مافيش شك أن معظمنا وزنه زاد خلال الشهرين اللى فاتوا. الشتاء الفظيع الطويل اللى عدى على القاهرة كان محتاج أكل سخن وقعدة أمام التليفزيون. وزى كل سنة، الصيف بـ ييجى فجأة وبـ نأخذ كام أسبوع علشان ندور على الشباشب والشورتات. علشان كده هو ده الوقت المناسب أننا نتخلص من وزن الشتاء الزيادة ونرجع لفورمة الصيف. «بووت كامب – The BootCamp» جايب لنا مفهوم جديد تمامًا للتمرين فى القاهرة، مفهوم هـ يخلى التمرين متعة أكثر وله تأثير أكبر.

فكرة "بووت كامب" بدأها نبيل ونورشيك، والاثنين مدربين معتمدين بشهادةISSA للأفراد والمجموعات. فيه ست حصص تمارين فى الأسبوع، ثلاثة منهم فى نادى الجزيرة فى الزمالك وثلاثة فى كومباوند جاردينيا فى مدينة 6 أكتوبر. الحصة الواحدة مدتها ساعة وبـ تشتغل على زيادة الأحمال، واللياقة البدنية، والطاقة، والقوة، والسرعة. أحلى حاجة فى بوت كامب أنه فى الهواء الطلق وبكده تقدر تتنفس هواء منعش وأنت بـ تتمرن. ثانى أحسن حاجة أنك دائمًا بـ تتمرن مع مجموعة بـ تتكون من عشرين فرد، ودي حاجة مشجعة جدًا.

إحنا اشتركنا فى حصة فى نادى الجزيرة، بووت كامب بـ يستخدم الملعب اللى داخل التراك القريب من ملعب الأسكواش. تبدأ الحصة بتمارين الإحماء اللى بـ تحسسك أنك فى تمرين جيش. قفز فوق حبال، مشى جانبى وسط أبراج سلك، وجرى للوراء وقفز للأمام. بعد جزء الإحماء بـ تبدأ مرحلة تمارين التحمل والتوازن. وأنت واقف ورجليك الاثنين ثابتين على الأرض، بـ تعمل تمارين مختلفة علشان إحماء العضلات. بعد كده بـ يبدأ المرح بمجموعة من التمارين زى العُقلة، والضغط، ورفع الأثقال. بعد ما تخلّص التمرين ده بـ تجرى بسرعة لمسافات قصيرة وبعدها تكمل تمارين ثانية. المراحل دي بـ تأخذ حوالى نصف ساعة. خلال آخر ربع ساعة من التمرين بـ تشتغل شوية أثقال، آخر التمرين بـ يكون عبارة عن شوية تمارين Stretching علشان عضلاتك ما توجعكش ثانى يوم.

نبيل ونورشيك مدربين شاطرين وبـ يهتموا بكل مشترك على حدة. ولو ما عرفتش مفروض تعمل إيه فى أى مرحلة من المراحل هـ يلحقوك بسرعة. الجو العام للمجموعة بـ يكون ممتاز كمان. بالرغم أننا عانينا شوية فى الحصة واليوم اللى بعده، لكن كنا أحسن بكثير بعد التمرين. بـ تعطيك دفعة طاقة كويسة وبـ تخلى كل العضلات تشتغل. بوت كامب مش بالضرورة يكون بـ يركز على تقليل الوزن لكن ده هـ يحصل لو حضرت بانتظام. كمان سمعنا أن ناس كثير من اللى بـ يحضروا بطلوا تدخين. وطبعًا إحنا فهمنا عملوا كده ليه، لأن بعد الحصة مجرد التفكير فى سيجارة كان حاجة مش مقبولة (بصراحة الشعور ده راح بعد حوالى نصف ساعة تقريبًا).

لو فعلاً عاوز تحط نفسك فى الامتحان وتمارس تمارين فى هواء منعش مع مجموعة ناس دماغهم قريبة من بعض، يبقى لازم تشترك في بووت كامب. الحصة سعرها 50 جنيه وفيه عروض على مجموعة الحصص.