دليل كايرو 360 لأفضل 10 أفلام لعام 2015 - أفلام Feature - كايرو 360
 







دليل كايرو 360 لأفضل 10 أفلام لعام 2015
دليل كايرو 360 لأفضل 10 أفلام لعام 2015
اصدرت في: 28/12/2015

لازم نعترف أن سنة 2015 كانت مميزة جدًا على الصعيد السينمائى، من حيث الأفلام اللى تم طرحها أو النجوم اللى خاضت مباريات حقيقية فى التمثيل والأداء، المخرجين اللى أنفقوا كثير من الوقت والجهد علشان يقدموا أفلام حقيقية وقوية وقادرة على المنافسة فى سوق لا يرحم.. كل العوامل دي خلت اختيارنا لأفضل 10 أفلام فى 2015 صعب ومحير إلى أقصى درجة.

لازم نعترف أن بعض الأعمال تم استبعادها من القائمة علشان نقدر نقدم لكم 10 أفلام فقط، والبعض الآخر تم استبعاده علشان نقدر نقدم تشكيلة مختلفة من الأفلام اللى تناسب كل الأذواق واللى بـ... ما تيجوا نشوف...

 

10. He Named Me Malala

في رأينا هو أفضل فيلم وثائقي فى 2015 لأنه قدر يخرج به من الجانب الممل والتقريري، إلى جانب إشراكنا فى حياة أبطال الفيلم نفسهم، وتحويلهم لممثلين فى فيلم بـ يحكي قصة حياتهم! ولما القصة دي كمان تكون أصلية وقوية ومثيرة ومختلفة ساعتها بس حسينا أننا أمام عمل استثنائى وقوي ومؤثر.

 

9. Inside out

فى رأينا الفيلم اللى أخرجه وألفه بيتي دوكتر يعتبر أحسن فيلم أنيميشن فى 2015، والميزة فى الفيلم أنه مش بـ يكتفى فقط بتوجيه رسالته الأساسية للصغار بل بـ يخاطب الكبار كمان، إحنا كمان ممكن نروح لأبعد من كده ونقول أن الفيلم له طابع فلسفي جميل ومحبب ومختلف عن باقى أفلام الأنيميشن الثانية، كمان الفيلم يعتبر واحد من أحدث وأكبر وأهم إصدارات شركة Pixar العالمية فى مجال الأنيميشن.

 

8. Kingsman: The Secret Service

السبب الرئيسيى لاختيارنا Kingsman بـ يتمثل فى قدرته على تقديم أكثر من تيمة من خلال أحداثه، بداية من السخرية والكوميديا ومحاكاة أفلام الجاسوسية الشهيرة، وانتهاء بتقديمه جرعة حقيقية من الأكشن الصادق والمتميز واللى خلانا مشدودين لمتابعة الأحداث من البداية للنهاية، الفيلم كمان حقق واحدة من أكبر إيرادات الافتتاحات فى هوليوود بمجرد عرضه فى الولايات المتحدة.

 

7. قدرات غير عادية

رائعة المخرج والمؤلف داوود عبد السيد، واللى قدم من خلالها عمل فلسفي درامي شيق كعادته.. واللى قدر ياخد لقب أفضل فيلم عربى فى 2015 على الرغم من كثرة الإنتاجات العربية فى الفترة الأخيرة، إلا أن كلها كانت ضعيفة ولا ترقى للمستوى المطلوب، لكن داوود قدر يقدم فيلم بـ يجمع بين التشويق والفلسفة والرموز الخفية فى أفلامه، وهى خلطة سينمائية مش بـ يحبها أو يفهمها إلا عشاق سينما داوود عبد السيد، إلى جانب قدرته الفذة على مخاطبة كل المستويات والعقول فى أعماله.

 

6. Mission Impossible: Rouge Nation

على الرغم من المنافسة الشرسة بين فيلم جيمس بوند الجديد وبين الجزء الأحدث من Mission Impossible إلا أن الأخير قدر يحسم السباق لصالحه بعد شعورنا بأن جيمس بوند بـ يعيد تكرار نفسه وبـ يقدم تيمات محفوظة من الأفلام السابقة علشان كده فى رأينا أن توم كروز بأحدث أفلامه يستحق لقب أفضل فيلم أكشن فى 2015 لأنه قدر يقدم أكشن جديد ومختلف ومشاهد صعبة أداها بنفسه، بالإضافة لقدرته على الحفاظ على متابعة واهتمام المشاهدين الأصليين للسلسلة.

 

5. Mad Max

لسه فى محطة الأكشن مع فيلم آخر لا يقل تميزًا وإن كان يزيد، وهو فيلم Mad Max واللى بـ يقدم لنا رحلة صراع من أجل البقاء، اختيارنا للفيلم كان نتيجة الاهتمام غير العادي بالتصوير وإخراج مشاهد المطاردات والحركة، واللى تم الاستعانة فيها ببعض لاعبي السيرك! ألوان الفيلم كمان تركزت على الأحمر القاني بعيدًا عن الألوان الهادئة اللى كانت طاغية على باقى الأعمال السنة دي، وده طبعًا شىء يحسب للفيلم.

 

4.  By the Sea

واحد من أفضل الأفلام الدرامية فى 2015 واللى كتبته وأخرجته أنجلينا جولى فى تجربتها الثانية فى التمثيل مع زوجها براد بت -بعد نجاح فيلم Mr. & Mrs. Smith- واللى قدروا يقدموا من خلالها عمل متميز وشديد الخصوصية والقوة، اختيارنا للفيلم كان نتيجة التصوير المتميز والهادئ، والكادرات الواثقة الجميلة واللى ريحت عيوننا وأعصابنا وهيأتنا لاستقبال أحداث الفيلم اللى ما قلتش تميزًا عن باقى عناصره.

 

3.  Bridge of Spies

على الرغم من تنوع تصنيفات الأفلام بين الأكشن والرعب و..إلخ، إلا أننا مافيش أفلام جاسوسية السنة دي، علشان كده جاء اختيارنا للفيلم اللى أخرجه ستيفن سبيلبرج ومن بطولة توم هانكس وبـ يحاولوا ينافسوا به على أوسكار من جديد.

الخلطة "الهانك/ سبيلبرجية" عمرها ما فشلت قبل كده، سواء فىSaving Private Ryan وغيرها من الأفلام اللى تعاون فيها ستيفن مع هانكس، والمرة دي فى أحدث تعاوناتهم قدموا فيلم هادئ ومشوق ومستوى على نار هادئة من الخبرة السينمائية الفذة للاثنين.

 

2. The Perfect Guy

فى الفيلم ده بـ تتمثل فكرة البقاء لمدة حوالى ساعتين فى حالة انجذاب كامل لسيناريو قوي ومحكم وحوار مُعبر عن أدق مشاعر الأبطال، وأداء تمثيلي متميز وحبكة درامية أكثر من رائعة، بـ نعتقد أن The Perfect Guy من أفضل أفلام الإثارة والجريمة فى 2015.

 

1. Star Wars: The Force Awakens

على الرغم من كونه واحد من الأعمال اللى تم طرحها قبل نهاية السنة بوقت قصير، إلا أن الجزء الأحدث من سلسلة "حرب الكواكب" قدر يجمع بين محبى السلسلة القديمة وبحثهم عن النوستالجيا فى العمل الجديد، وبين الوافدين الجدد على السلسلة واللى تلاقوا فيها الإثارة والأكشن والمؤثرات الخاصة الأكثر من رائعة.

 

قبل ما نختم موضوعنا معاكم، حابين نلفت النظر لوجود بعض الأفلام المحسوبة على 2015 لكنها ما صدرتش لحد دلوقت فى السينمات المصرية، على الرغم من تعرضها للتسريب والقرصنة على الإنترنت زي The Hateful Eight وThe Revenant واللى بـ نتوقع أنها تكون من أفضل الأفلام خلال 2015.

منتظرين منكم فى التعليقات آرائكم الشخصية عن أفضل أفلام السنة دي.. وكل سنة وأنتم بخير وسعادة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد حمدي
حرر بواسطة:
محمد حمدي
تاريخ النشر:
28/12/2015
كائن سكندرى الهوى والاتجاه، يتغذى عقليًا على الكتب والأفلام، يتكاثر فى مواطن التظاهرات، يتغلب على الروتين بالسفر والكتابة، يبحث عن بنت الحلال، يقدس الحياة الزوجية، يشارك فى الأثاث، يحفظ بعيدًا عن متناول الأطفال.