ست طرق لاستيقاظ أسهل فى القاهرة - صحة ولياقة Feature - كايرو 360
 







ست طرق لاستيقاظ أسهل فى القاهرة
ست طرق لاستيقاظ أسهل فى القاهرة
اصدرت في: 19/02/2013
وقت النوم كالعادة خلص بسرعة؛ المنبه بـ يرن وبـ يبعث صدمات مزعجة مباشرة لأعصابك، علشان يقول لك أن ده خلاص وقت الاستيقاظ. لو ما كنتش قفلته أثناء نومك، أو رميته بعيد علشان يسكت، فاللحظة دى تعتبر كارثة بالنسبة لناس كثير.
كثير مننا بـ يحسوا بصعوبة لما يحضر وقت الاستيقاظ. وكمحاولة منا لتقليل إحباط الصباح، جمعنا لك شوية نصائح تساعدك أنت وجسمك على استقبال يومك بكل سعادة. وزى أغلب التغيرات، لازم تواظب على خطوات ثابتة علشان تحصل على نتيجة فعالة. لو حسيت أول يوم أن مافيش فايدة، اوعى تستسلم. جرب أكثر حاجة مناسبة لك، وفى غمضة عين، هـ تبقى فى طريقك للاقتناع أو على الأقل قبول فكرة الصحيان بدرى.

واحدة واحدة
بدل ما تنط من السرير وتأخذ دوش سريع وبعدين تجرى على الباب علشان ما تتأخرش؛ اعطى لنفسك فرصة. لو معنى كده أنك تضبط المنبه نصف ساعة أو ساعة إلا ربع أو حتى ساعة قبل ميعاد خروجك، اعمل كده علشان تتيح لجسمك الوقت والمساحة اللى يسمحوا له يصحصح بصورة هادئة مريحة. استلقى على سريرك لمدة دقائق بسيطة، شوف مدى استعداد جسمك أنه يستقبل يوم جديد، اتفرج على أشعة الشمس الداخلة من الشباك وهى بـ تحمسك أنك تحقق هدفك.
 
اغسل وجهك وعينيك بمياه باردة
رش وشك بالمياه واعمل مساج حول عينيك بمياه باردة علشان تفوق. يفضل استخدام صابونة هادئة طبيعية، ومش شرط تستخدم حاجات مبالغ فيها، سهل أنك تلاقى الصابون ده. اختار صابون يحتوى على زيتون، وجوجوبا، وسمسم أو زيت جوز الهند على وجه الخصوص. الزيوت الطبيعية مفيدة مع أصحاب العيون الحساسة أو الجافة وكمان بـ تمد البشرة بدرجة عالية من الرطوبة. علشان العملية تبقى ممتعة أكثر تقدر تضيف زيتك العطرى المفضل؛ عن نفسنا بـ نحب رائحة النعناع أو البرتقال على الصبح.

اشرب ليمون دافئ
لو فيه حاجة واحدة ما ينفعش نسيبها الصبح هـ تبقى المشروب البسيط ده. الليمون الدافئ بـ يطهر الحلق، بـ يساعد على تخلص الكليتين والكبد من السموم، وينظف القناة الهضمية وبكده يحصل تنشيط للأمعاء. مش بس كده، الليمون يعتبر من مصادر فيتامين C، المعروف بتنشيطه للدوره الدموية، ويعتبر كمان مانح ممتاز للطاقة. اعصر نصف ليمونة فى كوب، وزود مياه دافئة مع عطر البنفسج. طعمه مزز شوية؟ معلقة عسل هـ تضبط الكلام. لو عاوز تضيف حاجة تزود النشاط والقدرة على الهضم، تقدر تزود عود قرفة أو زنجبيل. إحنا قولنا لك أن جرعة الكافيين بتاعتنا من ساعتها قلت للنصف؟

حرك جسمك
جسمك كان متوقف عن الحركة طوال الليل وعملية الصحيان ممكن تبقى عنيفة لو مش متعود عليها. علشان يحصل سريان للدم، اعمل لنفسك مساج لطيف وتمرين من عشر دقائق لربع ساعة على الأقل. سواء ده معناه تعمل تمرينات إطالة وأنت بـ تأخذ حمامك أو أنك تقفز لغاية ما براد الشاى يسخن، اعمل أى حاجة تعطى جسمك اللى محتاجه. لو كنت بـ تمارس اليوجا، تمرين العمود الفقرى، الوقوف على الكتف أو الرأس، فكلها تعتبر مصادر ممتازة للطاقة وبـ تخلى الدم يتدفق للرأس. لو كنت جديد على موضوع التمارين، ما تحاولش تجرب التمارين دى من غير مساعدة من متخصص.

انعش معدتك بحاجة لذيذة
طبعًا الإفطار آخر حاجة تيجى على بالنا لما نبقى مستعجلين علشان ننزل الشغل. إفطار مكون من سكريات قليلة وبروتين كتير أثبت أنه بـ يساعد على زيادة الإنتاجية والتركيز بشكل ملحوظ؛ ده غير تأثيره عمومًا على الحالة المزاجية. تقدر تخصص خمس دقائق تسلق فيهم بيضة، وتحمص رغيف عيش وتقطع قطعة طماطم.. اختار واحدة من فاكهتك المفضلة وأنت نازل وكده يبقى كله تمام. اختيار سهل ثانى لوجبة الإفطار بـ تشمل الزبادى أو كمية بسيطة من الأكلة المصرية المشهورة: الفول.

مزيكا جامدة!
مافيش حاجة تزود من طاقتك زى أنك تسمع ألبوم حماسى على الصبح. لو عاوز ترشيحات لأغانى تسمعها، استمتع بالمجموعة دى:

- Komeda - 'Binario'
- Django Django - 'Skies Over Cairo'
- Janelle Monae - 'Tightrope'
- Yamasuki Singers - 'Yamamoto Kakapote'

ملحوظة: طبعًا إحنا هنا بـ نفترض أن أحبائنا من قراء كايرو 360 من ضمن أكثر الناس المحافظين على النظافة الشخصية فى القاهرة. فعلشان خاطر كل الناس اللى حولك من فضلك اوعى تنسى تغسل أسنانك وتأخذ حمام منعش.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هنا كوبر
حرر بواسطة:
هنا كوبر
تاريخ النشر:
19/02/2013