دليل كايرو 360 لأفضل 10 أفلام نزلت دور العرض فى 2014 - أفلام Feature - كايرو 360
 







دليل كايرو 360 لأفضل 10 أفلام نزلت دور العرض فى 2014
دليل كايرو 360 لأفضل 10 أفلام نزلت دور العرض فى 2014
اصدرت في: 25/12/2014

الاختيار كان صعب جدًا على محرر الأفلام فى كايرو 360، ما بين أكثر من 200 فيلم فى 2014 كان لازم يختار 10 أفلام فقط، الأمر اللى جعل مسئولية الاختيار أصعب، وتم استبعاد بعض الأسماء فقط لأن فيه أفلام أفضل منها، حتى وإن كانت الأفضلية بنسبة صغيرة.

حابين بس نلفت النظر إلى أن ترتيب الأفلام هنا مالوش أى علاقة بالأفضلية، يعني الأول مش الأحسن والأخير مش الأسوأ.

 

12Years a Slave

الفيلم المقتبس عن قصة حقيقية، واللى أخرجه ستيف ماكوين ومن بطولة شيوتيل أيجيفور بأداء أسطوري مع ظهور غير تقليدي لبراد بيت بـ يحكي عن قصة رجل حر بـ يتم اختطافه وبيعه كعبد، ثم بـ تتوالى الأحداث على مدار 12 سنة فى سعي الرجل لإثبات حريته وحربه ضد العبودية.

الفيلم بالإضافة لقوة كل العناصر فيه، إلا أنه بـ يتمتع بقدر عالى من الحزن والكآبة على مدار الأحداث اللى بـ تعرفنا قد إيه كان المجتمع الأمريكي عنصرى فج فى فترة سوداء من تاريخه.

 

The Wolf of Wall Street

الجنون هو الاسم الوحيد اللى ممكن نطلقه على المغامرة الدرامية الكوميدية الساخرة اللى قدمها ليوناردو ديكابريو فى دور مليونير غريب الأطوار، مع المخرج المجنون بدوره مارتن سكورسيزي.

الفيلم اللى خسر تعاطف النقاد ولم يحصل على أوسكار واحد، لكن حقق مبيعات متميزة، بـ يحكي عن مليونير غريب الأطوار بـ يحقق ثروة فائقة من خلال العمل كسمسار للبورصة، والفيلم برضه مقتبس عن قصة حقيقية غريبة.

لازم كمان نقول أننا على الرغم من وقوفنا ضد الرقابة الفنية على أي منتج سينمائى، إلا أن الرقابة على الفيلم ده تحديدًا كانت واجبة، ده اللى عرفناه لما شوفنا النسخة الأ Uncut، واللى عرفتنا أن حوالى 45 دقيقة تم حذفها من الفيلم بسبب المشاهد الجنسية الصارخة، لكن الفيلم يظل من أفضل الأعمال فى 2014.

 

الفيل الأزرق

على الرغم من التوقعات المبالغ فيها بخصوص الفيلم، إلا أن الفيل الأزرق يظل من أفضل الأعمال السينمائية المصرية فى 2014 بلا منازع، بأداء متميز من كريم عبد العزيز وخالد الصاوي، وإخراج متزن من مروان حامد، وكتابة متميزة من أحمد مراد اللى الفيلم مأخوذ عن روايته الأشهر اللى بـ تحمل نفس الاسم، الفيلم بـ يحكي عن عالم الأمراض النفسية من خلال يحيى الطبيب النفسى اللى بـ يرجع لعنبر "8 غرب" فى العباسية، فقط علشان يكتشف إصابة أعز أصحابه بمرض عقلى بـ يدفعه لقتل زوجته، ثم بـ تتوالى الأحداث.

 

Guardians of the Galaxy

واحد من أحلى أفلام الفانتازيا اللى شوفناها فى 2014 بلا مبالغة، حوالى ثلاث ساعات من الانفصال التام عن العالم ودخول عالم سحرى جميل وجديد من خلال محاولة "ستار لورد" الحصول على منافع شخصية من خلال القيام بعمليات سرقة على مستوى المجرة بالكامل، بمساعدة شخصيات غريبة وكوميدية.

على الرغم أننا ما عندناش كثير نقوله عن "حراس المجرة" إلا أن مشاهدة الفيلم هى خير ضمان للمتعة الكبيرة اللى هـ يلاقيها كل محبى الفانتازيا.

 

Interstellar

بما أننا لسه خارجين من فيلم فانتازيا، يبقى الخيال العلمي هو أقرب محطة لنا.. إخراج كريستوفر نولان المُحكَم جدًا والقوي إلى درجة الإبداع فى Interstellar يخلينا نقدر نعتبره أفضل فيلم خيال علمي فى 2014.. التفاصيل الصغيرة والسيناريو القوي والأحداث المتشعبة اللى هـ تحتاج منكم تركيز شديد وتعمق أشد وبعض القراءات عن قوانين الفيزياء قبل الفيلم وبعده، من أهم الأمور اللى جذبت انتباهنا فى الفيلم اللى هـ يسترعي انتباه المشاهدين والنقاد حتى بعد نهاية 2014 بفترة.

 

Gone Girl

فى رأينا هو أفضل فيلم غموض وإثارة فى 2014، من إخراج ديفيد فنشر، وبطولة بن أفليك بـ نشوف قصة اختفاء امرأة، ورحلة البحث عنها اللى بـ تقودنا لمجموعة من الحقائق الأغرب من الخيال، لدرجة أننا عند مرحلة من الفيلم حسينا أننا فى رحلة للبحث داخل النفس البشرية المعقدة أكثر من البحث عن شخص مفقود!

الفيلم اللى حظى بإعجاب النقاد واهتمام المشاهدين حول العالم قدر يجذبنا من الثانية الأولى للثانية الأخيرة دون توقف، على الرغم من أنه يعتبر من الأفلام الطويلة نسبيًا، ونرشحه جدًا لكم للمشاهدة والاستمتاع.

 

Big Hero 6

نستريح شوية من الغموض والخيال العلمي ونتكلم شوية عن الأنيميشن.. الفيلم نتاج انضمام شركتين بحجم ديزني ومارفل، الأولى فى عالم صناعة الأفلام والثانية المتخصصة فى شخصيات الأبطال الخارقة وقصص "الكوميكس".. النتيجة هى فيلم بحجم Big Hero 6 وبميزانيته الضخمة وقدرته على الإبهار وترشيحنا للفيلم كأفضل فيلم أنيميشن فى 2014.

 

Annabelle

من الأنيميشن للرعب مباشرة... هو مش أفضل فيلم رعب فى التاريخ كله، لكن بالنسبة لفترة 2014 اللى كانت الأفلام الخاصة بالرعب فيها من أضعف ما يمكن، نقدر نعتبر "أنابيل" المقتبس عن قصة حقيقية أفضل فيلم رعب خلال عام، التحدي الأكبر أمام صناع الفيلم كان يتمثل فى صنع "دمية" المفروض أن ما ينفعش أى شخص بالغ عاقل يخاف منها، ثم تحويلها لعنصر مرعب للغاية، ومجرد ظهورها أمام الشاشات كفيل لتعالى الصرخات أو حتى هروب الناس أثناء فترة الاستراحة!

 

فتاة المصنع

أول فيلم عربى يحصد 5 نجوم فى كايرو 360 منذ بداية عمل محرر الأفلام، الحالة الجميلة اللى دخلنا فيها الرائع محمد خان، والأداء المتميز للجميلة ياسمين رئيس، وصوت يسرا الهوارى فى التترات، كان من أهم العوامل اللى شجعتنا نعتبر الفيلم واحد من أفضل الأفلام العربية فى 2014، بـ يأخذنا داخل رحلة ثرية جدًا فى حياة بنت مراهقة فى حي فقير، وعلاقتها بالحب والخير فى وسط مجتمع مش بـ يعرف غير الطعن فى الظهر والتلاسن بالكلام على الناس.

 

The Judge

التفاصيل والحيرة اللى بدأت تقريبًا مع بداية أحداث الفيلم، والعلاقة المتشابكة بين محامي وبين والده القاضى اللى بـ يتحول بين يوم وليلة لمتهم فى جريمة قتل لا فرار منها، كل العوامل دي أكسبت الفيلم رونق وقوة، وأكسبتنا الرغبة فى ترشيحه كواحد من أفضل الأفلام فى 2014.

 

وما بين سنة بـ تودعنا وسنة جديدة بـ نستقبلها، حابين نعرف رأيكم عن تفضيلاتكم الشخصية، وأحسن أفلام فى 2014 من وجهة نظركم، وإيه توقعاتكم السينمائية لـ 2015 ولحفل الأوسكار القادم!

كل عام وأنتم طيبين!

مزيد من الصور
  • دليل كايرو 360 لأفضل 10 أفلام نزلت دور العرض فى 2014
  • دليل كايرو 360 لأفضل 10 أفلام نزلت دور العرض فى 2014
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد حمدي
حرر بواسطة:
محمد حمدي
تاريخ النشر:
25/12/2014
كائن سكندرى الهوى والاتجاه، يتغذى عقليًا على الكتب والأفلام، يتكاثر فى مواطن التظاهرات، يتغلب على الروتين بالسفر والكتابة، يبحث عن بنت الحلال، يقدس الحياة الزوجية، يشارك فى الأثاث، يحفظ بعيدًا عن متناول الأطفال.