما ديزني تعودت دائمًا.

Big Hero 6 قد يكون أفضل أفلام 2014 للأنيميشن، وهو نتاج قوي لتعاون شركتين ضخمتين، وندعو كل محبى النوعية دى من الأفلام أنهم يتفرجوا عليه ويمتعوا عيونهم بمستوى جديد ومختلف من الأنيميشن.