أي بنت في الدنيا بـ تحب دائمًا تدور على الأفضل للاهتمام بجمالها وشكلها الخارجي واللي المفروض يبقى متناسق مع جمالها الداخلي، ومعظمهم بـ يسأل الأول على أفضل مكان للاهتمام بها وجمالها، علشان كده إحنا كمحررين كايرو 360 بـ نحرص أننا نجرب كل حاجة، وكل الصالونات علشان تتفادوا خطأ أن حد فاتح صالون والمفروض أنه بـ يقدم شغل محترف، ويظهر العكس وتكتشفي أنك في مكان مافيهوش ريحة الاحتراف.

أول ما بـ تدخلي رويال صالون - Royal Salon فى المعادى، هـ تلاقي ديكور بسيط، يكاد لا يكون ديكور، والحقيقة أن زيارتنا الأولى لهم كانت يوم الاثنين واللي عادة بـ يكون أجازة لصالونات التجميل، لكنهم الحمد لله كانوا فاتحين، وده شيء يحسب لهم، انتهزنا الفرصة وقصينا هناك شعرنا وعملناه، مرحلة القص مرحلة مرعبة لأي بنت، لأن معروف أن عند الكوافير قص الأطراف دي معناه أنها ممكن تقص لك نص شعرك بقلب جامد، ولا كأنها عملت حاجة، بس الحمد لله البنت اللي كانت معانا كانت فاهمة هي بـ تعمل إيه وقصته مضبوط، وبعد ما عملته بالسيشوار والفير، عملت حركة سيئة جدًا، ألا وهي أنها رشت الشعر بسبراي تثبيت، وده للأسف بـ يلزق الشعر وبـ يخلي شكله وريحته بشعة، ما لحقناش نمنعها من الخطوة دي فاستسلمنا للأمر الواقع، ولأن الوقت كان تأخر، قررنا نعدي عليهم مرة ثانية فى يوم ثانى علشان نكمل تقييم باقي الحاجات.

وفعلًا كررنا الزيارة في نصف الأسبوع وكان برضه فرد واحد اللي موجود في المحل كله، بس المرة دي جرعة عدم الاحتراف كانت مكثفة، إحنا كنا محددين أننا عاوزين نعمل باديكير للقدم وتضبيط الحاجبين، بعد تضبيطهم تمام، جابوا لنا جردل كده لونه أبيض، كنا شايفينه هو نفسه مع الزبونة اللي قبلنا، وفيه مياه سخنة، وحطوا رجلنا فيه، بعد كده البنت اللي معانا جاء لها تليفون، فـ فضلت قاعدة أمامنا تتكلم لمدة لا تقل عن ساعة إلا ربع، وكل ما نقول لها تنجز تقول لنا ثانية واحدة، وكلها حوارات داخلية خاصة بالمحل المفروض بما أننا زبائن ما نسمعش الكلام ده، بس تقول لمين!، وبعد ما خلصت للأسف وهي بـ تنظف رجلنا شالت جلد زيادة عن اللزوم مما تسبب في أننا فضلنا يومين كاملين بـ نعاني من ألم في القدم، وكأنه اتدلق عليها مياه مغلية بالضبط، ده غير الجروح الصغيرة في أصابع الرجل.

طبعًا بعد التجربة الأليمة دي كنا أخذنا قرار أننا مش هـ نخلي حد يفرغ طاقته السلبية في رجلنا ثاني، وأنها تكون أول وآخر مرة نروح فيها المكان ده، برغم أن أسعاره عادية مش مبالغ فيها، قص الشعر بـ 45 جنيه، وعمل الشعر بـ 50 جنيه، أما إزالة الشعر الزائد من الوجه بـ 20 جنيه، والباديكير للقدمين بـ 35 جنيه، إلا أن فيه حاجات ممكن ندفع فيها مبلغ كبير علشان نضمن جودتها.

تجربتنا معاهم كانت سيئة وأليمة جدًا، نتمنى أن أي حد قبل ما يروح لصالون تجميل ما يعرفوش يكون سأل عنه قبلها، لأن فيه حاجات التجربة فيها بـ يبقى نتيجتها مفاجأة وبـ تأخذ وقت لحد ما تتصلح.