أكاديمية أجياد: منتجع ترفيهي وتعليمي في مدينة 6 أكتوبر - صحة ولياقة Feature - كايرو 360
 







أكاديمية أجياد: منتجع ترفيهي وتعليمي في مدينة 6 أكتوبر
أكاديمية أجياد: منتجع ترفيهي وتعليمي في مدينة 6 أكتوبر
اصدرت في: 02/05/2012

في منطقة اسمها الحزام الأخضر المواجهة لمجمع "بيـﭭرلي هيلز" السكني في مدينة 6 أكتوبر اكتشفنا مكان جديد عبارة عن منتجع رياضي وترفيهي بـ يقدم خدماته من خلال تأجير شاليهات ليوم واحد أو من خلال فكرة الـ Day Use أو قضاء اليوم الواحد على حمام السباحة. المكان اسمه «أكاديمية أجياد للفروسية» وهو موجود داخل مزرعة ضخمة مقسمة لعزب وبيوت وسط المساحات الخضراء، و«أجياد» هو واحد من العزب دي وفيه بيت ريفي له قبة ضخمة، وخلفه مساحات فيها حمامات السباحة والملاعب وأسطبل للخيل وغيرها من وسائل التسلية.

إزاي تروح المكان:

لو معاك عربية الدنيا هـ تبقى أسهل كثير، هـ تدخل مدينة 6 أكتوبر من المحور أو من طريق الواحات، والأفضل أنه يكون المحور اللي بـ يدخل على الشيخ زايد و«هايبر وان» ومن هناك تخلي هايبر وان على شمالك وتمشي على طول لحد ما تلاقي مدخل (بيـﭭرلي هيلز) على يمينك وبعد كده تأخذ أول ملف ناحية الشمال قبل بوابات طريق مصر/إسكندرية الصحراوي وكأنك راجع ثاني على هايبر وان هـ تلاقي بوابة رقم 3 لمنطقة الحزام الأخضر وهي بوابة الدخول لـ (جمعية أجياد لاستصلاح الأراضي) زي ما مكتوب على البوابة. هـ تدخل من البوابة وتمشي مسافة 200 متر تقريبًا قبل ما تلاقي مدخل الكامب على الشمال. لو هـ تروح بمواصلات يبقى هـ تركب لمدخل الشيخ زايد أو هايبر وان وتأخذ تاكسي لمسافة مش كبيرة من هناك. مانعرفش أي مواصلات بـ تعدي هناك.

 

إيه موجود هناك:

منزل ريفي شكله ظريف فيه ريسبشن لاستقبال الزائرين والجلوس مع الإدارة وتحديد نوع الخدمة. المنزل له مخرج على مساحة خلفية أول حاجة هـ تشوفها فيها هي أسطبل الخيل وتراك خاص بتدريبات الفروسية، بعد كده فيه مطلع بـ يوصلك على منطقة الشاليهات وحمام السباحة (اللي حجمه صغير نوع ما) والأكواخ المحيطة به وترابيزات الجلوس، وخلف حمام السباحة فيه ملاعب كرة قدم وكرة سلة وصالة للرماية وألعاب تنس الطاولة والبيبي فووت وهوكي الهواء.

 

الأنشطة:

«أجياد» بـ تعمل نشاطات في أجازة نصف السنة وأجازة الصيف لطلاب المدارس من سن 6 لـ 16 سنة وطلاب الجامعات من سن 17 لـ 22 سنة تحت اسم (معسكرات المغامرة) ومن خلالها بـ يتم تعليم السباحة والرماية وركوب الخيل. ده غير معسكرات الكشافة العادية. ممكن تعمل رحلات سفاري وتقضي يوم كامل في صحارى 6 أكتوبر وممكن تأجر موتوسيكل رمل (Beach Buggy) وممكن تتعلم فنون زي الرسم على الرمال والفخار والأركت والسجاد اليدوي والتلوين على الزجاج.

 

الأسعار:

يوم على حمام السباحة مع وجبة غذاء لفرد بـ 75 جنيه، لو هـ تحجز شاليه تسيب فيه متعلقاتك وتغير فيه ملابسك هـ تدفع 600 جنيه شاملين وجبات لـ 8 أفراد والملاعب الرياضية المفتوحة. الأسعار دي لا تشمل أنشطة ثانية زي الخيل اللي بـ يتأجر بالساعة بـ 60 جنيه، والرماية (بنادق رش على أهداف ثابتة) اللي فيها الـ 20 طلقة بـ 25 جنيه. وممكن تأخذ كورس رماية بـ 250 جنيه. تعليم السباحة بـ 250 جنيه للكورس المكون من 8 حصص. وجميع الألعاب اللي داخل صالة الألعاب بـ تتأجر بأسعار من 10 لـ 20 جنيه للساعة.

 

الأكل:

وجبات الغذاء اللي قدمت لنا طعمها مش بطال لكن كمياتها قليلة، وقت زيارتنا ما كانش فيه غير فراخ مشوية أو فراخ بانيه مع اختيار من الأرز بالخلطة أو السباجيتي مع السلاطة الخضراء. مسموح باصطحاب المأكولات وأنت داخل، وفيه كافيتريا صغيرة للمشروبات والمقرمشات، وممكن تطلب أي وجبة زيادة بعد دخولك للمكان بس الأكل هناك بـ يأخذ وقت لتحضيره، يعني لازم تطلب قبل ما تجوع بساعة على الأقل.

 

الخدمة:

رغم الخدمات والوسائل الترفيهية الكثير في المكان اللي مش هـ تلاقيها في أماكن كثير، إلا أن الخدمة ينقصها الكثير من الاحترافية، من أول ما بـ تحجز مكانك وميعادك بالتليفون لحد ما بـ تروح هناك هـ تواجه لخبطة بسبب الإدارة. وعلشان تتفادى الموضوع ده حاول تتواصل مع شخص مسؤول من إدارة المكان، مش أي موظف يرد عليك تأخذ منه كل التفاصيل وتحجز معاه وخلاص، ولو وصلت أنك تطلب تتكلم مع صاحب المنتجع نفسه.

 

الحجز:

الحجز بـ يكون بالتليفون على الأرقام دي 01222117681 أو 01006635622 وممكن تعرف تفاصيل أكثر وتحجز من خلال الموقع الإلكتروني الخاص بنادي أكاديمية أجياد للفروسية.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
وليد أبوعرب
حرر بواسطة:
وليد أبوعرب
تاريخ النشر:
02/05/2012
محرر مساعد سابق - بـ يحب الخروج، دماغه فى الفرق الموسيقية وبـ يلعب مزيكا، بـ يحب يكون عنده معرفة عن كل شيء، بـ يزهق بسرعة! ما بـ يحبش تويتر.