جميل..أول حاجة لازم نبدأ بها هي اتجاه كايروكي للاحترافية بشكل هائل وملحوظ عن كل مرة قبل كده. ألبوم جديد بعنوان «وأنا مع نفسي قاعد» استناه كثير من جمهور كايروكي، وفعلًا نقدر نقول أنهم صبروا ونالوا. الألبوم مليان مفاجآت على كذا مستوى سواء للمستمع العادي أو للمستمع اللي شاغل باله بالتفاصيل الفنية الدقيقة لفرقة بدأت مشوارها كـ Underground band واتنقلت للاحترافية.

يبدأ الالبوم باغنية "الملك" هادئة بطابع متفائل و دافئ بتوزيع Folk  وكلمات جميلة عن واحد شايف أنه ملك عظيم لأنه حواليه ناس بـ يحبهم و ماء وهواء وبنت جميله بـ تحبه، كلمات بسيطة ومعبرة بـ توصل لقلب المستمع ببساطة ساعد فيها لحن و توزيع جميل. بعدها "كل يوم" بـ تفكرنا شوية باغنية "افرد جناحك" بنفس الروح المتفائلة. الايقاع السريع الساخن واللازمة الموسيقية المميزة، وهنا بـ يبان رهان كايروكي الذكي على تكرارهم للتوليفة اللي نجحت فى جذب كم كبير من جمهورهم، وأنهم عملوا ده بحرفية وتطوير بارع علشان الموضوع مايكونش مجرد امتداد وتكرار، و ده باين فى نقط زي إنتاج فني وموسيقي أكثر احترافية ونفس الكلام فى أغنية "بكرة الشمس تطلع" اللي فيها نفس الروح مع إضافة جزء فيه إيقاع المارش اللي دائمًا له تأثير حلو وحماسي خصوصا لو مع لازمة تعلّق وتوزيع محترم.

 "وأنا مع نفسي قاعد" أغنيه هادئة و حالمة بموود يشبه أغاني فريق Camel خصوصًا فى التوزيع والأصوات المستخدمة فى الأغنية ونفس الكلام في أغنية "تايه" مع استخدامهم لوتريات فى الأغنية خلقت فى الأغنية عمق مؤثر بشكل غير مباشر، التجديد بـ ييجي فى أغنية "لو كان عندي جيتار" اللي مكتوبة وبـ تتغني بالفصحى مع الاحتفاظ بنفس الموود فى التلحين والتوزيع، التجربة فى حد ذاتها تحترم كمحاولة التجديد انما ممكن تختلف بين القبول أو عدمه عند المستمعين. "صوتي" أغنية وطنية بثوب جديد مختلف عن المديح المباشر فى البلد، اغنية على لسان واحد  بـ يعبر عن صوته و إرادته اللي بـ يحاول يحافظ عليها فى بلده وسط ناس بـ تحاول تسكته وتضللَه.

كايروكي يوم بعد الثاني بـ يتمسكوا أكثر بكذا نقطة بـ تخلق منهم Rock Band  حقيقي، زي تركيزهم على موود الأغاني بتاعهم بتوزيعات بين الـHard Rock  و الـAlternative  وبُعدهم عن محاولات دمج أغانيهم بموود الموسيقى الشرقي من حيث الإيقاع و المقامات، وده خلاهم أكثر تحديدًا وانتماء للـ Rock، وتركيزهم على حاجة كمان وهي اختيارهم للاصوات اللي ساهم بدور كبير جدًا فى خروج جودة ممتازة وأصلية، وده مهم جدا لأن مزيكا كايروكي بسيطة وبعيدة عن التعقيد فبالتالي محتاجة جودة عالية لتكميل الصورة المطلوبة، و يمكن دة ظهر بقوة فى أغاني زي "بسأل عليكي" و"لكن احساسي مش كفاية" اللي فيها Solos  و Licks  جيتار فى منتهى الجودة والبساطة.

بعد تكميل صورة الـRock Band  العربي بنجاح من منظور كايروكي، كدة المتوقع أو المنتظر منهم فى الألبوم اللي جاي تقديم رؤية جديدة للجمهور و بكده يكونوا مكملين على الطريق الصح.