جوائز اختيارات محرري كايرو 360 لعام 2016 لأفضل المطابخ الشرقية - مطاعم Feature - كايرو 360
 







جوائز اختيارات محرري كايرو 360 لعام 2016 لأفضل المطابخ الشرقية
جوائز اختيارات محرري كايرو 360 لعام 2016 لأفضل المطابخ الشرقية
اصدرت في: 15/05/2016

المطبخ الشرقي واحد من أغنى المطاعم بالتنوع الشديد بين أطباقه، اللي بيديك فرصة أكبر لاختيار الأنسب لذوقك وحالتك الصحية والمزاجية، وكوننا شرقيين بيخلي كل أكلاتنا المنزلية تقريبًا بتنتمي للمطبخ ده، وده يحط أي مطعم بيقدم أكل من المطبخ الشرقي في تحدي مش سهل، لأنه لازم يكون عارف أن رواده هيكونوا عارفين يميزوا كويس الحلو من الوحش في اللي بيقدمه.
وده–كالعادة- خلى المنافسة صعبة جدًا في اختياراتنا لأفضل المطاعم الشرقية، لكنه يخلينا نقدر نقول بقلب جامد أن الأماكن اللي تم اختيارها هي أماكن بتقدم أكل مميز فعلًا.

الفائزين بجوائز اختيارات المحررين لعام 2016 لأفضل المطابخ الشرقية:



كازوزة - Kazouza

المكان اللي روحه خفيفة في القعدة والديكورات قبل المشروبات والأطباق اللي بتتقدم، اللي كلها مصرية أصيلة، إتقان شديد وخدمة مميزة لدرجة أنك ما تبقاش عاوز تمشي.


الخال – Al Khal

القعدة المريحة تفتح النفس، وهناك نفسك هتتفتح بالمكان المبهج المريح، وفتحة نفسك دي هتلاقي اللي يشبعها ويضبطها، أكل مصري معمول بحرفنة شديدة، والخدمة المميزة هتكمل عليك انبساطك.

 

تاجوري – Tajoury

المكان اللي سمعته الحلوة سابقاه، ووقت ما تحب تختبرها أملك مش هيخيب أبدًا، اختار أكتر الأطباق المميزة من المطبخين المصري واللبناني وحطهم في منيو واحد، وتقديم كل أكلة بالاحترافية الشديدة دي، دي فكرة تخليك تعرف ليه المكان ده لازم يكون -دايمًا- ضمن الأفضل.

 

باب النيل – Bab El-Nile


بعد التجربة المؤقتة كخيمة رمضانية خلال شهر رمضان، باب النيل اتحول لمطعم دائم داخل الفيرمونت نايل سيتي، التجربة الجيدة السابقة كان ناقصها بس تضبيط المنيو وضبط الكميات، وبما أن ده حصل، يبقى نقول عشرة على عشرة.



الدبكة – El-Dabke

الأصول الشامية للمطبخ المصري، مزيج عبقري بين طبيعة الأكلات الشامية مع اللمسة المصرية اللي بتهتم بشوية تفاصيل تفرق معاك جدًا في فتح الشهية والاستمتاع بالأكل، حاجة تستاهل أنها تكون وصية كل أكِّيل!



لو طربوش – Le Tarbuche

الطابع التصميمي للمكان وموقعه المميز وحكايته التاريخية مغرية بالزيارة، فما بالك بقى لو اتضاف عليهم كمان خدمة ممتازة وطريقة تحضير مثالية للأكل المصري واللبناني؟ الموضوع أقوى بكتير من أي مقاومة محتملة يعني!



بيسترو زيتونة اللبناني – Zeitouna Lebanese Bistro

المكان اللي قدر يمتلك كل مميزات المطاعم الراقية جدًا، وفي نفس الوقت يفضل محافظ على كل مميزات الأماكن البسيطة اللي بتحس فيها براحة أكثر، والمنيو المتنوع يخليك تمشي كل مرة وأنت بتفكر في معاد الزيارة الجاية!



تنورين - Tanoureen

تحس أنهم عايزين يقولوا لك: ركز أنك تنبسط وسيب الباقي علينا، الأجواء ممتازة والخدمة فوق مستوى الرائع، والأكل معمول باحترافية وكمياته مشبعة جدًا، مكان مميز جدًا وسط زحمة الأماكن اللي بتقدم أكل لبناني.

 

كراكاس - Caracas

المطبخ اللبناني مكتسح كالعادة، ونقدر نقول أن كراكاس قدر يفرض نفسه كعلامة مميزة بين الأماكن الكتير اللي بتقدم أكل لبناني، الأصناف هناك فيها لمسة مش موجودة عند غيره، الانبساط مضمون.. والانبهار كمان!



الكبابجي – El-Kebabgy

هتقدم كباب وكفتة في مصر يبقى لازم تعرف أن الغلطة هتتلقط مهما كانت صغيرة، واضح أن "الكبابجي" كان عارف كده كويس، وقبل التحدي، ونجح فيه، من غير ولا غلطة!

لا بالميراي – La Palmeraie

الأكل المغربي أقل شهرةً في مصر بكتير من الأكل الخليجي أو الشامي، لكن عمومًا مكان زي لا بالميراي قدر يكون ممثل ممتاز للمطبخ المغربي في قلب العاصمة المصرية، ويقدر يخليك تعتبره مطبخك المفضل من أول مرة!



تبولة - Taboula

في مصر عندنا عادة سيئة، أنه كل صاحب خدمة بيقدم خدمته في البداية بشكل كويس جدًا لحد ما يبني سمعة كويسة، بعدها مستوى الخدمة يبدأ يقل ويفضل المكان عايش على سمعته القديمة.. "تبولة" كسر القاعدة دي بحفاظه على مستواه في الصنعة وكمان في الخدمة، هتفضل تنبسط في كل مرة تروح فيها!

بيسترو تمارا اللبناني – Tamara Lebanese Bestro

قعدة فخمة مريحة وجو يساعد على الاسترخاء وخدمة فوق الممتازة، ترشيح مثالي لأي حد بيدور على منيو غني بالأصناف المصرية واللبنانية!

 

مبروك لكل الفائزين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
15/05/2016
-