10 بدائل صحية لأكلة هنية بأقل سعرات حرارية - صحة ولياقة Feature - كايرو 360
 







10 بدائل صحية لأكلة هنية بأقل سعرات حرارية
10 بدائل صحية لأكلة هنية بأقل سعرات حرارية
اصدرت في: 07/04/2016

فيه نظرية لولبية بتقول أن أحلى الأكلات هي اللى بتحتوي على كمية مهولة من السعرات الحرارية، من الصعب أننا نعارض النظرية، لكن نرجوكم بلاش تشاؤم علشان الأكل الصحي برضه مش شرط يكون طعمه وحش.

ممكن نسخدم الأفوكادو ونقلل الزبدة، أو نستبدل البيض بالموز الطازج، فإحنا هنا جمعنا لكم قائمة بمكونات أكل صحيّة تنفع كبديل لوصفات الأكل المعتادة، منها حاجات يعرفها عشاق الحياة الصحيّة كويس، مع حاجات ثانية مبتكرة.

 

عسل النحل أفضل من السكّر المكرّر

فوائد استبدال السكر المكرّر بعسل النحل لا تعد ولا تحصى يا جماعة، يعني بعيدًا عن طعمه الجميل، العسل يعتبر من مضادات الأكسدة وفيه عناصر بتحارب مرض السرطان وتقلل الالتهابات وتعالج مشاكل الهضم، نخلي بالنا أن كمية السكر في العسل كبيرة جدًا، فلازم نستخدمه بحرص علشان نستفيد من قيمته الغذائية وفي نفس الوقت نبعد عن السعرات الزائدة.

الأفوكادو المهروس أفضل من الزبدة الزبدة

الأفوكادو يعتبر من أهم عناصر الأكل الصحي مافيش كلام، ورغم أنه غني بالدهون، لكن الدهون الموجودة في الأفوكادو دهون صحيّة زي الموجودة في زيت الزيتون والمكسّرات، ممكن نستخدم الأفوكادو المهروس علشان نقلل كمية الزبدة المستخدمة في الطبخ؛ الخدعة هنا أننا نستخدم نصف كوب من الأفوكادو المهروسة مع نصف كوب زبدة، لأننا لو استخدمنا الأفوكادو لوحده الكيكة هـ تطلع مش مضبوطة.

 

البطاطا أفضل من البطاطس محمرة

مش مفاجأة أن البطاطا الحلوة تكون من أحسن الأكلات الصحيّة اللي تحتوي على مصادر فيتامين A وC، ده غير النحاس والماغنسيوم وغيرهم، طعم البطاطا جميل بقشرتها أو من غيرها، وتعتبر بديل صحيّ هايل للبطاطس المحمرة، كل اللي عليك تعمله تقطعها بالشكل اللي تحبه، وترش عليها شوية زيت زيتون وبعدين تتبلها بالملح والفلفل –أو البابريكيا وبودرة ثوم علشان يضيفوا نكهة قوية– وبعدين تدخلهم الفرن لمدة 30 دقيقة وبكده تكون عملت بطاطا حلوة مقرمشة تحفة، لا شكر على واجب.

 

زبادي خالي الدسم أفضل من ساور كريم

مافيش أحلى من الساور كريم خصوصًا لو معاه شوية تاكو أو فاهيتا، الساور كريم يعتبر من أشهر الصوصات اللي بتُقدم مع المشويات والأكل المكسيكي، لكن مشكلته أنه مليان دهون وسعرات لازم نعمل لها ألف حساب، صحيح الزبادي خالي الدسم قوامه خفيف شوية، لكننا ممكن نستخدمه كبديل صحي للساور كريم لسعراته القليلة وكمية البروتين، أما بالنسبة للطعم، فشوية توابل وأعشاب هيعملوا الطعم الحادق اللذيذ المميز لصوص الساور كريم.

 

لفائف الخس أفضل من تاكو

الكلام للوهلة الأولى لازم تشوفه غريب، إزاي ينفع نستبدل التورتيلا أو العيش بالخس، بس لما نحشيه بالمكونات الصح زي اللحم والجبن والخضروات، الورق الأخضر اللذيذ هيكون بديل فريش هايل للعيش.

 

الطبخ بالموز أفضل من الطبخ بالبيض

الموز عادة بيستخدم كبديل للبيض في الطبخ علشان بيحتوي على كمية نشا وسكر مناسبة، نصف كوب من الموز المهروس يعادل بيضة كاملة، وكمان بيخلي الأكلة طرية وخفيفة، وطعم الموز أصلاً لا يُعلى عليه.

 

عصير تفاح غير محلى أفضل من الزيت

لو لسه بتستخدم الزيت في الطبخ، دلوقت وقت التغيير لبديل صحي أكثر وهو عصير التفاح غير المحلّى بحيث نقلل نسبة الدهون في الأكل وفي نفس الوقت نحافظ على الطعم، كثير من خبراء الأكل بينصحوا باستخدام 3: 4 معالق زيت صغيرين مع الصوص علشان نزود من سُمك الأكل.

 

الشوفان أفضل من بقسماط القلي

 

مين يقدر يستغنى عن الأكل المقلي؟ مافيش طبعًا، الفكرة هنا هي الطبقة الخارجية المقرمشة اللي بتحقق اللمسة المطلوبة للأكل، المشكلة أن كوب من البقسماط فيه حوالي 200 سعر حراري، ممكن نستبدل البقسماط بالشوفان الغني بالألياف وبيعمل نفس الطعم اللذيذ.

 

طحين اللوز أفضل من الدقيق

طحين اللوز بيقدم اختيار رائع للطبخ بسعرات حرارية قليلة، وكمان يعتبر مصدر ممتاز لفيتامين E وغني جدًا بالبروتين، وصحيح دقيق اللوز يعتبر من أحسن البدائل الصحيّة للدقيق العادي، لكنه برضه من الحاجات اللي لازم نستخدمها بحرص، علشان كوب واحد من اللوز يعادل 90 حبة لوز، ودي كمية كبيرة أننا ناكلها على مرة واحدة.

 

القرنبيط أفضل من عجينة البيتزا منخفضة السعرات


فيه سبب مهم جدًا لاستخدام القرنبيط في تحضير عجينة البيتزا غير أنه من الأكلات الصحيّة، باستخدام ثلاثة أكواب من القرنبيط المبشور وبيضة واحدة ورشة ريحان مع شوية موتزاريلا وبارميزان، هـ تكون عملت عجينة بيتزا بالقرنبيط اللي تعتبر بديل مبتكر لعجينة البيتزا التقليدية طعمها لذيذ ومن غير سعرات كثيرة، القرنبيط بيحتوى كمان على 77% من الجرعة اليومية المطلوبة من فيتامين C وبكده أطفالك هيقدروا ياكلوا خضروات وهم مبسوطين.. 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هند صلاح الدين
حرر بواسطة:
هند صلاح الدين
تاريخ النشر:
07/04/2016
كاتبة