جوائز اختيارات محررى كايرو 360 لعام 2016 لأفضل المطاعم المتخصصة - مطاعم Feature - كايرو 360
 







جوائز اختيارات محررى كايرو 360 لعام 2016 لأفضل المطاعم المتخصصة
جوائز اختيارات محررى كايرو 360 لعام 2016 لأفضل المطاعم المتخصصة
اصدرت في: 16/05/2016

كتير بنزهق من المطاعم التقليدية وبيبقى نفسنا نجرب مطابخ جديدة، وعلشان كده عملنا قسم المطاعم المتخصصة في جوائز محرري كايرو 360، علشان نعرض عليكم أنواع مختلفة من أكلات من كل العالم، وهدفنا نوفر عليكم المجهود والتعب.

الفائزين بجوائز اختيارات المحررين لعام 2016 لأفضل المطاعم المتخصصة:

 

بارباكو مكسيكان جريل - Barbacoa Mexican Grill

الأكل المكسيكي تجربة مثيرة! لكن لو حابين نجربه نروح فين؟ خصوصًا أن المطاعم اللي بتقدم النوع ده من الأكل مش كتيرة في القاهرة، لكن من حسن حظنا أن بارباكو مكسيكان جريل موجود في القاهرة، وتحديدًا في المعادي، المطعم بيتميز بديكور بسيط ومميز، وطعم مكسيكي أصلي هيخليك تحب التجربة كلها.

 

أوفيو - Ovio

جربت كل أنواع المطابخ وبتدور على حاجة جديدة؟ أنت محظوظ! لأن أوفيو موجود في القاهرة وبيقدم لك مجموعة مميزة جدًا من الأكلات الأوربية المميزة، اللي فعلًا هتخليك تحس أنك خدت أول طيارة وسافرت لدولة أوروبية، الأكل معمول بحرفية عالية. والديكور أكثر من رائع وحلاوته في بساطته وألوانه الهادئة.

 

تابلا لونا - Tabla Luna

لازم تجربوا تبلا لونا المطعم اللاتيني اللي بيتميز بالأجواء المريحة في المعادي، واللي بيقدم مجموعة أطباق مميزة من أمريكا اللاتينية زي كيفيتشي دي كامارون، وده طبق من الإكوادور، وإمباناداس سالتينوس ودي معجنات من بوليفيا ومجموعة أطباق تانية، تجربتنا في المكان ده كانت ناجحة بكل المقاييس علشان كده هو في موضوعنا ده.

 

ذا جريك - The Greek

مطعم ذا جريك رغم أنه مطعم صغير في دجلة المعادي، لكنه قدر فعلًا يحقق المعادلة الصعبة ويقدم مجموعة أطباق مميزة، المنيو مليانة أطباق يونانية شهيرة زى souvlaki،gyros ده غير الكاليماري المشوي والجريك سلاد المشهورة.

 

سويس كوتاج - Swiss Cottage

المطبخ السويسري مميز جدًا رغم أن وجوده في القاهرة قليل جدًا، وسويس كوتاج واحد من أجمل المطاعم اللي بتقدم أطباق مميزة من سويسرا، ديكورات المطعم بتأخذك لسويسرا، وطاقم الضيافة له طابع أوربي مميز، اليونيفورم الأسود الكلاسيكي، فوندو الجبنة والراكليت نماذج من أكلات سويسرية مميزة لازم تجربوها في المطعم.

 

شوكجوزال - Çok Güzel

المطبخ التركي غني جدًا بأكلاته ووصفاته وشوكجوزال في مدينة السادس من أكتوبر من أفضل المطاعم اللي بتقدم أكل تركي، معنى Cok Guzel بالعربي "جميل جدًا" وتجربتنا في المطعم نقدر نختصرها بنفس المعني، وبعد ما تخلص الأكل هناك ما تنساش تطلب واحد شاي تركي هيضبط لك دماغك.

 

عثمانلي - Osmanly

أهالي جاردن سيتي محظوظين، عثمانلي فعلًا إضافة قوية للمطاعم في القاهرة، أكل تركي على حق، القعدة كمان مريحة وبتحسسك أنك في تركيل مش مصر، المطعم بيقدم مجموعة متميزة من أشهر الأكلات التركية زي كيبريت الكباب وموساكا الخضروات وغيرهم.. ننصحكم تجربوه في أقرب فرصة.

 

دوس كانياس - Dos Cañas

المطعم مكانه في كايرو كابيتال كلوب جاردن سيتي، دوس كانياس يتميز بأجواء راقية، منيو دوس كانياس فيها أطباق لاتينية زي بوكاديلّوز وسيفتشي وبطاطس برافاز bravas وحاجات ثانية، مع أطباق من مطابخ ثانية زي جريك سلاد وبرياني بالجمبري وتشيكن تكّا سلاد، والأكلات كلها معمولة بامتياز.

 

كيان - Kayan

هو مش مطعم تقليدي، مجرد عربية صغيرة قصادها سجادة خضراء وزرع في الدقي، وممكن في الأول ما تصدقش أن مكان صغير زي ده يقدر يعمل ساندويتشات مميزة ومنها فراخ وبيف وتركي ولحوم باردة، كيان نجح يبقى من أهم الأماكن اللي بتقدم أكل في القاهرة وعلشان كده هو يستحق يكون من أفضل الأماكن في القاهرة!

 

مبروك لكل الفائزين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
16/05/2016
-