المغني المصري صاحب التاريخ الطويل هاني شاكر بيقدم ألبوم جديد، بيحاول يتماشى مع الجو الموسيقي العام، وفي نفس الوقت متمسك بطريقته القديمة، اللي احتفظ بها من غير أي تغيير على مدار أكتر من 30 سنة.

 

ورايا إيه محاولة لتقديم أغنية إيقاعية سريعة في إطار جديد، ابتعد الموزع أحمد عبد السلام عن المقسوم أو الإيقاع الصعيدي، واختار موسيقى التكنو، لحن مدين أقرب للركاكة، هاني شاكر حاول يضيف من عنده للحن لكن مافرقتش كتير. حتى إضافاته وطريقة أداءه ماتغيرتش من فترة طويلة.

 

أغنية ذكرياته من أفضل أغاني الألبوم. أغنية متكاملة في جميع عناصرها. جملة الحوار بين الجيتار والأبوا بداية ممتازة. اللحن جميل وحيوي من مقام الكرد – مقام هاني شاكر المفضل- كلمات بهاء الدين محمد جسدت حالة ما بين الأمل في بُكره، والرغبة في الانتقام، والجزء بتاع (سلام كبير) مش مفهوم ضمن سياق الأغنية، ولو اتحذف مش هنحس بأي تغيير ولا أي نقص. أداء هاني شاكر هادئ وجيد في المجمل.

 

الأغاني الحزينة هي النوع المفضل عند الفنان هاني شاكر، وسبب نجاحه وشعبيته، وفي أغنية اسم على ورق بيقع في فخ المباشرة والتقليدية، كلمات أحمد شريف ما هي إلا سرد لمفردات الموت والضياع والحزن والفراق، من غير ما نعرف إيه سبب كل الحزن ده، وإيه اللي يستدعي الوصول للمرحلة دي، ومش مفهوم القصد من جملة (أنا زهرة اتخلقت للزينة) هل المفروض إن الزهرة تتعمل مربى مثلًا؟

وعلى الرغم من جودة جملة الفاصل، لكن تنفيذها ماكنش موفق أبدًا، استخدام الأكورديون الفرنساوي مش مناسب، لأنه أضاف جو من البهجة على عكس مود الأغنية.

 

أغنية غلطة عمرك مثال آخر على الوقوع في السطحية، كلمات محمد البوغة بتجسد حالة الرغبة في التشفي والانتقام، لكن لحن محمد عبد المنعم على العكس تمامًا، ولحد دلوقتي مش مفهوم أبدًا إيه الغرض من لحن سريع على أغنية كلماتها مش مُبهجة.

 

وجود الموسيقيين والشعراء الشباب في الألبوم مافرقش كتير، ومن الواضح تدخل هاني شاكر بقوة في تفاصيل العمل وبيفرض وجهة نظره، لأن ملامح التغيير مش واضحة، أو نقدر نقول باهتة، في أغنية رسالة حب (عنوان قديم ومستهلك جدًا) الجملة اللحنية عبارة عن نسخة مكررة من أغاني كتير لهاني شاكر، وكل ألبوم فيه أغنية واحدة على الأقل من النوعية دي.

 

الشاعر أحمد شريف طلع علينا بفكرة غريبة على المستمع العربي في أغنية بره نفسي، عايز يشوف نفسه من بره، علشان يعرف مين بيحبه ومين بيكرهه. نفس الفكرة اللي تم تداولها قبل كده في أفلام كتير، البطل بيموت أو بيحلم إنه مات وبيشوف تعليقات الناس في العزاء، ولأول مرة بنسمع صوت الطورة (الصاجات الكبيرة) في الخلفية في أغنية مش شعبي. والسؤال هنا: إيه قصد الموزع حازم رأفت من استخدام الطورة في أغنية زي دي؟

الموسيقار الكبير محمد ضياء الدين عاد بعد فترة غياب طويلة، علشان يستعيد نجاحات الثمانينات والتسعينيات مع هاني شاكر، لحن وتوزيع أغنية يخونك إضافة للألبوم، فقط يعيبها أداء هاني شاكر نفسه، اللي كان محتاج قوة وحيوية أكتر، إلى جانب أن حرف التاء اتحول بطريقة غريبة وبقى حرف (تس) وهنسمع كلمات زي مشيتس، اتمنيتس، اتهديتس، اموتس، بيفوتس، وهكذا.

 

أغنية شكرًا كلماتها اللي كتبها محمد البوغة ولحنها محمد عبد المنعم لم تحمل أي جديد، بالعكس هي عبارة عن أفكار لأغاني قديمة سواء في الكلمات أو في اللحن.

 

في أغنية بحلم بنشوف جانب آخر من موهبة الملحن محمد عبد المنعم، اللي أثبت إنه يقدر يقدم ألحان متميزة بعيدًا عن الألحان الشعبية اللي اقتحم بيها الساحة الفترة الأخيرة. تعامل أحمد عادل مع الكمنجات والجيتار والإيقاع بوعي.

 

الملحن حمدي صديق يعود بعد فترة غياب بأغنية وإيه يعني. وقدم جملة لحنية جديدة، بتتابع نغمي رائع، وتفوق على نفسه في تلحين كوبليه (ولا عمري يوم شفت كده) الموزع مجدي داوود عمل جملة فاصل عادية.

 

لما بنشوف اسم الشاعر الكبير بهاء الدين محمد بنعرف إننا هنسمع كلمات حلوة، وفيها فكرة جديدة، لكن أغنية بعد حبك مخيبة للآمال، وأقل من العادية. لحن مدين جيد جدًا بالنسبة لأغنية Slow بسيطة، لكن فيها نَفَس ملحن موهوب.

 

في أغنية جرح الماضي الملحن والموزع محمد ضياء استغل كل طاقات وإمكانيات الأوركسترا، وقدم جُمَل موسيقية – سواء في اللحن أو في موسيقى الفواصل – قمة في العذوبة والجمال والرقي. خطوط الوتريات المتعارضة في الخلفية أضافت للأغنية.

 

جملة البداية في أغنية هتلاقيني تُحسب للموزع حازم رأفت، البيانو ونغبشات الجيتار والوتريات أكدت على حالة الهدوء المُصاحب للعتاب الأخير بين حبيبين. الملحن خالد جنيدي استخدم الكريشندو أو التصاعد اللحني لحد دخول الإيقاع. جملة الفاصل كانت تحتمل موسيقى أكثر قوة وتماسك، لكن الموزع اكتفى بالحلول السهلة.

 

في أغنية برواز صورتك كلمات ناصر الجيل بتعبر عن حالة التعلق بتفاصيل الحبيبة الغائبة، وطول الوقت اللحن وموسيقى الفاصل وموسيقى الخلفية أفضل من أداء هاني شاكر الثابت طول الوقت.