جوائز اختيارات محرري كايرو 360 لعام 2016 لأفضل المطابخ الآسيوية - مطاعم Feature - كايرو 360
 







جوائز اختيارات محرري كايرو 360 لعام 2016 لأفضل المطابخ الآسيوية
جوائز اختيارات محرري كايرو 360 لعام 2016 لأفضل المطابخ الآسيوية
اصدرت في: 11/05/2016

لو عمرك ما جربت السوشي أو النودلز الآسيوية يبقى أنت فايتك أكبر تجربة ممكن تخوضها في حياتك، المطبخ الآسيوي معروف بتنوعه وتقديمه لأكلات من أكثر من بلد بتوابل مختلفة بتعرض لنا ثقافات عالم ثاني بكل جوانبه في وجبة واحدة، بس للأسف مش كل المطاعم بتقدر تعمل ده وبتقدمه بالطريقة اللي المفروض يتقدم بها، بس عشاق الأكل الآسيوي زينا يقدروا يفرقوا بين الطبق اللي معمول زي ما الكتاب بيقول وريحته تجيبك من أول الشارع وما بين اللي يخليك تبقى عاوز تهرب من المحل من قبل ما تطلب.

الفائزين بجوائز اختيارات المحررين لعام 2016 لأفضل المطابخ الآسيوية:

 

إيت – 8

لو عاوز تجرب أكل آسيوي زي ما الكتاب بيقول من أول الـ Dim Sum لحد النودلز والحلو المميز. الفورسيزونز نايل بلازا دائمًا بيواصل إبهارنا وفضل محافظ على سمعته الراقية بمطعم مميز زي "إيت – 8".

 

آسيا بار – Asia Bar

مكان مختلف في الزمالك بيقدم لك كل أكلات آسيا بمطابخها المختلفة، غير القعدة في مركب على النيل بتديك شعور مختلف برضه، أكيد تجربتك هتكون مختلفة هناك.

 

بيرد كيج – Bird cage

لما نيجي نتكلم عن الأكل التايلاندي لازم نتكلم عن بيرد كيج في إنتركونتيننتال سميراميس، اللي أكله حلو ومضبوط على الشعرة، وكمان قعدته مميزة.

 

لازياتيك – L'asiatique

أما لو عاوزين تجربوا أكل آسيوي مبهر مش بس سوشي لازياتيك الممتاز اللي هيعجبكم، كمان مكانه في مركب لو باشا في الزمالك هيعجبكم أكيد، خاصة أن كل الأصناف اللي تتخيلوها متوفرة حتى الساكي.

 

موري سوشي – Mori sushi

فيه أماكن بتعجز الكلمات أنها توصف جمالها، لو هنتكلم عن الدقة والفن والإبداع، يبقى لازم نتكلم عن موري سوشي اللي لسه محافظ على مستواه وبيمتعنا كل مرة نروحه بأكلاته الشهية.

 

ميراي – Mirai

من الأماكن المتميزة بموقعها في الزمالك واللي تخطفك لعالم آسيا السحري، اللي مليان أكلات آسيوية ممتعة.

 

شوجن - Shogun

في حاجات في الحياة ما ينفعش حد يحكي لك عنها لازم تجربها بنفسك علشان تستمتع بها، ومن الأماكن دي شوجن في انتركونتيننتال سيتي ستارز، اللي هيمتعك بأطباقه المميزة.

 

ساباي ساباي – Sabai Sabai

ملوك الأكل التايلندي في الزمالك، واللي مايعرفش يعنى إيه ساباي ساباي، فدي جملة باللغة التايلاندية ترجمتها "مش عاوز حاجة من الدنيا"، وده تعبير عن الرضا والسعادة واللي بيعبر عن احساسنا بالضبط بعد ما خلصنا أكل هناك.

 

سايجون – Saigon

المنيو الضخم المتنوع في سايجون في نايل سيتي تاورز عمره ما هيبطل يجذبنا أبدًا، سواء في تنوع السلاطات أو الأطباق العادية، ده غير طبعًا أكلاته المميزة من فيتنام.

 

فويجو – Fuego

كل عشاق السوشي عارفين أن فيوجو من أحسن الأماكن اللي هتستمتع فيها بالسوشي، ولو سألت أي حد هينصحك بيه على طول، فويجو بيثبت لنا كل سنة أن التميز والحفاظ على مستواه دي مهارة قدر يكتسبها بسهولة علشان يمتعنا بأفضل أنواع السوشي في القاهرة.

 

وك أند واك – Wok and Walk

لو بتدور على أكلة تشبعك وسريعة وسخنة، مافيش أحسن من وك أند واك اللي بيقدم لك أكل آسيوي من مطابخ مختلفة بس بنكهات يحبها الشعب المصري.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
11/05/2016
-