ألبوم كتاب الحب للموسيقار كاظم الساهر هو الألبوم رقم 25 في مسيرته الفنية الكبيرة. كل الأغاني من أشعار الراحل الراحل نزار قباني. التوزيع أغلبه لميشيل فاضل و3 أغاني بس لهشام نياز. وطبعًا الألحان لكاظم الساهر.

نقطة القوة في الألبوم كله التوزيع الموسيقي. تحديدًا الأوركسترا اللي فيه أفضل عازفين أوروبا، واللي نفذ الجمل الموسيقية بحرفية واقتدار.

التوزيع الخرافي والمقدمة الرائعة لأغنية كتاب الحب تُحسب للموزع ميشيل فاضل. واللحن من أجمل وأرق ألحان كاظم الساهر.

في أغنية رسالة حب صغيرة الكلمات مابعدتش عن قاموس نزار قباني [سيدتي-حبيبتي-أنتِ اللي بتتكرر كل شوية]

واللحن كالعادة على طريقة كاظم الساهر اللي بيتعب جدًا علشان يلاقي جملة صولو حلوة أو مقدمة موسيقية ممتازة وبيتعب أكثر علشان يضيع كل اللي عمله!

هنلاحظ مثلًا انتقاله للنغمة الشرقي -الربع تون- عند (فلا تقولي يالهذا الفتى) الانتقالات دي معتادة عند كاظم الساهر. بيتعمد يعملها في أغلب الأغاني، حتى لو الأغنية مش محتاجة النقلة دي. وهنلاحظ إن مود الأغنية اتغير تمامًا.

في أغنية كوني امرأة نزار بيطلب من حبيبته إنها تتحول لإعصار. دي مش أول مرة نزار يكتب الحالة دي وكاظم غناها قبل كده.

لكن الجديد فعلًا الجملة اللحنية الممتازة اللي صاغها كاظم لكلمات صعبة إلى حد ما. وكالعادة التوزيع متفوق على كل عناصر الأغنية.

دخول المزامير بعد كوني فرسًا لمحة جيدة. كأنه حبيبته -الفرس- بترقص. وجملة الفاصل بالناي والخلفية بخط وتريات بيقول جملة مختلفة تمامًا إضافة حقيقية للألبوم.

مع بداية أغنية عيد العشاق بيظهر الموزع ميشيل فاضل في جمل الوتريات وصوت الكورس.

صوت كاظم فرحان ومش مرهق على عكس باقي الأغاني. والتحويلات المقامية في مكانها مضبوط.

عودة مرة أخرى لإيقاع الرومبا في أغنية لو لم تكوني أنتِ في حياتي . كلمات الأغنية بتجسد حالة الحب من منظور مختلف. وإن كانت الصياغة مش موفقة قوي.

نزار بيقول أنه لو ماكنش لقى حبيبته كان هيخترع واحدة زيها بالضبط. لكن التعبير الغريب هنلاقيه (طويلة كالسيف) علشان تمشي مع (سحابة صيف) في السطر اللي بعدها. وطبعًا ماحدش هيشبه حبيبته بالسيف أبدًا في 2016.

هنسمع كمان (وثغرها كأس عبق) كأس عبق إزاي طيب؟ هي المفروض (كأس عرق) لكن عشان العرق مشروب كحولي فكاظم غيرها منعًا للقيل والقال، وعلشان الرقابة!

هنلاحظ نفس النقلات المقامية غير المبررة عند (كنت استعرت قطعة من القمر) و(كنت جعلت شعرها مزرعة من الحبق) والأغنية عامة فيها حالة من الفوضى والسمك لبن تمر هندي.

كاظم بيبعد خالص عن الأغنية الكلاسيكية وبيقدم لحن سلس وهادي في أغنية زر مرة اللي قرب كتير جدًا وبالذات في البداية وصولو البيانو من أغنية قولي جاي لعاصي الحلاني وكارول صقر. ونقل الأغنية نص تون بالقرب من النهاية خلاها أحلى.

أغنية شئون صغيرة المفروض أنها ببتقال على لسان سيدة. لكن كاظم عدلها بحيث تبقى مناسبة له. اللحن من أفضل ألحان الألبوم. الانتقال لمقام الصبا عند (أبكي أبكي) و(أظل مريضًا) موفق جدًا.

على الرغم من البداية الجيدة وجملة الفلوت والناي في أغنية قصة خلافاتنا لكن الانتقال الغريب والمفاجئ إلى مقام الصبا عند (برغم خريف علاقاتنا) غيّر الحالة تمامًا وكأنه خلل في بناء الأغنية.

بداية ممتازة بالهارب والآهات لأغنية تناقضات. والجملة غالبًا لكاظم الساهر.

دخول الوتريات بنفس جملة الآهات اللي بتفكرنا بمقدمة أغنية صبري عليك طال للمغربية الراحلة رجاء بلمليح.

وبيفضل التبادل بين الآهات والكمنجات على طول الأغنية بسلاسة لاستغلال جمال الجملة اللحنية. وطبعًا مش محتاجين نقول إن التوزيع الأوركسترالي تحفة حقيقية.

لجسمك عطر خطير النوايا مثال ممتاز على الأغنية الرومانسية. التوزيع الأوركسترالي البديع أضاف للأغنية كثيرا. لحن كاظم جميل وحالم. مع ملاحظة إنه صوته مرهق في المناطق العالية.

أغنية فاكهة الحب أغنية بسيطة وماكنتش محتاجة كل التوزيع الاوركسترالي الخرافي ده. وخاصة أنها حالة رقيقة. وكلام من حبيب لحبيبته.

في المجمل الألبوم كويس. لكن كاظم الساهر للأسف مُصر على تقديم نفسه كل مرة بأنه الملحن العظيم الخرافي اللي بيعمل حاجات ماحدش يعرف يعملها غيره. لكن غالبًا الجمال في البساطة.