كام واحد مننا محتاج يغير جو من غير ما يضطر يسافر بره القاهرة؟ وكام واحد محتاج يريح أعصابه من دوشة الشغل والزحمة؟.. تقريبًا كلنا محتاجين نقضى يوم بالشكل ده ومش هـ يضطرنا نحضر شنطة ونسافر كام ساعة ونأخذ أجازة من شغلنا، الحكاية ببساطة هى مشوار ومش هـ يأخذ أكثر من ساعة بعربيتك، ولو روحت بتاكسي أو مواصلات مش هـ تأخذ أكثر من ساعة ونصف لو أنت فى مكان بعيد، أما لو كنت من سكان الجيزة أو الهرم فبالتأكيد يا دوب فركة كعب وتبقى هناك فى نصف ساعة، وده لأن المكان اللي بـ نحكي عنه هو "سقارة كانتري كلوب" الموجود بمنطقة سقارة السياحية.

بعيدًا عن زحمة القاهرة وسط الصحراء على مسافة كيلو متر تقريبًا لو تحركت من الهرم، وخلوا بالكم ممكن تتلخبطوا فى الاسم لأن فيه مكان ثاني قريب منه اسمه "سقارة بالم كلوب" كتبنا لكم عنه مقال نقدي قبل كده، المكان عبارة عن قرية وملحق بها فندق 3 نجوم، ولك الاختيار في كل شيء داخل القرية، يعني مثلاً لو قررت تقضي يوم مختلف في وسط المساحات الخضراء الهائلة والمياه وهدوء المكان الرائع هـ تدفع 175 جنيه بداية من الساعة 10 صباحًا إلى 5 مساءً شاملة غداء ومشروب وحمام سباحة.

الغداء عبارة عن مشويات (شيش طاووق، كفتة، كباب، بانيه، فراخ، مع الأرز أو مكرونة، خضار سوتيه، والسلاطات، بطاطس محمرة، بالإضافة للحلويات الشرقية، ومشروبك المفضل ده بالإضافة إلى المشروبات الروحية، الوجبة كافية تمامًا لفرد واحد لكن لو هـ تطلب وجبة إضافية أو مشروب كمان هـ يكون خارج سعر التذكرة.

أسعار الأجانب لا تختلف عن أسعار المصريين تمامًا، أما بالنسبة لأسعار الأطفال تبدأ من سن 6 سنوات إلى 12 سنة نصف تذكرة يعنى 85 جنيه، من 12 سنة تذكره كاملة، أما أسعار المجموعات أو الرحلات تختلف تمامًا وده بـ يكون حسب الاتفاق مع إدارة القرية وعلى حسب الأعداد.

القرية فيها 2 حمام سباحة واحد للأطفال وواحد للكبار، وجاكوزي، لكن لو قررت المبيت في القرية وده تقريبًا اختيار مش هـ تندم عليه أبدًا هـ تدفع لليلة الواحدة 450 جنية لغرفة عائلية، يعني 2 سرير واستراحة وحمام، لو معاك أطفال أو أكثر من فردين هـ تختار الغرفة الأكبر وسعرها 600 جنيه، لكن لو كنت لوحدك هـ تدفع 350 جنيه، التذكرة شاملة وجبة الإفطار وحمام السباحة.

ده غير الجزء الترفيهي في القرية.. ملعب كرة قدم، ملعب لكرة التنس، بيتش باجي أقل وقت ساعة بـ 175 جنيه، رحلات سفاري، وبولينج، بالإضافة للملاهي الخاصة بالأطفال فقط وركوب الخيل، وخيل للأطفال بـ يسموه "فيفي" أو "السيسي" ساعة ركوب الخيل 80 جنيه، نصف ساعة بـ 50 جنيه، 1/3 ساعة بـ 30 جنيه.

مسموح في القرية بالتدخين، ده غير الجراج الخاص بالقرية للعربيات، بعد الساعة خمسة المكان غير مسموح لتذكرة اليوم الواحد فقط، أما لو معاك عضوية ودي من أكثر الصفات اللي بـ تميز القرية عن غيرها وجود كارنية عضوية سعره 30 ألف جنيه للفرد مدى الحياة لكل الأعمار والأجانب كمان 200 جنيه سنويًا، مميزات العضوية لك الحق في الدخول في أي وقت ولأي مكان داخل القرية والاستفادة بكل العروض الموجودة، بالإضافة إلى التخفيضات اللي ممكن تصل للنصف تقريبًا على كل شيء داخل القرية زي الوجبات أو الملاهي أو ركوب الخيل أو ملاعب التنس وكرة القدم أو أي شيء ترفيهي داخل القرية بالإضافة أن حمام السباحة مجانًا مدى الحياة.

وكمان لو كنت مسافر أو راجع من أي مكان وقررت تنزل استراحة في القرية مع تناول وجبة الغداء أو أي مشروب أو لمجرد الاستراحة فقط من عناء الطريق هـ تكون فرصة كويسة تجدد فيها نشاطك بعد فترة سواقة كبيرة.

أما معاملة العاملين مثالية جدًا ولائقة بكل نزيل للقرية ده غير إجادتهم التامة لأكثر من لغة أجنبية وطريقة توزيعهم في القرية كويسة يعني وقت ما هـ تحتاج أي شيء هـ تلاقيهم.