على الرغم من الملل اللى ممكن يتسرب للبعض نتيجة الأفلام المأخوذة عن قصص حقيقية، نتيجة تضييع الوقت في كثير من الحوارات أو تأخير الجزء الخاص بالمغامرة لقرب نهاية الفيلم أو غيرها من عيوب الأفلام المأخوذة عن قصص حقيقية، إلا أن The Walk قدر يتفوق على كل الأمور دي ويقدم مغامرة سينمائية مأخوذة عن قصة حقيقية وفي نفس الوقت يحافظ على الجانب الخاص بالإبهار والمغامرة في الفيلم.

من إخراج روبرت زيميكس وبطولة جوزيف جوردن لوفيت وستيف فالنتين وبن كنجسلي وجيمس بادج دايل بـ نشوف فيلم مقتبس عن قصة حقيقية عن محاولة لاعب الأكروبات الفرنسي فيليب بيتوي واللى بـ يحاول أنه ينجح في فقرة سير على الحبل بين مبنيين التجارة العالميين، وبـ يستعرض الفيلم محاولة فيليب بتفاصيلها مع التركيز على قصة حياته منذ صغره وحبه اللى بـ يوصل لمرحلة الإدمان للقيام بألعاب الأكروبات والألعاب الخطرة، بـ نعتقد أن الكلام عن مبنى التجارة العالمي ما أصبحش تابو عند الأمريكان لحد دلوقت.. وفاكرين كويس قد إيه كان مجرد التفكير في تقديم أفلام عن أبراج التجارة العالمية في الفترة اللى سبقت ضرب البرجين في عملية إرهابية كان بـ يتعرض لكثير من الآراء الاستباقية اللى بعضها ممكن يكون سلبي نتيجة تحول البرجين لنقطة سوداء في التاريخ الأمريكي وتذكير دائم بعجز الإدارة الأمريكية عن حماية رمز الهيمنة الاقتصادية الأمريكية على العالم الحديث.

الحقيقة أن روبرت زيميكس قدر يتجاوز كل العقبات دي ويقدم فيلمه بدون خوف من أي اعتبارات، ولازم نعرف أن روبرت زيميكس هو مخرج فيلم Forrest Gump واللى قدر من خلاله أنه يوظف تقنيات الخدع السينمائية وتقنيات الكمبيوتر بشكل تقريبًا ما حصلش قبل كده في السينما الأمريكية، لأن عنده القدرة على توظيف كل الخدع دي بدون مبالغة أو تعقيد وبدون ما يلاحظ المشاهد أن فيه أي شىء غير طبيعي في المشهد زي مشهد "الريشة" على سبيل المثال فى Forrest Gump وغيرها من المشاهد، ده نفس اللى حصل في The Walk. 

بالنسبة للأداء التمثيلي نقدر نقول أن أداء جوزيف جودردون ليفيت ما كانش بنفس العبقرية اللى كان عليها الإخراج والمؤثرات الخاصة، وفي رأينا أن الفيلم كان محتاج بطل ثاني أثقل تمثيليًا لكن أكيد مش أثقل وزنًا، لكن دور زي بن كنجسلي وعلى الرغم من صغر مساحة الدور على صعيد السيناريو، لكن مين قال أن دائمًا قوة الأدوار بـ تتحسب بعدد مرات الظهور؟!

العرض بتقنية الـ 3D أكسب الفيلم رونق وبُعد جديد، ويعتبر The Walk واحد من الأفلام اللى استغلت التقنية ثلاثية الأبعاد بشكل صحيح بعيدًا عن الاستخدام التجاري لزيادة سعر التذكرة والسلام.

The Walk واحد من أحسن الأفلام اللى شوفناها مؤخرًا.. نرشحها لكم للمشاهدة في حالة طبعًا لو كنتم مش بـ تخافوا من المرتفعات!