جرين أواسيس: حمام سباحة وملاعب في طريق مصر الإسكندرية الصحراوي - صحة ولياقة Feature - كايرو 360
 







جرين أواسيس: حمام سباحة وملاعب في طريق مصر الإسكندرية الصحراوي
جرين أواسيس: حمام سباحة وملاعب في طريق مصر الإسكندرية الصحراوي
اصدرت في: 02/10/2011

رحلة اليوم الواحد ممكن تكون متعبة لو كانت المسافة اللي هـ تقطعها وأنت راكب طويلة. بـ توصل المكان لو كان بره القاهرة وبـ تبدأ الأنشطة المعتادة سواء اللعب في البحر لو كان فيه بحر، أو حمام سباحة أو رياضات أو حتى كوتشينة، وبعد ساعتين أو ثلاث ساعات بـ تبدأ تحس بالإرهاق على طول وتبقى حامل هم رحلة الرجوع وتبدأ تفكر في "هـ نرجع إمتى" قبل الرحلة نفسها ما تبدأ.

في طريق مصر إسكندرية الصحراوي وبعد بوابات الرسوم في القاهرة بحوالي 14 كيلو، هـ تلاقي يافطة على يمين الطريق مكتوب عليها بخط مش واضح «Green Oasis - جرين أواسيس»، ولأن القرية على الصف الشمال اللي راجع على القاهرة يبقى تأخذ أول لفة وتبدأ تمشي بالراحة ناحية اليمين لحد ما تلاقي ورشة تصليح إطارات حاطة كام كاوتش على الطريق، تدخل قبلها بحوالي 100 متر يمين، المدخل عبارة عن بوابة كبيرة مش مكتوب عليها أي حاجة، هـ تتأكد من فرد الأمن الموجود أن هي دي «جرين أواسيس» والمكان عبارة عن مجمع سكني أو Compound والمكان اللي أنت بـ تقضي فيه اليوم هو النادي الرياضي الخاص بالمجمع، واللي كان مخصص زمان لسكان القرية فقط، لكن تم فتح باب الزيارات والحجز قبلها بفترة كافية لقضاء رحلات الاستخدام لليوم الواحد أو الـ Day Use .

بعد ما هـ تدخل من البوابة هـ تمشي طريق ضيق مشجر طوله حوالي كيلو متر لحد ما توصل للنادي الموجود على الصف اليمين. النادي من الداخل مساحته مش كبيرة لكن المساحات الخضراء الممتدة بـ تعطي لك إيحاء أنه واسع، حمام السباحة تصميمه ظريف، عبارة عن 3 مستطيلات متصلة ببعض بشكل متعرج، وفيه جزء خاص للأطفال وركن ثاني ممكن تقعد فيه على درجات سلالم وتأخذ مشروبك.

فيه ملاعب كرة قدم وكرة طائرة وصالة ألعاب فيها بعض أجهزة الجيمانزيوم وترابيزة بلياردو وتنس طاولة، وغرفة ساونا وجاكوزي، وكل الحاجات دي تقدر تستخدمها على مدار اليوم بنفس القيمة المدفوعة للفرد لقضاء يوم واحد وهي بـ تكون من 80 لـ 100 جنيه شاملة وجبة غذاء، والسعر بـ يختلف حسب اختلاف نوع الأكل اللي بـ تحدده أثناء الحجز. ويفضل تحجز قبلها بيومين أو أكثر علشان المكان بـ يكفي عدد محدد من الأفراد.

المكان مثالي للاسترخاء وقضاء يوم جميل وهادئ جدًا على حمام السباحة والمساحات الخضراء والأشجار حولك في كل مكان، حتى المبنى اللي فيه صالات الألعاب وغرف تغيير الملابس والمطعم تصميمه الخارجي تحفة، بـ يفكرنا بفيلات ريف أوربا، وفي وقت من اليوم تم تشغيل موسيقى بسماعات خارجية تسمَّع النادي كله، لكن ده مش طول الوقت لأن الغرض الأساسي من المكان هو الهدوء وعدم سماع أي أصوات غير صوت "البلبلطة" في المياة.

الأكل عبارة عن وجبات موحدة فيها أرز أو مكرونة وسلاطة وبـ تختار بين الدجاج المشوي أو البانيه أو الشيش طاووق أو الكفتة المشوية، وبـ تحدد من أول ما تروح تحب الأكل ينزل الساعة كام بالضبط، لكن لازم تدخل تأكل في المطعم، ما ينفعش تأكل على حمام السباحة. الكميات قليلة في الوجبة وممكن ما تشبعش فرد واحد، ده غير أن الطعم مش حلو قوي، فـ بـ نقترح عليك أنك يكون معاك الأكل بتاعك لو ناوي تقعد طول اليوم.

فيه غرف تغيير ملابس وحمامات رجال وسيدات؛ نظيفة وواسعة جدًا، وفيه مكان للصلاة، وفيه بوفيه لو حبيت تطلب أي مشروبات ساخنة أو مشروبات غازية، وفيه شيشة بنكهات مختلفة بـ تيجي لك مكان ما أنت قاعد.

الحاجات اللي ممكن تعملها هناك هي كل حاجة ممكن تعملها في تجمع أنت وعيلتك أو أصحابك: كوتشينة، ودومينو، وشطرنج، وراكيت، ممكن حتى تلعبوا أي لعبة فيها جري وحركة لأن المكان يسمح بكده، والمساحات الخضراء مغرية أنك تجري عليها أو تنام عليها وتتفرج على السماء الزرقاء.

علشان تحجز بـ تتصل برقم أستاذ أحمد فريد المسئول عن الحجز بالمكان على رقم 0123222988 وبـ تعرف منه كل التفاصيل الخاصة بالمواعيد والأسعار وعدد الأفراد والوجبات. المكان مفتوح للزيارات من الساعة 11 صباحًا للساعة 7 مساءً.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
وليد أبوعرب
حرر بواسطة:
وليد أبوعرب
تاريخ النشر:
02/10/2011
محرر مساعد سابق - بـ يحب الخروج، دماغه فى الفرق الموسيقية وبـ يلعب مزيكا، بـ يحب يكون عنده معرفة عن كل شيء، بـ يزهق بسرعة! ما بـ يحبش تويتر.