جوائز اختيارات محرري كايرو 360 لعام 2016 لأفضل أماكن المخبوزات والحلويات - مطاعم Feature - كايرو 360
 







جوائز اختيارات محرري كايرو 360 لعام 2016 لأفضل أماكن المخبوزات والحلويات
جوائز اختيارات محرري كايرو 360 لعام 2016 لأفضل أماكن المخبوزات والحلويات
اصدرت في: 17/05/2016

عندنا هنا في مصر بيختزلوا معنى الشغل في جملة: "أكل عيش".. ده تقريبًا علشان العيش هو ضيف رئيسي في كل الأكلات ونادرًا ما ينفع يكون غايب، هو وكل أصحابه من جنس المخبوزات، غير أنه أكلة كل المستويات الاجتماعية بدون أي تفرقة ولا تمييز.
وده اللي خلى الأكيلة يفكروا يخلوا من المخبوزات أكلة طعمة وينفع تتاكل لوحدها، وخلانا نشوف مؤخرًا محلات كتير تميزت فيها وبس، وتخصصت في عملها بشكل جميل وشهي، ووسط الأماكن دي لاقينا اللي قدر يحول عمل المخبوزات إلى فن حقيقي! للدرجة اللي خلت اللقمة تنافس اللحمة بجد!
تعالوا نتعرف سريعًا عليهم..

جوائز اختيارات محرري كايرو 360 لعام 2016 لأفضل أماكن المخبوزات والحلويات:

 

ليكلير باريس - L'Éclair Paris

هتحتار وتندهش..
هتحتار من كتر النكهات الموجودة عندهم واللي هتحسسك أن زيارة واحدة للمكان مش كفاية، وأنك لازم تيجي تاني علشان تدي لنفسك فرصة تستمتع بكل الموجود عندهم.
وهتندهش أنك مهما تأكل مش هتقوم تقيل لأن معجناتهم مش دسمة خالص، يعني طعم لذيذ، وأكل خفيف.. الاتنين !


برو & تشو - Brew & Chew

الناس دي ما بتهزرش، يعرفوا كويس يعني إيه يهتموا بالمضمون مع الشكل..
هتنبهر بشكل اللي هيتقدم لك وأول ما يلمس لسانك هتعيش في دنيا تانية.. والواحد فينا هيعوز إيه من الأكل أكتر من كده!

 

كوبرميلت - Coppermelt

المكان اللي أبهرنا في زياراتنا الشتوية، الأجواء المريحة والهدوء المثالي والحلويات اللي معمولة بحرفنة شكلًا ومضمونًا تخليه يفرض نفسه كأحد أفضل الأماكن في اللي بيقدمه.

 

ديوكس - Dukes

لو حبينا يعني نقول أن المكان فيه مشكلة مش هنلاقي غير مشكلة واحدة..
أنك لما تروح هناك في الغالب جمال الطعم هيسحبك للدرجة اللي تخليك هتنسى نفسك وتدوس جامد في الأكل، خد بالك يعني.

 

نولا - Nola

المكان اللي ماشي بالصيت مع الغنى، سمعته الحلوة سابقاه في كل حتة، ولما تجرب هتعرف أنها مبنية على أساس قوي من الاحترافية الشديدة والذوق العالي مش سمعة فاضية، الجودة العالية مخلياه في الصدارة بقاله فترة وباينه ناوي يكمل فيها كتير.

 

 

نوتيلاريا إيجيبت - Nutelleria Egypt

مشكلة النوتيللا الكبرى أنها بتتحول لكائن تقليدي بسهولة جدًا لأنها تنفع مع أي حاجة وفي أي وقت، وبالتالي صعب أوي تلاقي المكان اللي يحسسك أنه فعلًا بيقدمها لك بشكل مميز وقوي..

نوتيلاريا مش مجرد مكان بيقدم لك حاجة مبتكرة وتشد، فوق كده المكان راقي إلى أبعد الحدود في الخدمة والتعامل، وده يضرب الانبساط في اتنين.

 

بول - Paul

في أماكن ما يختلفش عليها اتنين، "بول" واحد منها.. الانبساط مضمون، والراحة الشديدة لتعامل الناس الراقي هناك مع الاستايل الشيك للمكان نفسه هتزود جرعة الانبساط شويتين.

 

تي بي إس - TBS

المكان اللي نقدر نقول عليه متخصص بجد ومركز في سكة واحدة وبس، وده يخلي لمستهم المميزة واضحة جدًا في كل حاجة بيعملوها.. أضمن ترشيح لإفطار خفيف وصحي ولذيذ دايمًا.

 

 

ذا باتر هاف&كو - The Batter Half&Co

تحسه معمل اختراعات مش مجرد مكان أكل، الحرص على التميز دايمًا بيخلي عندهم جديد، في كل مرة تروح هتحس أنها أول مرة.

 

ديب أن ديب - Dip n' Dip

أبطال الشوكولا بامتياز، شكل المكان يحسسك أنه ماكينة إمداد البشر بالحلويات، مش محل أكل..

احترافية في التحضير وخدمة جيدة تضمن لهم مكان بين الأفضل دايمًا.

 

مبروك لكل الفائزين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
17/05/2016
-