اليوجا الصيفية: أفضل الحصص وورش العمل فى القاهرة - صحة ولياقة Feature - كايرو 360
 







اليوجا الصيفية: أفضل الحصص وورش العمل فى القاهرة
اليوجا الصيفية: أفضل الحصص وورش العمل فى القاهرة
اصدرت في: 06/08/2012

فن اليوجا العريق مش حاجة جديدة على مشهد اللياقة فى القاهرة، رغم أن خريطة النشاط الرياضى دائمًا فيها تغيير. الأيام دى بدأت تنتشر فى كل المناطق تقريبًا ستوديوهات للياقة، وحصص جديدة فى الجيم، ومراكز كاملة مخصصة لممارسة اليوجا.

فى الحقيقة انتشار الموضوع مش مفاجأة، نظرًا للفوائد الكثيرة اللى بـ تقدمها اليوجا. وزيادة على كده إحنا فى الصيف والحر بدأ يتعبنا. يا ترى فيه وقت أحسن من كده تعمل فيه شوية اتزان بين عقلك وجسمك وروحك؟ نقدر نقول لك إن الصفاء الروحى، والبدنى والعقلى اللى أنت محتاجه كله ممكن بشوية تمارين.

فيه عدد كبير من الستوديوهات والجيم فى المدينة بـ تقدم حصص يوجا بانتظام. بـ نقدم لكم هنا نماذج من الجلسات وورش العمل الموجودة حاليًا فى القاهرة:

أون ذا مات موجود فى شارع صغير متفرع من شارع شجرة الدّر فى الزمالك، وبـ يقدم مجموعة متنوعة من حصص اليوجا بسعر بسيط وهو 50 جنيه فى الساعة. مواعيد الحصص مختلفة وتقدر تلاقى حصص يوجا مختلفة زى حصة كوندالينى Kundalini yoga اللى مش منتشرة فى أماكن كثير ميعادها الساعة 8 مساءً يوم الثلاثاء، وحصة أشتانجاAshtanga yoga الساعة 5مساءً يوم الأربعاء، وفى يوم الأحد حصة فينياسا Vinyasa yoga بـ تبقى الساعة 6.30 مساءً. خدمات ثانية بـ يقدمها أون ذا مات زى مساج ayurvedic وجلسات ريكى Reiki sessions وهو نوع من العلاج اليابانى البوذى القديم بـ يستخدم نقل الطاقة للجسم عن طريق اليد أو بـ "palm healing".

كمان فى الزمالك موجود أشتانجا يوجا كايرو وده بـ تديره واحدة بس هى ميرا شحاتة. ميرا معروفة أنها بـ تشتغل مع كل فرد لوحده وبـ تستخدم طريقة ميزورى Mysore method فى كل جلسة فى أشتانجا. طريقة ميزورى بـ تخلى كل واحد يقدر يشتغل حسب قدراته، وعلشان كده حصص المجموعات مش متاحة. ميرا بـ تشتغل بالحجز بس، من 7.30 صباحًا لحد 10 مساءً، خمسة أيام فى الأسبوع. فيه حصص بالليل كمان يوم الأحد والثلاثاء الساعة 7 مساءً. تقدر تروح مرتين فى الأسبوع لمدة ثلاثة أسابيع (6 حصص بـ 600 جنيه) أو لمدة أربعة أسابيع أى عدد من الحصص لغاية 20 حصة بـ 900 جنيه.

توازُن ويلنيس ستوديو تقريبًا هو الستوديو الوحيد الموجود فى وسط البلد. ورغم المشاكل المستمرة فى ميدان التحرير والمناطق المجاورة له، توازن بـ يشتغل طبيعى معظم الوقت وفى مرات قليلة بـ يبقى فيه حصص ملغية. فى الساعة 7 مساءً يوم الثلاثاء، تقدر تجرب ساعة ونصف من يوجا سيفاناندا Sivananda yoga بـ 80 جنيه. كمان فيه ورش عمل مختلفة عادة بـ تبقى مواعيدها معروفة. شهر يونيو فيه ورشة للرقص التأمّلى يوم 25 من 7 مساء إلى 9 مساءً. سعر الحصة 200 جنيه.

ذا بريذينج روم The Breathing Room موجود فى المعادى من فترة. سعر الحصة 60 جنيه، إلا لو كان معاك كارنيه يثبت أنك طالب وفى الحالة دى السعر هـ يبقى 45 جنيه. فى الساعة 8 مساءً يوم الأحد تقدر تروح كورس مخصوص علشان التأمل لو بـ تدور على جلسات مافيهاش مجهود بدنى. ويوم الأربعاء الساعة 9.30 صباحًا فيه حصة براناياما pranayama. كمان هـ تلاقى حصص يوجا ثانية زى فينياسا Vinyasa، وسيفانادا Sivananda وأشتانجا Ashtanga. تقدر تتابع حصصهم من جدول المواعيد الموجود على البلوج بتاعهم اللى متنظم كويس و بـ يتحدِّث بصورة مستمرة.

آخر واحد، بس مش أقل واحد هو نِن سنتر اللى لسه بـ يفاجئنا بحاجات كثير. مكان المركز فى شارع شفيق منصور فى الزمالك، المركز مش بس بـ يقدم خدمات وحصص للناس، ده كمان بـ يقدم حصص للكلاب الصغيرة!، من الساعة 8 صباحًا للساعة 10 صباحًا يوم الاثنين، فيه حصص لليوجا مع ريبيكا وده يعتبر اختيار كويس للمبتدئين. كمان يوم الاثنين من 10 صباحًا لـ 11 صباحًا حصة Ashtanga Vinyasa flow. أسعار الحصص للزوار هى 100 جنيه لكل زيارة. أجندة مواعيد نِن سنتر تقدر تلاقيها على موقعهم.

رغم أن الحصص اللى فاتت تعتبر أكثر حاجة بـ نفضّلها، بس فيه اختيارات ثانية متاحة لأهل القاهرة، سواء كانوا مبتدئين أو لهم خبرة فى الموضوع. من الواضح أن الزمالك هى مركز لممارسة اليوجا. مثلاً ريفورم بيلاتس ستوديو معروف عنه أن عنده أحسن مدرسين لليوجا، فى حين أن مركز واو معروف بحلقات اليوجا علشان الجو المريح والهادئ. على الناحية الثانية ريفايف مايند بودى سبيريت بـ يقدم علاج للإصابات، وإعادة التأهيل وده بـ يعتمد على خلفية علمية أكثر من كونها مجرد تمارين يوجا، وعلشان كده بـ يركز أكثر على التمارين العنيفة.

سولاى سنتر مكان مفضل فى المعادى لممارسة اليوجا والريكى، أمّا بودى فيت كايرو ماشى على أفكار معينة لو كنت بـ ترتاح لأجواء الجيم. نفس الكلام ينطبق على جيم أكسجين الموجود فى الدقى، والجيم ده أعضاؤه عندهم ولاء شديد للمكان.

رغم كل الشائعات والأساطير اللى بـ تقول أن الموضوع صعب وغامض، اليوجا تعتبر تمرين ممتاز لكل واحد فى القاهرة. لو ما جربتش اليوجا مع كل الفرص المتاحة لك فى القاهرة يبقى فاتك كثير. اليوجا ممكن تكون وسيلة الهروب الوحيدة من دوشة وإزعاج الحياة فى القاهرة.

علشان المواعيد ممكن تتغير، من فضلك اتصل بالتليفون أو راجع المواعيد على الأنترنت قبل ما تروح أى مكان من الأماكن الممتازة دى.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هنا كوبر
حرر بواسطة:
هنا كوبر
تاريخ النشر:
06/08/2012