جيمات القاهرة حاجة من اثنين، إما مختلطة أو للسيدات بس؛ قليل قوى لما نقابل مكان مخصص للرجال فقط. "بالانس جيم – Balance Gym" تابع لنفس ملاك سلسلة الجيمات المخصصة للسيدات "هيرز – Hers"، بالانس مخصص لخدمة الرجال، الرجال وبس.

بالانس مكانه بجانب فرع هيرز فى التجمع الأول، فى الدور العلوى من مجمع المطاعم إميرالد إمباير. بواجهة زجاجية بطول المكان، الجيم بـ يستفيد من إطلالته الرائعة، وكونه ظاهر من مسافة بعيدة.

منطقة الاستقبال مليانة طاقم موظفين حماسى ودود، مع عرض مبهر من البروتينات، الفيتامينات، محفزات الطاقة وحوارق الدهون للرجال والسيدات. أول ما تدخل هـ تشوف سناك بار من تقديم الكافيه الشهير "شي إيدى – Chez Edy".

جانب من صالة التمرين الطويلة فيه مرايات بطول الحائط لإضافة إحساس بوسع المساحة. اضف على كده أن المواسير الصناعية المكشوفة على السقف ودرجات اللون الرمادي المعاصرة، مع كشافات لونها برتقالى فى أحمر منتشرة فى المكان قدروا يخلقوا جو رجالى مريح.

أعلى مستوى من الأجهزة مترتبة بشكل ممتاز لأقسام الكارديو والقوة البدنية، مع قسم للأوزان الحرة لرفع الحديد؛ عاااااش. نتيجة لشهرة الجيم، أوقات الذروة ممكن تبقى زحمة شوية والرائحة "الرجالى" بـ تبقى ملحوظة. فيه كمان غرفة زجاج مخصصة لحصص السبينينج، وكمان مكان خاص لحصص اللياقة البدنية.

غرف تغيير الملابس فى آخر الجيم خالص، واسعة ومنظمة، مع منطقة سبا مكونة من جاكوزى، غرفة بخار وساونا.

بعد كل اللى شوفناه من تجهيزات رياضية واسترخائية، تفاجئنا لما عرفنا أن أسعار الاشتراكات معقولة جدًا. وقت زيارتنا كانوا عاملين عرض تخفيض على الاشتراك السنوى علشان يبقى 2200 جنيه بدل 3000 جنيه. السعر يشمل 24 حصة تدريب خاصة بحالهم، 12 دعوة، شهرين لتجميد اشتراكك لو حبيت وست جلسات متابعة. اشتراك لمدة ستة أشهر سعره 1800 جنيه، يشمل 12 حصة تدريب خاصة، و6 دعوات، وشهر تجميد وثلاث حصص متابعة. أقل فترة اشتراك هى 3 شهور، تشمل 6 حصص تدريب خاصة، 3 دعوات، 7 أيام تجميد وجلستين متابعة. تخفيضات ثانية متوفرة للأزواج، بحيث السيدات يقدروا يشتركوا فى هيرز.

مع أسعاره الممتازة، متوقع أن شعبية بالانس جيم تزيد، بس احتمال يبقى زحمة زيادة عن اللزوم مع الوقت. الجيم الرجالى بـ يقدم لكل عشاق الصحة أماكن تمرين مجهزة على أعلى مستوى، يكملها أحدث الأجهزة وكل ده بأسعار مناسبة.