أخيرًا جاء اليوم اللى نعطي فيه فيلم للسبكي تقييم أكثر من نجمة واحدة! تقييمنا الحالى للفيلم اعتمد على سؤال مهم: إيه الغرض الحقيقى من الفيلم؟ الغرض الحقيقي كان المرح والكوميديا.. الفيلم مش عاوز يقدم أكثر من كده، والمشاهد مش متوقع أكثر من كده.. إذًا وفقًا للتقييم على هذا الأساس الفيلم هـ يكون قوي ومؤثر.. لو متوقعين أكثر من كده من الفيلم تبقوا دخلتم الفيلم الغلط!

من تأليف عمرو بدر وإيهاب بليبل وإخراج شادي الرملي وبطولة عمر مصطفى متولى وبسنت السبقي وكريم عفيفي ونرمين ماهر، بـ نشوف قصة كوميدية لمجرم محترف اسمه طاعون (عمر مصطفى متولى) بـ يحاول يكون فريق من المجرمين لسرقة مجوهرات الفنانة أحلام أثناء تواجدها فى شرم الشيخ لإقامة أحد الحفلات.

فى طريقه لتكوين الفريق بـ يقع طاعون فى كثير من المواقف الكوميدية، وبـ يتعرف على البنت اللى بـ يرتبط بقصة حب معاها (بسنت السبقي)، بسنت وجه جميل عرفناها فى سلسلة إعلانات ميلودي تتحدى الملل، شاركت بعد كده فى عدة أدوار وانتهى بها المطاف مع فريق أوشن 14، عجبنا جدًا مشهد التريقة فى أول الفيلم على فيلمDesperado وهو مشهد مش هـ يفهمه إلا اللى اتفرج على الفيلم التسعيناتي الجميل اللى قام ببطولته أنطونيو بانديراس مع سلمى حايك، كمان عجبنا المشاهد النهائية اللى بـ يظهر فيها حالة من الفانتازيا بتصوير شرم الشيخ كلها وهى واقعة تحت تأثير حبوب الهلوسة الخاصة بالفنان بيومي فؤاد واللى قدم دور متميز.

مشهد الهلوسة فى بداية الفيلم كان قوي وكوميدي إلى أقصى درجة.. طبعًا لازم نتكلم عن الاستعراضات المحشورة فى الفيلم، وبعض المشاهد اللى ممكن تكون مش مناسبة للمشاهدين المتحفظين، لكن فى الأول وفى الآخر ده فيلم للسبكي ومعمول للكوميديا ومستهدف فئة المراهقين والشباب.. بالتالى الناس اللى داخلة الفيلم كانت عارفة هى داخلة تشوف إيه بالضبط.

آخر حاجة هـ نتكلم عنها هى ظهور السبكي فى الفيلم، وهو يعتبر واحد من أطولها للسبكي فى الفيلم، وأثار ظهوره عاصفة من الضحك فى قاعة السينما وإن كانت الألفاظ اللى استعملها السبكي فى ظهوره ممكن تكون غير ملائمة.

أوشن 14 فيلم مش بـ يقدم غير الكوميديا والاستعراض والأغنية.. لو عاوزين فيلم جاد ننصحكم بمشاهدة فيلم ثانى، لكن لو بـ تدوروا على تقضية حوالى ساعتين من الكوميديا الفانتازية.. الفيلم هـ يعجبكم.