جوائز اختيارات محرري كايرو 360 لعام 2016 لأفضل مطاعم المطبخ العالمي - مطاعم Feature - كايرو 360
 







جوائز اختيارات محرري كايرو 360 لعام 2016 لأفضل مطاعم المطبخ العالمي
جوائز اختيارات محرري كايرو 360 لعام 2016 لأفضل مطاعم المطبخ العالمي
اصدرت في: 12/05/2016

بالرغم من أن الحفاظ على مستوى مطعم مسألة صعبة، إلا أننا نعتقد أن الموضوع أصعب بكثير لأصحاب المطاعم اللي بتقدم أطباق المطبخ العالمي؛ أولًا لأن غالبًا 85% من المطاعم الموجودة بتقدم أكل عالمي، ثانيًا معظم الناس بتحب النوعية دي من الأطباق، يعني من الآخر المصريين يعتبروا خبراء في المطبخ العالمي.

والقائمة دي فيها أسماء مش بس قدرت أنها تحافظ على مستواها، دي كمان قدرت أنها ترضي الخبراء بأطباقها العالمية المميزة:

 

كريف – Crave:

من الأسماء اللي لازم تكون في قوائم الفائزين. من أول ما فتح وهو من الأماكن اللي لازم تيجي في بالنا لو عايزين قعدة شيك وأكل حلو. ومش زي المطاعم اللي بتعتبر أن المنيو اللي بدأوا به مقدس ما يتغيرش، القائمين على المطعم بيجددوا كل فترة في الأطباق والكوكتيلات اللي بيقدموها. دي يمكن مجازفة كبيرة لاسم قدر يحقق نجاح ، ولكن المجازفة بلا شك محسوبة صح، لأن حتى والمنيو بيتغير النجاح والمستوى ثابت ودي أهم حاجة.

 

جريبس – Grapes:

جريبس من الأماكن اللي تجربتنا معاها ما تتنسيش؛ المنيو عامر بالأطباق المتنوعة اللي بترضي جميع الأذواق، ده غير ديكوراته المبهجة اللي ممكن تغير لك الموود، وحتى الخدمة الممتازة اللي مش ممكن تلاقي زيها في أي مكان تاني. في تجربتنا إحنا تقريبًا ما سيبناش حاجة إلا وجربناها؛ سواء فراخ، لحوم أو حتى سي فوود، وكله كان بنفس المستوى الرائع. لو ما روحتوش قبل كده، جرب الفيليه مينيو هيعجبك.

 

كازلاك – Kazlak:

إحنا في كايرو 360 بنحب الحاجة اللي معمولة بحب ومزاج، وكازلاك فيه الحاجتين دول؛ مش بس لأن القائمين على المكان قرروا أنهم يدعموا الاقتصاد المصري لما اختاروا أن كل قطعة في المحل تكون مصنوعة في مصر من أول الديكورات وحتى الكوبايات، ده كمان لأن الأكل اللي بيقدموه –وده الأهم- فيه الروح الحلوة اللي تحمسك أنك تخلص طبق تدخل في اللي بعده. جربوا طبق الفراخ المخلية المشوية... ولو بتحب البط، كازلاك هيكون مكانك المفضل.

 

أوك جريل – Oak Grill:

من المطاعم المميزة في فندق كونراد القاهرة، واللي قدرت أنها تحقق نجاح بين مطاعم الفندق نفسه ومطاعم القاهرة بشكل عام. أوك جريل بيميزه جودة اللحوم وقطعيتها ودي حاجة للأسف مش سهل تلاقيها وسط المطاعم المصرية. هو صحيح من الأماكن اللي هتخرج منها ومحفظتك شبه فاضية لأن الأسعار هناك غالية، ولكن ده ما يمنعش أن الأطباق تستاهل أنك تروح ولو لمرة في العمر.

 

تيدز – Ted's:

بالرغم من أننا شخصيًا مش من هواة الأكل في المطاعم اللي بتبقى موجودة في المولات؛ إلا أن كل الناس أجمعت أن تيدز قدر أنه يكسر القاعدة دي تمامًا، وده لأسباب كثير؛ منها أن المكان بيتميز ببساطته الأنيقة، ده غير أن المنيو متنوع ويرضي كل الأذواق، وطبعًا الأهم من كل ده هو جودة الأطباق واحترافية تنفيذها. تيدز مش بس أحسن مطعم في سيتي ستارز مول، ده من ضمن أحسن مطاعم المطبخ العالمي على مستوى القاهرة.

 

ذا إدواردز – The Edward's :

ذا إدواردز من الأماكن اللي بتتميز بطابع خاص. كزوار دائمين للمطاعم بنقدر نحس لو أصحاب المكان فاتحين المطعم لمجرد أن الأكل بيكسب في مصر، أو فاتحينه لأنهم فعلًا عندهم شغف باللي بيقدموه وعايزين يشركوا الناس فيه. ذا إدواردز من الأماكن اللي من النوع الثاني. كل حاجة لها معنى ووراها حكاية عند ذا إدواردز؛ من أول قطع الديكور العتيقة اللي موجودة في المكان لحد الأطباق المتسمية على اسم المتخصص فيها في عائلة أصحاب المطعم. والجميل أن مع كل الروح الحلوة دي، الأطباق مميزة وشهية... هي دي المشاركة اللي إحنا بنحبها فعلًا.

 

ذا سموكري – The Smokery:

ذا سموكري من الأماكن اللي مرتبطة في أذهان ناس كثير بالصيف والشمس والبحر، وده لأن له فرع في الساحل الشمالي وتحديدًا في مراسي، بجانب فرع القاهرة الموجود في قطامية هايتس. إحنا المكان مش بس مرتبط عندنا بالصيف بس، ده مجرد ذكر السالمون بيفكرنا بتجربتنا المميزة هناك؛ واللي يعتبر ماركة مسجلة بالمكان لأنه بيقدمه بأنواع وطرق مختلفة وكلها حلوة. ولو ما لكش في السالمون ما تقلقش، ذا سموكري عنده أطباق لحوم ممكن تستمتع بها.

 

يو بيسترو & بار – U Bistro & Bar:

واللي فتح مكان لابوديجا في الزمالك. بجانب أطباقه المتنوعة والاختيارت الكثيرة، يو بيسترو & بار بيتميز بجوه العام ومستوى الخدمة العالي –واللي كزوار لمطاعم كثيرة انبهرنا بمستواها. كل ده يخلي واحد من أحدث الأماكن اللي موجودة على خريطة المطاعم بالقاهرة جدير بأنه يكون ضمن قائمة الفائزين.

 

فايكينج – Viking:

من المطاعم اللي بقالها شوية على الساحة في القاهرة، واللي بالتالي له صدى بين أهالي منطقة مصر الجديدة، وقريب جدًا هيكوّن قاعدة جماهيرية بفرعه الجديد في سيتي سكوير في القاهرة الجديدة. فايكينج عمل مجموعة من التجديدات في المنيو واللي كانت في صورة أطباق مبتكرة من أماكن مختلفة من العالم زي مثلُا سلاطة الفراخ بالكاجو على الطريقة الإيرلندية، واللي بالرغم من مكوناتها الكثيرة كانت من الأطباق المميزة اللي ذقناها في آخر زيارة لنا هناك.

 

ويستيرن تامي – Western Tummy:

من الأماكن الجديدة –تم افتتاحه في أواخر 2015، واللي بنتوقع لها نجاح مستمر لو فضل بالمستوى اللي هو عليه حاليًا. ويستيرن تامي الموجود في داون تاون مول في القطامية قدر أنه يحقق قاعدة جماهيرية بشكل سريع بسبب أطباقه العالمية المميزة، واللي عجبنا منها البلو تشيز فيليه واللي جمع بين نكهات مختلفة ولكن بطريقة احترافية تخليك مبهور.

 

كيان – Kayan Kitchen & Bakery:

مين كان يقول أن كشك صغير قدام نادي الصيد يعمل فينا كل ده؟ خدمة هايلة وساندويتشات متنوعة أكثر من ممتازة ومكونات فريش. كيان بيثبت لنا أن مش شرط يكون مطعمك كبير علشان تقدم أكل حلو. من أول ساندويتشات اللحوم الباردة ولحد البرجر وكل حاجة ما بينهم؛ كيان أبهرنا بمستواه، فطبيعي يكون ضمن القائمة.

 

جوائز اختيارات محرري كايرو 360 لأفضل أماكن بتقدم ستيك

ولأن الستيك من الأطباق اللي ناس كثير بتحبها، واللي برضه مش أي مطعم بيقدمه على أصوله، قررنا أننا نعمل جائزة خاصة للأماكن اللي قدرت تقدم لنا ستيك زي ما بيقول الكتاب.

 

وان أوك – One Oak:

عمرنا ما تخيلنا أن يكون فيه مكان بيجمع ما بين الستيك والسوشي تحت سقف واحد –إحنا نفسنا مش مرتاحين وإحنا حاطين الكلمتين مع بعض في جملة واحدة. وان أوك قدر يجمع ما بين أكثر حاجتين أهل القاهرة بيحبوها، ومش بس كده ده بيقدمهم بشكل محترف وممتاز. بما أننا بنتكلم عن الستيك، لازم نقول لك أن وان أوك من الأماكن القليلة جدًا اللي بتاخد موضوع تحضير الستيك بجدية، وبتهتم بأدق تفاصيل الطبق؛ من أول القطعية، التتبيلة ودرجة التسوية والصوص اللي جاي معاه، إحنا شخصيًا انبهرنا بجديتهم أثناء تجربتنا، وننصحك أنك تجربه بنفسك.

 

جيه دابليوز ستيك هاوس – JW's SteakHouse:

جيه دابليوز ستيك هاوس والموجود بفندق الماريوت في الزمالك معروف أنه من أغلى الأماكن اللي بتقدم الستيك في القاهرة، وده كان السبب اللي بيخلينا نزوره بصفة مستمرة علشان نشوف إذا كان فعلًا الستيك هناك لسه يستاهل أننا نفضي المحفظة علشانه ولا لأ. ونعتقد أن وجوده ضمن القائمة دليل واضح على أنه محافظ على مستواه، وأنه متربع على العرش الستيك في القاهرة. ما فيش حاجة حلوة بتيجي ببلاش... خلينا واقعيين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/05/2016
-