رمضان فى القاهرة 2013: صيامك كله صحة ولياقة مع كايرو 360 - صحة ولياقة Feature - كايرو 360
 







رمضان فى القاهرة 2013: صيامك كله صحة ولياقة مع كايرو 360
رمضان فى القاهرة 2013: صيامك كله صحة ولياقة مع كايرو 360
اصدرت في: 16/07/2013

لخبطة شديدة حصلت فى مصر خلال الكام أسبوع اللى فاتوا -وطبعًا السبب مفهوم!- وبعد الضباب ما بدأ يروح شوية شوية بعد عشرة أيام صعبة، فجأة لقينا رمضان على الأبواب. الطبيعى أن أول حاجة تيجى ع البال هى الإفطار والسحور –فى البيت أو فى مطاعم القاهرة– المستنيين أننا ننقض عليهم.

كلامنا هنا هـ يكون عبارة عن مناقشة أضرار الصيام قصاد منافعه. الحاجة الأكيدة فى الموضوع أن الصيام محتاج طريقة معينة تساعدك توصل للتوازن وكمان الأداء المناسب طول الشهر. دى شوية نصائح ممكن تساعدك تأكل وتعيش بطريقة صحية طوال رمضان.

 

تأكل إيه: لازم على قد ما تقدر تعمل توازن فى الإفطار والسحور، والأكل يشمل كل الأنواع؛ بروتينات، وكربوهيدرات، وألياف، وفيتامينات ومنتجات ألبان. طبعًا كلنا أول ما نشوف طبق كبير فيه أى أكل مع الأذان كلنا بـ ننطلق، بس المشكلة أن حتى أسرع عملية هضم ممكنة مش هـ تقدر تستحمل المفاجأة فى ظروف الجوع والمعدة الفاضية؛ الأكل بكميات كبيرة، وبسرعة ممكن يسبب زيادة فى الوزن على مدار الشهر. قبل ما تبدأ أكل، اشرب مياه كثير علشان جسمك يرتوى، ويساعدك كمان تتجنب الإسراف فى الأكل.

تعودنا أن الصيام بـ يتكسر بحاجة بسيطة؛ غالبًا تمر. طبق شوربة دافئ بـ يجهز معدتك للأكل وتبدأ عملية التمثيل الغذائى تشوف شغلها. بعضنا بـ يبدأ أكلته بمشروب دافئ أو حتى بكوباية خشاف، عصائر زى قمر الدين والكركديه مش بس بـ يعوضوا نقص السوائل ويزود جسمك باحتياجاته من السكر، دول كمان مليانين فيتامينات أساسية بـ تنقصنا طوال فترة الصيام.

الأكلات الغنية بالكربوهيدرات المعقدة والألياف بـ تُهضم تدريجيًا، بمعنى أن الطاقة الناتجة عن هضمهم بـ تخرج ببطء وتساعد على الإحساس بالشبع طوال اليوم، وبين الوجبات كمان. السحور لازم يكون خفيف، فيه أكل بطئ الهضم زى العيش الشامى، والأرز، والعدس أو الشوفان. الفواكة والحبوب كمان بـ تزود الجسم بكمية مناسبة من الألياف تساعد على الهضم المنتظم.

 

ما تأكلش إيه: فيه أكلات ممكن تضر الجسم وسط عملية الصيام ولازم نتجنبها؛ الكربوهيدرات سريعة الحرق زى العيش الأبيض أو المكرونة ممكن تسبب لك انتفاخ، وفى نفس الوقت قيمتها الغذائية قليلة. الأكلات المقلية برضه مش صحية، خصوصًا أن عملية التمثيل الغذائى بـ تكون صعبة طوال الشهر. جرب الطهى فى الفرن أو الشوى أو التشويح كبديل لعملية القلى، الاستمتاع بكميات من الأكل الدسم زى الكيكات والشوكولاتة برضه فكرة مش لطيفة، رغم أن مستويات السكر بـ تزيد سريعًا فى الأول، الطاقة المستفادة منه مش ممتدة طوال فترة الصيام.

المشروبات الغنية بالكافيين زى البيبسى، والشاى والقهوة من الممنوعات لأن الكافيين بـ يسرع من فقد المياه وبالتالى يحس الجسم بالجفاف. 

 

اتمرن: التمرين جزء مهم من روتين حياتك، لكن مش بـ ينصح بالتمرين فى وقت الصيام؛ العرق معناه جفاف، وعرق كثير ممكن يبقى خطير، جوه وبره الجيم. بعد وجبة كبيرة فى الإفطار، احتمال تشعر بالخمول والكسل، وهنا بـ ينصح الخبراء تأكل وجبة صغيرة، تتمرن، وبعدها وجبة كبيرة أول ما تخلص تمريناتك. تضخيم العضلات أو تقليل الوزن ممكن تحقق أى منهم فى رمضان، لو مشيت مضبوط. لو خلاص بقى مش قادر تمسك نفسك عن طبق المحشى، اتمشى بعد الإفطار.

 

قول مع السلامة للتدخين: التدخين ضار للصحة، نقطة ومن أول السطر. ليه ما يكونش الشهر الكريم هو انطلاقك للامتناع عن التدخين للأبد؟ بالنسبة للمدمن عليها، ما تفرقش يبطل إمتى، يبقى ليه ما تبدأش من النهارده؟ رمضان شهر لتهذيب النفس والتأمل وبـ يقدم لك كمان أحسن فرصة لطرد العادات السيئة، وعمومًا العزيمة والتصميم فى حد ذاتهم مكسب كبير.

بصراحة، صعب تبطل وكل اللى حولك بـ يدخنوا، وعلشان كده لو بطلتوا سوا، بـ يبقى عندكم دافع أنكم تشجعوا وتحمسوا بعض. طبعًا بجانب النظافة الشخصية اللى بـ تكسبها لو بطلت تدخين: أسنان بيضاء، جلد مشدود ورائحتك مش زى طفاية السجائر، إلخ..، ده غير كمان مزايا صحية مالهاش عدد. فى وقت بسيط جسمك ورئتيك بـ يبدأوا يعالجوا نفسهم وبعد أسبوعين من الامتناع عن التدخين مستويات الطاقة عندك بـ تبدأ تزيد؛ خلينا نكون صرحاء، كلنا فى رمضان ماشيين أصلاً بالعافية، ومحتاجين كل ذرة طاقة ممكنة.

لو خايف من أعراض الامتناع، روح على أقرب صيدلية واطلب منهم المنتجات البديلة للنيكوتين. الاشتياق للسجائر بـ يزيد بسبب عادات معينة؛ غيرهم كأنك بـ تغير عادات أكلك، وخليك فاكر أن الاشتياق بـ يستمر حوالى عشر دقائق، فاشغل نفسك فيهم لغاية ما يعدوا.

حظ سعيد ورمضان كريم!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
16/07/2013
-