جوائز اختيارات محرري كايرو 360 لعام 2016 لأفضل مطاعم الأكل الصحي - مطاعم Feature - كايرو 360
 







جوائز اختيارات محرري كايرو 360 لعام 2016 لأفضل مطاعم الأكل الصحي
جوائز اختيارات محرري كايرو 360 لعام 2016 لأفضل مطاعم الأكل الصحي
اصدرت في: 16/05/2016

تقريبًا الجيل اللي عاصر أول ظهور لمطاعم الوجبات السريعة في مصر هيبقى عارف قد إيه الناس انبهرت بالمطاعم دي ساعتها وإزاي فجأة الوجبات السريعة دي بقت جزء لا يتجزأ من الهرم الغذائي لأي حد –حلوة الهرم الغذائي دي- المهم بعد فترة بدأت الناس تلاحظ أن الوجبات ضررها أكبر من نفعها مهما كان طعمها حلو، وبدأ يكون في اتجاه لاختيارات صحية أكثر تجمع ما بين الطعم والقيمة الغذائية، ده غير السعرات الحرارية الأقل طبعًا.

وعلشان اللي بيحبوا الأكل الصحي ما يحسوش بأن الأكل برة البيت خطر لازم يهربوا منه؛ بقى فيه مطاعم كثير بتقدم أكل صحي. ولكن مش كل مطاعم الأكل الصحي قدرت أنها تقدم أكلات خفيفة ولذيذة في الوقت نفسه، الأسماء الموجودة في القائمة دي قدرت أنها تحقق المعادلة الصعبة، وبالتالي كان لازم تاخد لقب أفضل مطاعم الأكل الصحي في القاهرة.

 

جود كالز – goodcals:

مين قال أن الأكل الصحي يعني سلاطة بس؟ جود كالز من الأماكن اللي بتقدم مجموعة كبيرة من الاختيارات الصحية اللي مش مقتصرة بس على مجموعة السلاطات؛ المنيو فيه مجموعة كبيرة من الساندويتشات وأطباق الباستا المختلفة اللي ممكن تخليك تستمتع بالأكل من غير ما تحس بالذنب، ولو خايف ما تشبعش جود كالز بيتميز بكمياته الكبيرة اللي هتسد معاك في أي وقت.

 

جرين هابيتس – Green Habits:

مش بس بيقدم مجموعة كبيرة من المكونات الفريش والصحية اللي ممكن تعمل بيها السلاطة اللي على مزاجك. جرين هابيتس عنده برضه مجموعة كبيرة من العصائر والكوكتيلات الصحية اللي مش بس هتنعشك، دي هتفيدك كمان.

 

كيه كال – Kcal :

سلسلة المطاعم المشهورة في دبي وصلت أخيرًا مصر، ووصل معاها مجموعة كبيرة من الأطباق والأكلات المبتكرة اللي هتخليك تفكر مرتين قبل ما تأكل من مطاعم الوجبات السريعة العادية. كيه كال بيميزهم الابتكار والتنوع في المنيو. تخيل أنهم بيعملوا برجر عدد سعراته 290 بس؟ دي حاجة إحنا شخصيًا مش متخيلينها.

 

ليتاس إيت – Lettuceat:

ليتاس إيت هو مكاننا المفضل في كايرو 360؛ في الشتا بنعتمد اعتماد شبه كامل على شوربة الجزر والقرع، وفي الصيف سلاطاتهم –خصوصًا سلاطة البط المدخن- بتشبعنا من غير ما تتقل علينا. أحلى حاجة في ليتاس إيت كمان أنه بيقدم حلويات زي الزبادي بالجرانولا والتشيز كيك وحتى زبدة المكسرات (زي زبدة الفول السوداني كده بس بأنواع مختلفة).

 

ساتفا ستيبس – Sattva Steps:

ساتفا ستيبس بيقدم أكل صحي، وكمان بيعرفك أنت ممكن تحرق اللي أنت أكلته من عندهم في كام خطوة. الجميل في ساتفا ستيبس أنه عنده أكلات تنفع في أي وقت في اليوم حتى الفطار، ده غير أن المنيو متقسم بحسب عدد السعرات الحرارية، يعني لو عايز ما تخرجش عن عدد معين من السعرات أيًا كان هتلاقي اللي ينسبك أكيد.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
16/05/2016
-