مش عارفين، هل المشكلة كانت فى إخراج "كلوديو فاه" أم فى أن الفيلم صدر بينما مجموعة من الأفلام المرشحة للأوسكار بـ يتم عرضها فى مصر؟ لكن فى كل الأحوال، الفيلم فشل فى إثارة انتباهنا بأى حال من الأحوال، حتى مع مشاهد العاصفة البحرية اللى بـ تتصدر المشاهد الافتتاحية للفيلم، واللى بـ يحكي عن محاولة مجموعة من رجال الفايكنج اللى بـ يعلقوا خلف خطوط العدو على ساحل "ألبا"، الأمر اللى بـ يجعلهم محط حصار أعدائهم، خصوصًا مع انضمام ابنة الملك (تشارلي ميرفي) لهم.

لاحظنا الضعف الإخراجي بداية من المشهد الأول، ومع غياب التشويق وقدرتنا على استنتاج الأحداث بالكامل تقريبًا، تحول الفيلم لحوالى ساعتين من الملل الشديد والأحداث المتوقعة، خصوصًا مع الأداء التمثيلي للأبطال جيمس نورتن وريان كونتن وليو جورجي اللى تم تقديم شخصيته كشرير الفيلم من اللحظة الأولى للأحداث، وخصوصًا مع مشهد تحرشه بتشارلي ميرفى اللى قامت بدور البطولة النسائية فى الفيلم.

الموسيقى التصويرية كانت كويسة إلى حد ما، الديكورات كمان قدرت تنقلنا للمرحلة الزمنية اللى بـ يتكلم عنها الفيلم، والتصوير فى المناطق الطبيعية والمشاهد الخارجية كان كويس، لكن كان ينقص كل ده إخراج أقوى، وأداء تمثيلي أفضل علشان الفيلم يكون أفضل من كده.

دائمًا بـ نحاول يكون كلامنا عن الأفلام بشكل عام أكثر تخصصًا وعمقًا، لكن فى حالة Northmen - A Viking Saga حاسين أن الكلام عن الفيلم أكثر من كده هـ تكون إضاعة للوقت والجهد، لكن آخر نصيحة ممكن نعطيها لكم بخصوص الفيلم، هى أنكم المفروض تنتظروا الفيلم لحين عرضه فى الفضائيات، وبلاش حتى تحملوه من خدمات زي iTunes لأن الفيلم لا يستحق سوى مشاهدة مجانية مع سناكس فى نهاية الأسبوع.